الْخُطَـبُ الْمِنْبَرِيَّـةُ so manga khutbah sa mimbar gintas I pianimo ago piagiasa I
يَا أَيُّهَا الَّذِينَ ءَامَنُوا اصْبِرُوا وَصَابِرُوا وَرَابِطُوا وَاتَّقُوا اللهَ لَعَلَّكُمْ تُفْلِحُونَ
Yüklə 3,76 Mb.
|
- Bu səhifədəki naviqasiya:
- Manga Oripn o All ā h
- Al Khutbah 44 So Kipapaliogatn ko Kaadn o Tarotop a Kapagolowan ko Oman i Phagingdan ago so Kalankapan a Muslim
- , وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ
- فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ
- قُلْ هَذِهِ سَبِيلِي أَدْعُوا إِلَى اللهِ عَلَى بَصِيرَةٍ أَنَا وَمَنِ اتَّبَعَنِي وَسُبْحَانَ اللهِ وَمَا أَنَا مِنَ الْمُشْرِكِينَ ( يوسف 108)
- ... مَنْ تَشَبَّهَ بِقَوْمٍ فَهُوَ مِنْهُمْ .
- Al Khutbah 45 So Bandingan ko Ndayagaan o Okitokit a Islam ago so Mamomondas a Okitokit sa Masa Imanto Ki: Alim, Hassanor Bin Maka Alapa
يَا أَيُّهَا الَّذِينَ ءَامَنُوا اصْبِرُوا وَصَابِرُوا وَرَابِطُوا وَاتَّقُوا اللهَ لَعَلَّكُمْ تُفْلِحُونَ ( آل عمران 200) Hay so miamaratiaya zabar kano ago zasabara kano, ago pagipat kano ko manga pagilid o ingd, ago kalkn iyo so Allah ka an kano makadaag (Ali Imran 200).
Gianan so katharoo Rasūlulālh a: Langon kano na pphagipat ago langon kano na pagizaan ko pphagipatn iyan, so dato na pphagipat na ipagiza on so pphagipatn iyan, so mama na pphagipat na ipagiza on so pamiliya niyan a pphagipatn iyan, so oripn na pphagipat ko tamok o dato iyan sa ipagiza on so pphagipatn iyan, langon kano dn pphagipat ago langon kano pagizaan ko pphagipatn iyo. Manga Oripn o Allāh, amay ka matonay anan o dato sii ko pagtaw niyan, na kabnar iyan kiran mambo so kaonoti ran ko manga pandoan iyan sa di kiran khapakay so kasopaka on, ka khabaloy siran a somosopak amay ka di siran mangongonotan ko parinta niyan. Giankaya a manga pakayan ago romasay o dato a Muslim, na kiamataanan ko kiandato o manga Khulafa ur Rashidin a pat kataw, sa lominintad so doniya ago kiasawitan iyan so kalilintad ago so kapakasasarig ko kiandato iran, na sii ko kiada o gii ron kinggolalann o manga olowan, gowani a magalin sa btad so kadato a Islam, sa miapokas ko thito a lalan iyan, na miasagala so kapphagingd o manga Muslim, ago somiagad siran sa awlan ago sansara a kapphagintaw, sa mianinggaposan so btad iran ko kiada o kadato a Islam ko liawaw o lopa, sa imanto a masa na gopn giipagnaw so manga Muslim ko gii ran kapanagontaman sa kapakandod o kadato a miadadas, a rarad oto o kiaawat iran ko ndaowan o Islam, sa miakalobay kiran so katao niyan a aya onayan o paratiaya niyan, sa miaprabay siran o ridoay ran sa taman imanto na gii ran mapagintos so baso o kapakadadapanas sa di tano katawan i kathay a kaphagintosa tano ron?!. Manga Oripn o Allāh, gianan i sapankat a miazabanding tano sankai a khutbah a pagarapn ami ko Allāh a Mahasuti a Maporo a adn a miasabot tano ron a miapadalm ko poso tano a khabaloy a balotoan tano ko gii tano kanggalbka ko kaptharagomabalaya tano pharoman ko parinta Islamiyyah ko manga ingd tano ko oriyan o kiapadalm iyan ko manga poso’ tano. Manga Oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya. وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ إِنَّهُ هُوَ التَّوَّابُ الرَّحِيمُ Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.
Al Khutbah 44 So Kipapaliogatn ko Kaadn o Tarotop a Kapagolowan ko Oman i Phagingdan ago so Kalankapan a Muslim Ki: Alim, Hassanor Bin Maka Alapa Al Murshid Al Am Al Insan Islamic Assembly of the Philippines إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا, وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ , اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى يِهَدْيِهِ إِلَى يَوْمِ الدِّينِ وَبَعْدُ: فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ: قُلْ هَذِهِ سَبِيلِي أَدْعُوا إِلَى اللهِ عَلَى بَصِيرَةٍ أَنَا وَمَنِ اتَّبَعَنِي وَسُبْحَانَ اللهِ وَمَا أَنَا مِنَ الْمُشْرِكِينَ (يوسف 108) Innalhamda lillāhi nahmaduhu wa nastaīnuhu wa nastagfiruh, wa na’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn wa ba’du: Fayā ibādallāhi, Yaqūlul Haqqu Tabāraka wa Ta’ālā fil Qur’ānil Karīm: Qul hādīhī sabīlī ad’ū ilallāhi alā basīratin ana wa mani taba’anī wa subhānallāhi wa mā ana minal mushrikīn (Yusuf 108). Manga Oripn o Allāh, So Oriyan o bantog ko Kadnan tano a Rabbul Alamin ago so pangni tano sa kapakaslang ko pangolo tano a Mohammad ago so manga tonganay niyan, so manga sahabah niyan, ago so langowan a mionot ko panolon iyan, na omiog so Allāh , na pzabandingn tano pman ankai a bandingan a marani a kisasaginda niyan ko miangaoona a manga bandingan a pimbitiara niyan so kaphagingd a Islam ago so kapakamoayan o parinta a Islam ko ingd o manga Muslim, lalayon so kaphagaloya tano sii ka so kabasa tano a pala phn ka marinaw na ba amay ka zlgan a daa paro a rimbar na daa sorot a iman. Manga limo ini o Allāh a gii tano pn makazambisambi sa manga katigan ko agama, na adn dn a khaoma a masa a di tano dn makaphlalapoya sa manga pamikiran ka so dn so mambbtad na di niyan ppharon so datar oto a masa. Manga Oripn o Allāh, madakl dn ko manga Muslim sa doniya imanto a gii ran mambo pamagompongan ankai a bandingan tano sa kapmbtad sa manga roaroan ago pandapat ko kapkhaadn o bagr ko manga Muslim, sa kapakandod o miada a andisan ago makambalingan so lomiawd a mnang o manga Muslim. Giankanan a manga pamikiran na inirampay pn sa miandirogod ko manga ala a Pompongan a Paganadan a Islam (Islamic Universities) sii sa doniya, sa adn a manga pangilay (research) a minidakat ko gii san kapamimikirana o andamanaya i kapakaadn sa olowan a mapiya sii ko ingd o manga Muslim sii sa doniya. Isa a pangilay a matolangd a miakambowat ko datar anan na miaadn sa galbk o isa a morit a si Salah Jabir a aya niyan bialoy a Thesis iyan ko Masteral Degree niyan sa Islamic University, sa al Madinah al Munawwarah, a giankoto a kitab iyan na bithowan iyan sa: So Lalan ko Kapakamoayan o Ompongan o Manga Muslim. Sa kiabgan ankoto a kitab sa daradat a maporo (Excellent) ogaid na da niyan masamporna ko Doctoral iyan na miasinggawt dn o phanphd ko kapipiya ginawa (Malak al Mawt) so niawa niyan sa miawafat. Isa a inibagay niyan a Manhaj ko oriyan o kiatankda niyan on sa patoray dn so kaadn o kapagolowan o manga Muslim ko oman i piagingdingdan iran sa doniya, na so kapagokit ko kaphagisaisa o manga lompokan o manga Muslim a makamomoayan ko pat a pidoro o doniya, sa oman i lompokan odi na kaphagingd a Muslim, na tomoro siran sa olowan iran ko darpa iran, na giankoto a manga olowan ko oman i lompokan na siran pman i pthimotimo sa khabaloy siran a akila o pagtaw iran, sa datar o ba iran khitindg so tindg o ahl al Halli wal Aqd odi na ahl as Shura o manga Muslim, sa amay ka matimo siran na tomoro siran a phoon ko ginawa iran sa olowan a aya pagonotan so lalag iyan sankoto a ingd a katatagoan kiran, na giya pman ankoto a manga olowan ko oman i ingd a mala o manga Muslim a so 57 a pmbthowan sa Muslim Countries a somisirong ko (OIC) na thoro siran pman sa olowan iran a sakataw a mama a skaniyan i khabaloy a Khalifah o manga Muslim sii sa doniya. Giankanan a okit i malbod a lalan ko kakhaadn o bagr o manga Muslim sabap ko adn dn a manga taw a makamomoayan a somisirong siran ko manga opakat odi na manga lompokan iran a madakl sii sa doniya. Sii ko kamataani san na inidakat ankoto a somiorat so langowan a manga ala a opakat sii sa doniya a datar o al Ikhwan al Muslimun sa Misir, so Jamaah Islamiyyah sa Pakistan, so opakt sii sa Sudan ago sii sa Jordan, so Jamaah Tablig sa India ago Pakistan, sa kinilang iyan so manga paratobowan ankai a manga opakat ago so manga antap iran ko Da’wah, sa biagr iyan a giankai a manga opakat a Islam na amay ka makazisinabota siran na khaadn a bagr a mala a kharndaan o manga Muslim, ago kaphagdaan iran ko kisampay ran ko simalaw a aantapan iran. Manga Oripn o Allāh, so sii ron sa Ingd a Ranaw na datar dn anan a makamomoayan so manga opakat a Islam a tanto a madakl a bilangan iran, ago kiatpngan so kianggalbka ko kaisaisa o antap na miagdam a malbod so kaphakaadn sa bagr ka tomatarima so kalankapan a pagtaw aya mataan na aya midadalong na so kaadn o Bagr a kapagolowan, sa taman imanto na da tano pn makatoon sa olowan a iprapas iyan so kamapiyaan o pagtaw a Muslim sa khorbann iyan so kamapiaan iyan a kaatawi sa pantag sa kiapas o simalaw. Ogaid na giankai a gii tano ron kambasisaa sankai a manga Khutbah tano na manga tphali ini ago todaw a mapiya a pkhasabapan sa kapkhaadn o manga pamikiran ago manga tindg a aya khaonga iyan na khatimo iyan so makaphlagilagid on sa pamikiran ago paratiaya na andai katimo iran na miaadn so kaokhaog a maito a khapakay a aya dn mabaloy a todaw a phoonan a makasayan sa tmos a magombos na mrangiran sa taman sa mamalampak so sapak iyan ko oriyan o kiapakabagr o kayo niyan sa kasirongan o pagtaw so along iyan sa pkhaori a gawii omiog so Allāh. Aya man a pithamanan a mabagr a ipkhalk o manga barasola sa maydan a lawan sa kabagr o sondaro na so kaadn o pamikiran a mapiya (Idea) a makasasaibarat sa oniin a mapiya ago phoon iyan matoon so masibokar a lopa na magiog magnda ta na magtho ago mrangiran sa khabidang ko kalopaan o doniya. Manga Oripn o Allāh, giankai a btad o Muslim imanto ko apiya ada a darpa ko doniya na makathatalogdam sa aya dn a kabaya iyan na maadn odi na kaphoonan antaa ka mitaros so lalakaw ko kazalimbtad o pagtaw a Muslim, giankaya a pagtaw na da pn sampayin ko pankat a kidaplak, ka matatago on pn so bagr ago so panamar antaa ka kabaya sa kazowaka niyan ko rgs o manga masa a kapapantagan a pkhaanod iyan so pagtaw san ko dagdban iyan a madalm amay ka di mabalak a sowak a mabagr. Pd a mapangingindaw ankai a masa na so kapakala o sabot o manga Muslim ko katao ko Islam ago so btad ankai a doniya, sa kabagowan so andang a sabot a matatago ko pizakatawan, sa andai malo anan kiporo na phakatonay sa kapkhabkhs o manga tindg ago so manga pamikiran sa kazakat ko lalakaw sa pantag sa kazalimbtad ko ingd o manga Muslim na lalan bo na giya ingd a Ranaw. Manga Oripn o Allāh, isa a babantakn tano a patoray a makaadn sa kaokhaog a kapagolowan na so manga masjid o manga Muslim, sabap sa zasan so manga Muslim a manga baratapa sa amal a siran i pangindaw a paganay a magawid ko romasay, sa so masjid na amay ka matoman iyan so romasay niyan ko pagtaw sa gii ron kanggonanaowa na magaan a kakhaadn o bagr, sa so masjid na aya mamaapaar on na so Imam, sa patoray a so manga Imam na maadn kiran so pakayan ko kapagolowan ka so kababaloy ran a lowan siran ko sambayang na gioto dn i paganay a pakayan ko kakhabaloy ran a olowan sii ko manga taw a matatago sa atastanggongan iran, sa so jama ko masjid na gioto i paganay a babasoka a phamolaan ko mapiya a oniin sa kapakatho iyan ko pizakatawan a Muslim sankoto a darpa. Ika dowa na so manga paganadan a Islam (Madrasah) ago so paganadan a English (School) na isa nan a romiritan sa manga kangodaan a patot a maadn kiran so sinanad ko kazalimbtad, ka so manga kangodaan na di khataradiwag so mababaloy a sangan iran ko kaphagingd sa patot dn a mabarasa siran ko manga galbk a kapagolowan sii ko Islam. Giankaya a kaokhaog sa kapakaadn sa kapagolowan na paliogat a palaya dn makambong a lalag so pizasokowan (sector) o kaphagingd o manga Muslim, sa palaya siran makasabot ko antap a mapiya sii ko galbk a kaiislami, so manga padagang ko kiazosonan o manga galbk iran na isa siran ka sangan sii sankanan a manga galbk o Islam. So manga taribasok, na datar oto a khabgan siran mambo sa sangan a mala sankai a galbk, a domadait ko manga btad iran, ka an iran mitoman so sangan iran a odi ran manggalbk na daa ba on phakasangan ko manga taw. So manga impliado ko parinta ago sii ko manga pangadapan (offices) a mattndo na adn mambo a masasangan iran ko romasay a mala sa kapakamoayan o kapagolowan a kaiislami sii sa Ranaw. So manga bai na isa siran ka sangan a adn mambo a khitindg iran a manga romasay ko kapakamoayan ankanan a antap ko kapagadn sa kapagoloan. So manga bai na mala a kipantag iran ko kaphagingd ago madakl so bilangan iran a di so bilangan o manga mama, sa so sangan iran na di mipndaraynon. Giankaya a kanggalbk sa kazalimbtad na margn ago mapitl a galbk a palaya on dn kharambit so pizasokowan o katitimo, sa odi anan maadn na margn ago malombat so rarad o panagontaman, amay pman ka makarabray anan ko pagtaw na khaadn iyan so ptharoon a Pamikiran a Lankap (Public Openion) a gianan i khasabapan ko kapkhaalin o btad o katitimo o pagtaw, sa giankaya a romasay na pd dn ko margn a pnggalbkn o manga Muslim sa masa ini. Manga Oripn o Allāh, so Rasūlullāh ko paganay a kiapanolon iyan sa Makkah, na palaya iyan dn kiambong a lalag so pizoson a pagtaw sa da niyan pamamiliin so panolon iyan ko manga taw a manga barabangnsaan odi na manga kawasa antaa ka manga ala i pankatan ko kaphagingd ogaid na palaya iyan dn kiambong a lalag so pagtaw niyan, minsan pn mbidabida a kiatarima o manga taw ko panolon, ogaid na daa miasibak ko manga taw sa ba da makambong a lalag. Na giankaya a kazalinbtad na galbk o manga nabi, na kiapangwarisan o manga Ulama sankai a masa a kapapantagan, sa so romasay ko kapnggalbka on na sii kiran misasanggolay sa mimbaloy a atastanggongan a mapnd a pagawidan. Mapokas kiran na sii pman ko manga Muslim a miamakasowa sa katao sankai a doniya a matatago kiran so sambatan ko Islam sa miphagpda iran so manga Ulama ko kaphromasay sankai a galbk, sa khaosar iran mambo so katao a matatago kiran sa kagaan a kisonggod o lalakaw ko kazalinbtad o pagtaw. Sii sankanan a pankat a galbk na mipthabanga so manga kawasa a Muslim, ka kalalayaman a so manga Ulama ago so manga Professional na di siran manga kawasa sa barandiya a tamok, na so manga kawasa na sangan iran so kapnggastowi ko sabaad a manga galbk a mangingin-daw sa tamok, sa datar o pinggolawla o manga kawasa ko manga sahabah o Rasūlullāh ko kiasapidawa iran ko romasay o panolon. Pitharoo Allāh a: قُلْ هَذِهِ سَبِيلِي أَدْعُوا إِلَى اللهِ عَلَى بَصِيرَةٍ أَنَا وَمَنِ اتَّبَعَنِي وَسُبْحَانَ اللهِ وَمَا أَنَا مِنَ الْمُشْرِكِينَ (يوسف 108) Tharoanka (hay Mohammad) a katii so lalan akn sa ipndolon akn so Allah sa nggolaln sa tanda a marayag, sakn ago sa taw a inonotan ako niyan, miasotisoti so Allah ago kna ako o ba pd ko manga pananakoto (Yusuf 108). Sa giankai a mala a galbk na aya dn a khasanaan a gakot a phakabkhs ko manga taw a pnggalbk ko kiazosonan o lompokan iran na so kabagr o paratiaya iran ko Allāh , ago so kala o kasigi ran sa kapakambaal iran sa kamapiyaan ko pkaori a masa a maapd siran ko manga taw a paganay ron anggka sa indakat o thotol a siran so manga taw a miangaroromasay ko mala a galbk ko Islam, sa paratiaya iran ko sogoan o Kadnan iran. So pman so okit a kapphagingd o manga Muslim ko kadaklan ko manga ingd ago sii ko manga Muslim a kainotan (muslim minorities) na aya dn a mangongondatoon na so adat a kalalayaman a adat a phoon sa Sdpan, sii ko kandiditaran, manga goagoay, kandodolona, na palaya dn kasasaraban, sa bnar dn so katharoo o Nabi a: ... مَنْ تَشَبَّهَ بِقَوْمٍ فَهُوَ مِنْهُمْ. Sa taw a mananayan sa isa a qawm na skaniyan na pd kiran. Giankaya a Muslim a kapapantagan imanto na so kalaan on na kiaamotan dn ankaya a adat a sarowang, balabaw ron so manga kangodaan, sa mimbaloy so agama iran a sii bo ko manga sisimpit a kotika ko gii ran kazambayang, na maipos oto na komasoy siran pman ko btad iran ago so kandiditaran iran a datar dn o manga taw a kna o ba manga Muslim, sii sa Indonesia ago sa Malaysia na kiasandngan akn on ankaya a manga btad, a kadaklan ko manga babay a giinggagalbk ko manga ala a tinda odi na sii ko manga pangadapan, na ndiditar siran sa datar siran bo o talandiyang ka di makasasapng so nditarn iran, na amay ka maoma so waqto a kapzambayang na somong siran ko giizambayagan na solotn iran so mukna iran na zambayang siran, na maipos oto na lowasn iran so mukna sa komasoy siran ko manga galbkan iran sa datar siran pman o tiggalawas, sa piakammsa oto a btad, a aya bo a kapkhapikira iran sa Muslim siran na sii bo ko masimpit a kotika a di ka 20 ka minotos. Giankai a pagtaw a ndadatarai na daa a panginam sa ba iran maoyag so Islam ko thito a bontal iyan, ago di ran matharagombalay so kaphagingd a mapiya, sa o izaan ka kiran o ino to na aya smbag iran na so kiaprarad ko adat a kalalayaman a aya iran pphagintawan. Taman sa di makaadn so Muslim sa taong iyan ago paratobowan iyan a kibida iyan ko pagtaw a kafir sa rarad o paratiaya niyan ko Allāh ago so kala o sabot iyan ko Islam, na margn o ba adn a mapakatindg iyan a kaphagingd iyan a Islam ko liawaw o lopa, sa giankai a btad na tanto a makapagiino sa kazalinbtad a mabagr a khaadn ko pagtaw, sa paliogat ko manga taw a Muslim a adn a matatago on a in’nka sankai a btad a makaogop siran ko kapnggalbka ko kazalinbtad o Muslim, mlagid saya so Ulama ago so miamakasowa sa katao a palaya siran san kapapatorayan. Manga Oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya. وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ إِنَّهُ هُوَ التَّوَّابُ الرَّحِيمُ Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.
Al Khutbah 45 So Bandingan ko Ndayagaan o Okitokit a Islam ago so Mamomondas a Okitokit sa Masa Imanto Ki: Alim, Hassanor Bin Maka Alapa Al Murshid Al Am Al Insan Islamic Assembly of the Philippines إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا, وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ , اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى يِهَدْيِهِ إِلَى يَوْمِ الدِّينِ وَبَعْدُ: فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ: الَّذِينَ إِنْ مَكَنَّاهُمْ فِي الأَرْضِ أَقَامُوا الصَّلاَةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنْكَرِ وَلِلَّهِ عَاقِبَةُ الأُمُورِ (الحج 41) Innalhamda lillāhi nahmaduhu wa nastaīnuhu wa nastagfiruh, wa na’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn wa ba’du: Fayā ibādallāh, Yaqūlul Haqqu Tabāraka wa Ta’ālā fil Qur’ānil Karīm: Alladīna in makannāhum fil ardhi aqāmus salāta wa atawuz zakāta wa amarū bil ma’rūfi wa nahawū anil munkari wa lillāhi āqibatul umūr (al Hajj 41). Manga Oripn o Allāh, Bantogn tano so Allāh ago phodipodin tano skaniyan ka skaniyan bo i patot a phmaslaan ka rk iyan so kabnar ko kiapangadn ago so kasisiapa on sa miakhabnar iyan so kasimbaa on ka skaniyan niyan i miangadn na patot ko inadn a masimba niyan so miadn on. Ipangni tano sa kapipiya ginawa ago kapakaslang so nabi tano a Mohammad ago so manga tonganay niyan ago so manga sahabah niyan na romabray ko langowan a Muslim. Manga Oripn o Allāh, Giankai a bandingan na giai so giikapakandayagaa ko okitokit a Islam ko kapphagintaw ago so okitokit a kalalayaman a mamomondas sankai a masa imanto a kapapantagan, o ilaya tano so manga Muslim ko kapphagintaw iran na madakl a khailay tano a warna a pizoson ko bontal o kapphagingd iran, malagid so sii ron ko manga ingd a Muslim a siran i makakakapt ko parinta on, antaa ka sii ko manga Muslim a mipananagi ko manga ingd a kna a Muslim (Muslim Minorities), sa giankanan a manga Muslim a mipananagi a maito i bilangan na madodowa pn soko so bontal iran, paganay ron na so Muslim a maito i bilangan a mababaling ko ingd a siran indadakl on a di so manga taw a kna a Muslim, gianan so manga Muslim a pakaasal a rk iran so ingd ogaid na kiapangondatoan siran o parinta a salakaw sa tgl kiran. Ika dowa na so Muslim a mipananagi a mialing ko manga igd a kna a Islam ago kana o ba siran on asal a pphagingd, ka ba siran on dn mianagi ogaid na miakaadn siran on sa katitimo a maggdam iran on a adn a kaphagingd iran a gii ran on manggalbk so agama iran. Manga Oripn o Allāh, so manga Muslim a matatago siran ko ingd iran a makambibisa ogaid na daa parinta iran a Islam a aya giindato, na aya btad iran, na datar siran bo o maaagaw o isa ka pndato sabap sa so parinta a giimangondato na parinta a kna a Islam a giai i btad o manga ingd a Muslim sa doniya a manga 57 a kadakl iyan a ingd iran a gianan so pthawagn a manga ingd a somisirong ko opakat a Islamic Conference. Giankaya a manga ingd na mbidabida so bontal o kapphagingd iran adn oto a so pagtaw na mala a kamamaradika iyan ko kipphagintawn iyan ko Islam, ogaid na daa kapaar iyan ko kanggoverno ka adn oto a so kadato na igagakd a isa ka loks ko manga Muslim sa siran bo, ogaid na ipkhokom iran ko pagtaw so Islam, ka an iran mabaloy a okit a mabagr ko kipapaarn iran ko pagtaw, ogaid na lomiliyo siran sankoto a kokoman a ipkhokom ko kalankapan a pagtaw sa di siran khailatan o kitab ago di siran khaizaan ka maporo siran a di so kitab, a gianan i mapayag a makikilala a kandato a malakiyyah (kingdom). Adn pman a manga ingd a Muslim a aya dn a miangondato on na so kandato a Democrasiya ko atoran iyan a Barlaman (parleamentary) a datar a Misir, Pakistan, Iraq, Malaysia, Indonesia ago so manga pd a Ingd, sa giankai a manga ingd na aya bo a kandadatoan on o Sharia Islamiyyah na so pinakamasimpit ko blangan o kaoyagoyag, a so bo so kapangaroma, kathanan, kapangwaris (Code of Muslim Personal Laws) ogaid na so salakaw ron a manga kitab na palaya dn kinowa ko kitab o manosiya, so manga taw sankai a manga ingd na aya bo a kaggdama sa mabagr kiran so kaiislami kiran na so katatago o paratiaya ko pizakatawan a Muslim, sabap ko panamar o manga Ulama a giimanolon ko Islam, ago so manga kawasa ago so adn a manga kadato iyan a matatago on so paratiaya ko Islam, so pman so parinta na daa mala a awid a akal iyan ko Islam, mapiya pn adn a mattndo a pangadapan ko parinta a datar o Ministry of Awqaf ogaid na daa pamirak iyan ka maito a ipmbgay ron a omon o parinta sa aya bo a sasanaan iyan na so sadqah o manga kawasa, sa di igagatang o parinta o ba niyan pakakhawasaa ankai a pangadapan, ka katawan iyan a so kapakabagr iyan na phakaantior ko kadato iyan sa akira gawii. Yüklə 3,76 Mb. Dostları ilə paylaş:
|