الْخُطَـبُ الْمِنْبَرِيَّـةُ so manga khutbah sa mimbar gintas I pianimo ago piagiasa I

Manga Oripn o Allāh, amay ka mapopos so masa a kaphagintaw o manosiya ko barzakh, na thogalin pman ko isa a kaoyagoyag, sa aya kaphakaokit iyan, na magndod on so niawa niyan sa khaoyag pharoman, a giankoto a kaoyagoyag iyan na gioto so kaoyagoyag a kaposan a da dn a ikhada iyan, ka miakasold ko doniya a kaposan a da dn a katogalin on, na sabap ko daa katogalin on na da dn a kapatay ron, ka kagiya so kapatay na lalan ko katogalin, na so kiada o katogalin na madait mambo a mada dn so kapatay, ka mithakna dn so manosiya ko tampata iyan sa dayon sa dayon.
Manga Oripn o Allāh, so manosiya na sayana iyan a piakapnd so kapatay, ago sayana iyan a inikalk ankanan a kapatay. Ogaid na opama o pamimikirana phiapiya na so kapatay na kna o ba piakammsa aya mataan a piakammsa na o ba adn a matoon a taw a di phatay a pphotaw ko doniya ka kagiya somosopak anan ko waraan. Skanian oto a kapatay na bithowan o Islam sa phamotol ko pithamanan a mapiya a pkhababayaan o manosiya. ( هازم اللَّذات Hazimu al Ladzāt) apiya i kasosonor ta ko doniya na anda dn i katadmi ta ko kapatay na mada dn so kapipiya ginawa a maggdam ta, aya bo a di khalk ko kapatay na so taw a miadoniya so kagdam iyan ago miadakp o shaytan so pamikiran iyan sa kalilipatan iyan o ba khada so doniya iyan. Pitharoo Allāh  a:
قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلاَقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ

فَيُنَبِّئُكُمْ بِمَا كُنْتُمْ تَعْمَلُون (الجمعة 8).

Tharo anka (hay Mohammad) a mataan a so kapatay a so pphalagoyan iyo

na mataan a pmbalakn kano niyan, oriyan iyan na pakandodn kano ko Gomgpa

ko gayb ago so kamamasaan na panotholn iyan rkano so nganin a

miaadn kano a gii niyo nggalbkn (al Jumuah 8)
Daa phalagoyan san manga oripn o Allāh , sabap sa kagiya gianan so masa a matatago tano pn sa lalan a kaoyagoyag ko kababantaka tano ko ingd a daa ba on kapatay, na aya kakhisampay tano sankanan a doniya na makaokit tano sankai a kapatay ka aya niyan lalan. Sabap ko di ron kasasaboti na so kadaklan a manosiya na ipkhalk iyan so kapatay.
Manga Oripn o Allāh, giankai a kapatay a skaniyan so kapliyo o niawa sa ngganatan iyan so lawas, na pd sa piakammsa a katawan o manosiya ago ipkhalk iyan ago kasasandngan iyan so btad iyan, ogaid na aya pn a kaggdama niyan on na di phatay. Pitharoo o Rasūlullāh  a: Da ako makailay sa matatankd (a khitana) a zasanka on so manosiya o ba khitana, a ba niyan kalawani so kapipikira o manosiya ko kaphatay niyan.
Giankaya a kapatay na sabap ko piagma o Allāh  so kaphakaoma niyan, na lalayon kalilipatan o taw a daa akal iyan, so pman so baraakal, na sasabotn iyan, a so phakatalingoma a di katawan i masa niyan na imbtad sa miakatalingoma dn ka an iyan di khatalmba so taw. Gianan so knal on o langowa baraakal a sasabotn iran so pakagdgd o kapatay.
Manga Oripn o Allāh, Ino so kapatay ko kaplio o niawa san ko lawas, ba datar o kapthoroga ko taw a da dn a masakit on? Aya smbag na di, ka mataan a so kapatay na manga kabrg a masakit (sakarātul mawt) kna o ba satiman a kabrg ka mataan a madakl a kabrg. Pitharoo Rasūlullāh  a: Mataan a adn a rk o kapatay a manga kabrg. Apia so Rasūlullāh  na kiatintiman iyan so kabrg ko kapatay, na aya pn ari so manosiya a kalilid.
Manga Oripn o Allāh, so mu’min na phakasagad sankanan a kabrg ko kapatay (sakratul mawt) na orian o kaipos oto na kapipya ginawa a khagdam iyan, so pman so kafir, na sii ko kaphatay niyan na gioto dn poonan o siksa iyan, sa pakasagad sa pithamanan a margn, ko kangginsinga o manga malaikat ko niawa niyan. Na sii ko kapliyo o napas na pthondogn o kailay o taw a phatay gioto i sabap a inisogo o Islam so kapidnga ko mata o taw a miatay ka an di masasabarang a bontal iyan.
Manga Oripn o Allāh, so qubur na gianan i paganay a darpa ko kathogalin o taw ko doniya a barzakh a gioto so kaoyagoyag ko pagltan o doniya ago so akhirat, a skaniyan so kalot ko lopa a plbngan ko manosiya a phatay, odi na so kalodan a pharatowan on so taw a pagologn sa ragat.
Giankaya a qobur na aya kiniropaan on o Rasūlullāh  na: Adn oto a khabaloy a sapadan a sormbi o sorga, na adn pman a landng a pd ko manga landng o naraka. Amay ka so taw a miatay na skaniyan na mu’min, na gioto dn i paganay a kakhagdama niyan ko kasorgaan iyan, na amay mambo ka kafir na gioto dn i poonan o kakhataami niyan ko masakit a siksa. Miaaloy pn ko sabdan o Rasūlullāh  a so paganay a gawii ko qobur na gioto i lbi a mapitl a zagadan o manosiya a miatay, sabap ko madadalm on a manga btad a piamakalklk, sa miatankd anan a mapnggolawla dn, ka da dn lpasa o Rasūlullāh  a kaphlindong iyan ko Allāh  phoon ko siksa ko Qobur sii ko kaposan a kaoontod iyan ko manga sambayang iyan ko da niyan pn kazalam, a pd skaniyan ko pat a linindongan o Nabi  a siran, so siksa ko qobur, go so siksa ko naraka, ago so tioba ko kaoyagoyag ago sii ko kapatay ago so fitna o bokhag a Dajjal.
Manga Oripn o Allāh, madakl a malawanda i lalag a giimaginomangaday ko kabbnar ankanan a sakratul mawt ago so kalipds iyan, a ino a tig iran a di ta khailay ko phatay ko kapliyo o napas iyan o ba pphakakisk sa matanog a karina sa karrgni ron? Aya smbag san, na so kadgam o manosiya ko kakhasakiti ron ko lawas iyan na pphakakisk so ngarai sabap sa kagia skaniyan i anggawta a pkhapoonan o sowara ago lagam ko kapakaphagaydaw, na gianan na khaolawla amay ka so masakit na sii miakatana ko salakaw a anggawta ko lawas, ogaid na amay ka so masakit na sii dn minitana ko anggawta a khapoonan o lagam na di niyan dn khagaga so kapakazowara ka kagiya ron dn miaonay so masakit, na miada dn so gaga niyan sa ba niyan pn mitawag so masakit a maggadam iyan ka kagiya skaniyan dn i kiatanaan o masakit sa di nian mapnggalbk so galbk iyan o ba makakorisk.
Kna o ba so kaada o katharo na ba karina sa kaada o kaggdama ko masakit, aya mataan na so kada o katharo na karina sa kiathamantaman o masakit a maggdam, ago so kialankap iyan ko pizasokowan o lawas o taw a phatay.
Manga Oripn o Allāh, so manga salaf a miangaoona a manga ulama, na igira miapikir iran so kapatay ago so kakhatago ko qobur, na pphakaotantang siran gomoraok sa kalk ran sankanan a darpa, sa pphamangni siran ko Allāh  sa di siran on somagad sa margn. Apiya so manga kadaandaan ko manga Mranaw na minimbayok iran so katharo iran a:
Inao na kowata na lalayon anka mikir so kakharantang i badan ka so

kalipati nka on na kadadag a mapayag.
Inimbayok o pababayok a arab a so Abul Atahiyyah a aya maana niyan ko basa Mranaw na:
Sayana si kowata a mabibimban a sonor ko pizoson a rambayong sa doniya a kaparan, sa kalilipatan iyan so galingan o karndan (kapatay) a marani pkhagiling.
Manga Oripn o Allāh, Baloya niyo so doniya a kalodan, na kowaa niyo so manga pipiya a galbk a aya niyo ron padaw ko kakhtasa on ka makalidas kano ron, gianan i ilay ron o manga barasimba a manga awlia a miangaoona. Sa kowaa niyo siran a padoman ko kiaokit on ka an kano makasarig ko ikmat iyan sa misampay kano ko Allāh  sa mapipiya so btad iyo.
Oba niyo kalilipati a so Qubur na pphananawag oman gawii sa gii niyan tharoon a sakn so darpa a piakaarimarim, a da dn a bolayoka on a mipzaromataya, sakn so darpa a malibotng, sakn so darpa o manga lowati ago manga old, sakn so pnggimpis ko taw a marata i amal sa taman sa makazowasoway so manga gosok iyan sa mangagogorapi dn.
Manga Oripn o Allāh, inisogo o Rasūlullāh  ko manga mama ko ummat iyan a kapphamisitaa iran ko manga koba sa pantag sa an iran pkhatadmi so maori a alongan, kna o ba aya kazong ko manga koba na so kambaloya on a masjid a pphamangniyan odi na pphangangarapanan ka gianan so kapanakoto a inisapar o Islam.
Pianothol o A’ishah a igira kon a alongan on o Rasūlullāh  na igira kialookan a gawii na phliyo skaniyan sa pzong ko lbnga a giya Al Baqi’ sa pzalamn iyan siran ago ipphamangni niyan siran sa kapakaslang sa maliwanag.
Adn ko miangaoona a manga ulama a sabap ko lalayon iran katatadmi ko kapatay na komakalot siran sa koba ko sold o walay ran sa adn a manga masa a phagiga siran on sa pnggdamn iran so kisisibay ko koba ka an pphakabagr so kaggdama iran ko kapatay sa gii siran makapanamar ko manga simba iran ko Allāh  sa gagawii dawndaw.
Sii sa masa ini na aya dn a lalayon na phlalakawn o taw so manga koba na kalilipatan iyan a mapita na skanian pman i babalantingn on a bankay a iplbng.
Manga Oripn o Allāh, so lalayon kapipikira o taw ko kapatay na toos sa skaniyan na miaratiaya, na so kalilipati lalayon ko kapatay na karina sa so taw na maliliwat ago di niyan katatadman so Allāh . Pitharoo Rasūlullāh  a: Khasanaan dn so kapatay a phangosiat. Skanian na phangthoma a di makaptharo, ogaid na so thoma niyan na matompis adi so dila o pangongosiat ki taw a adn a akal iyan.
Manga Oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.

وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ

إِنَّهُ هُوَ التَّوَّابُ الرَّحِيمُ

Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.


Al Khutbah 16

So Bandingan ko Sorga ago so Manga

Balas on Allāh

Ki: Alim, Hassanor Bin Maka Alapa

Al Murshid Al Am

Al Insan Islamic Assembly of the Philippines

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا, وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ , اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى يِهَدْيِهِ إِلَى يَوْمِ الدِّينِ وَبَعْدُ:
فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ:
                                           

Innalhamda lillāhi nahmaduhu wa nastaīnuhu wa nastagfiruh, wa na’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn wa ba’du:

Fayā ibādallāh, Yaqūlul Haqqu Tabāraka wa Ta’ālā fil Qur’ānil Karīm:
Innallahas tarā minal mu’minīna anfusahum bianna lahumul jannatu, yuqātilūn fī sabīlillāhi fayaqtulūna wa yuqtalūn wa’dan alayhi haqqan fit tawrāti wal injīli wal qur’ān, wa man awfā bi’ahdihi minallāhi, fastabshirū bibay’ikumulladī bāya’tum bihi, wa dālika huwal fawzul adhīm.

Manga oripn o Allāh, aya bandingan tano imanto na so ptharoon a sorga ago so madadalm on a manga balas o Allāh  ko oripn iyan a miangongonotan on ko katatago iyan ko doniya.
Giankai a sorga na skaniyan i rinayagan ago pimbolawasan o limo o Allāh  a mapmbagian o manga oripn iyan a miaratiaya on, go skaniyan i aarapn o manosiya a ron makapagingd ko oriyan o kapatay niyan.
Gankanan a sorga a babantakn tano na aya ingaran iyan ko basa Arab na so al Jannah, a aya maana niyan ko basa na so asinda a pd sa korma odi na manga pamomolan, a giankoto a basa na phoon ko galbk a Janna a aya maana niyan na somiapng, sabap sa so asinda na igira miakarimpoong so manga kayo niyan sa mamamalampak so manga sapak iyan na pkhasapngan iyan so lopa ago so matatago ko atag iyan ago pkharnding iyan so ranti o alongan oba pamantk ko sold iyan. Sabap roo na bithowan o basa arab so sorga sa Jannah.
So pman so mababantak a maana sankanan a sorga a aya tano bandingan imanto na skaniyan so ingd a so inithiakap o Allāh  ko manga oripn iyan a miamananggila ko lalangan iyan, sa balas iyan kiran ko kapiya o paratiaya iran ago so manga galbk iran a manga pipiya.
Giankanan a kasorgaan na madakl a piakanggolalan on o Qur’an a manga ingaran a pd on so: al Jannatul Ma’wā (so sorga a khadrangan) Jannatu Adn (o sorga a khatatap on so taw niyan), Dārul Khulūd (so ingd a tatap) Jannatul Firdaws (so sorga a maporo), Dārus Salām (so ingd o kalilintad), Dārul Muqāmah (so ingd a babalingan), Jannātun Na’īm (so sorga a limo) al Maqāmul Amīn (so ingd a somasarig a lomilintad).
Miaaloy ko Qur’an a so blangan iyan na so dn so blangan o manga langit ago so lopa.
Miapanothol a so Nabi  na iniiza on so darpa o naraka amay ka so sorga na aya kablang iyan na so manga langit ago so lopa? Na aya inismbag iyan na: Miasotisoti so Allāh , anda so kagagawii igira miakaoma so kadawndaw.
Manga Oripn o Allāh, gianan so sorga a aya kiniropaan on o Rasūlullāh  ko madadalm on a kamapiaan o oripn, na skaniyan so daa mata a ba on miakailay, ago daa tangila i ba on miakan’g, ago da pn mititik sa poso a manosiya.
Manga Oripn o Allāh, aya manga taw ko sorga na so taw a miaratiaya a initindg iyan so manga simba ko Allāh  ago mipharangay sa manga pipiya. Pitharoo Allāh  a:
                                           

Mataan a so Allah na piamasa niyan ko miamaratiaya so manga ginawa iran ago so manga tamok iran sa rk iran so sorga, a gii siran makithidawa sa lalan ko Allah, sa pphakabono siran (sa ridoay a kafir) ago pkhabono siran (pkhasahid siran) kapasadan rkaniyan a Allah a bnar a misosorat ko Tawrah ago so Injil ago sii ko Qur’an, na sa taw a itoman iyan so kapasadan iyan ko Allah, na kababayaan iyo so dagangan iyo a so piphasa niyo skaniyan, a gioto na skaniyan so kapagontong a mala (at Tawbah 111).
So manga limo a madadalm ko Sorga:
Iniropa o Allāh  so sorga sa mataan a so manga limo a madadalm on na tatap ago lalayon, na so kapipiya ginawa on na di dn khapos, ago langowan a madadalm on a mapiya na daa isipan iyan a tanto a madakl.
So manga lawas a ig iyan na khizosolapay, adn a manga lawas a ig on a tabang a ig, a di kharmbis, go adn a lawas a ig on a pd sa gatas a di dn khaalin so taam iyan, ago adn a lawas a ig on a arak a ragiray sa bakrng a di phakaibg, go adn a lawas a ig on a tnb a linang.
Giankoto a manga lawas a ig na pphamanoga ko kababaan o manga marigay, ago kadadalman sa pizoson a manga onga a sapad ago manga sapo a papanok.
So manga rizqi ko sorga na makapzasapowa sa manga bontal ogaid na midabida sa taam ko kapiya niyan. Pitharoo Allāh  a:
                                       

Go panothol anka ko siran oto a miamaratiaya ago minggalbk sa manga pipiya a mataan a adn a bagian iran a manga kasorgaan a pphamanoga ko kababaan iyan so manga laws a ig, a oman siran on rizkhian sa pd sa onga a sapad a pagpr na tharoon iran a giai so inirizki rkitano sa miaona, sa iniidang kiran sa makaphlagilagid sa bontal, go adn a bagian iran ko sorga a manga karoma a manga soti, ago siran ko sorga na tatap siran on sa dayon sa dayon (al Baqarah 25),
Manga Oripn o Allāh, aya manga nditarn ko sorga na manga sotra a pd sa bayobayog ago manga kakapal, na aya manga imbolawan iran on na manga bolawan ago manga montiya.
Skaniyan a sorga na iniropa sa manga bilik a so kaporoan iyan na bilik a pananagombalayin a so manga lawas a ig na pphamanoga ko kababaan iyan.
So manga taw ko sorga ago so manga karoma iran na madadalm siran sa manga sironsironga a khiddrang siran ko manga kantir. So manga karoma iran a manga bai a miamakasorga na pagadnn siran o Allāh  sa salakaw a kaadn a manga babay a da pangatatamaki a manga ngongoda i omor, ago so Allāh  na magadn sa manga midadari a manga tataid a maphamangaroma o taw a phakasorga a datar siran kon o kapoti o orak a manok a matotonkop a manga soti a di siran khaoma a haydh ago nifas, a tanto a manga pipiya i parangay ko manga karoma iran a manga mama.
So manga taw ko sorga na plowasn o Allāh  so kadnki ago so kasiig ko manga poso iran a magariari a khiddrang siran ko manga kantir. Da dn a dokaw a khisogat kiran ko sorga, ago di siran dn phakaliyo ago di siran phakaawa ko sorga sa dayon sa dayon.
Da dn a khan’g iran ko sorga a sowara a marata, aya bo a pkhan’g roo na so podipodi ko Allāh  ago so salam o manga malaikat ko miamaratiaya ago so gii ran kazasalama ago so manga pd iran a manga taw ko sorga. Pitharoo Allāh  a:
Go so manga malaikat na pphamanold kiran ko oman i pinto, sa gii ran tharoon a salam rkano sabap ko nganin a pizabar iyo. Na miakapiapiya so ingd a khabolosan a so sorga (ar Ra’d 23).
Manga Oripn o Allāh, miaaloy ko hadith a pianothol o al Bukhari ago so Muslim ago so at Tirmidi a so Nabi  na pitharo iyan a: Aya paganay a lompokan a phakasold ko sorga na makaproropaan ko bontal o olan ko kagagawii a kiambiring iyan, oriyan iyan na makatondog kiran so datar o bitoon a masigay sii ko langit ko kasindaw, a siran oto na di siran phakatiti ago di siran phakaodo, ago di siran phanoda ago di siran phakasnga sa manga langog, a aya manga salday ran na bolawan, na aya ating iran na so kastori, na aya ikhakamotan iran na so mamot a borok (al Alwah), a aya manga karoma iran na so manga midadari, sa so kiaadna kiran na datar o bontal o ama iran a Adam a nm polo hasta a kaporo iran.
Manga Oripn o Allāh, so manga limo ko sorga na maporo a di so kiropaan on o pamikiran, sa so khipropaan tano ron na matag abayabayan ko manga limo ko doniya.
Pianothol o al Bukhari a miakapoon ko Abu Hurayrah a so Nabi  na pitharo iyan a: Pitharoo Allāh  a: Inipagtad akn ko manga oripn akn a manga salih a nganin a da dn mailay a mata ago da man’g a tangila ago da mititik sa poso a manosiya (so kapiya niyan) batiaa niyo o khabayai niyo so katharoo Allāh  a:
فَلاَ تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ

Daa ginawa a ba niyan katawi so nganin a piagma kiran a pd sa limo

a iphakapiaa ginawa. (as Sajdah 17).
Da dn a plagidan o limo ko sorga ago so limo ko doniya inonta bo ko manga ngaran, ogaid na so kamamataani ron na da dn a ba iran plagidi.
Manga Oripn o Allāh, aya pithamanan a mapiya a limo ko sorga na so kailaya o oripn ko Kadnan iyan a Rabbul Alamin, ago so kipmbitiarain iyan on, ago so kakhakowaa niyan ko kasosoat iyan a Rabbul Alamin. Pitharoo Allāh  a:
وُجوُهٌ يَوْمَئِذٍ نَاضِرَةٌ , إِلَى رَبِّهَا نَاظِرَةٌ

Adn a manga paras sa alongan oto a makalalangas, a sii ko Kadnan iyan

na phagilayin iyan (al Qiyamah 22).
Miakapoon ko Suhayb a mataan a so Nabi  na pitharo iyan a: Amay ka makasold so manga taw o sorga ko sorga, na tharoon o Allāh  a: Ba adn a khabayaan iyo a shayi a ipagoman akn rkano? Na tharoon iran a: Ba nka da pakapotia so manga paras ami? Ba kami nka da pakasolda ko sorga? Ba kami nka da pakalidasa ko naraka? Na isogo o Allāh  a misayat so rnding, na daa minibgay kiran a shayi a lawan a pkhababayaan iran a ba niyan kalawani so kailaya iran ko Kadnan iran. Oriyan iyan na biatiya iyan so katharoo Allāh  a:
لِلَّذِينَ أَحْسَنُوا الْحُسْنَى وَزِيَادَة (يونس 16).

Bagian o siran oto a miphiapiya so pithamanan a mapiya (a so sorga) ago

adn a oman iyan (a so kakhailaya iran ko Allah)(Yunus 16).
Miakapoon ko Jarir Bin Abdillah a pitharo iyan a: Liangag o Rasūlullāh  so olan ko kagagawii a kiambiring iyan na pitharo iyan a: Matatankd a khailay niyo so Kadnan iyo (ko sorga) sa sandng a kailay sa datar o kapkhailaya niyo sankai a olan, sa di kano dn pzanka ko kakhailaya on, na amay ka khagaga niyo a di kano makalpas sa sambayang ko da pn kasbang o alongan ago sii ko da niyan pn kasdp na nggolawlaa niyo. Oriyan iyan na biatiya iyan so:
وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ (ق 39).

Go zambayang ka ko da pn kasbang o alongan ago sii ko da niyan pn kasdp (Qaf 39).
So pman so kailaya ko Allāh  o oripn sii ko doniya na da dn manggolawla. Piangni o Musa a mailay niyan so Kadnan iyan, na so kiaphayag o tihaya o Allāh  ko lopa na minilamps so Musa a pipinsann sa da niyan dn magaga o ba niyan mailay so Allāh .
Manga Oripn o Allāh, so sorga na ingd a tatap a di dn khada ago daa kaposan iyan, sa datar oto mambo so naraka a da dn a taman iyan sa so manga taw sankanan a dowa a darpa na tatap siran on a da dn a ba iran on kakhada sa dayon sa dayon, sa da dn a kapatay roo ago daa kadadas on.
Pd a ropaan o sorga ago so naraka a so sakataw a taw a pithamanan a maroromasay ko doniya na o saldn ko sorga sa makaisa na da dn a katadman iyan a karomasayan a kiasagadan iyan ko doniya, na so mambo so pithamanan a mindayadaya ko doniya a somiawit on na o saldn ko naraka sa sasindot on na da dn a katadman iyan a mapiya a kiasagadan iyan ko doniya, gianan i tarotop a ropaan o sorga ago so madadalm on a limo, ago so naraka ago so madadalm on a siksa ko kiniropaan on o sabdan o Rasūlullāh .
Manga Oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.

وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ

إِنَّهُ هُوَ التَّوَّابُ الرَّحِيمُ

Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.

ijk

Al Khutbah 17

So Bandingan ko Naraka ago so Manga Sikasa on o Allāh

Ki: Alim, Hassanor Bin Maka Alapa

Al Murshid Al Am

Al Insan Islamic Assembly of the Philippines

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِهِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا, وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ , اللَّهُمَّ َصَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى يِهَدْيِهِ إِلَى يَوْمِ الدِّينِ وَبَعْدُ:.