الْخُطَـبُ الْمِنْبَرِيَّـةُ so manga khutbah sa mimbar gintas I pianimo ago piagiasa I

Manga Oripn o Allāh, amay ka imolngan ankaya a btad o manga Muslim, na tanto a mawatan so sabot iran sii ko thito a ongangn o Islam ko kaphagingd, sabap sa so Islam, na okitokit a tarotop a miakanggaganapa a matitiman a rarankomn iyan so agama ago so parinta sa pakaiisaisaan iyan. So Islam na kaphagingd a tarotop a daa ibabagak iyan ko balangan o kibabatog o manosiya, sa so kandato ago so kapagagama na maiisaisa dn.
Sa giankai a kaphagind a datarai na da dn kamataani inonta bo ko kiandato a pat kataw a Khalifah ko oriyan o Rasulullah . Sa giankaya a kaphagingd na gianan i atastanggongan o manga Muslim sa masa ini imanto a mapakamoayan iran sii ko kaoyagoyag iran, sa makapagintaw siran ko thito a kapagintaw a Islam, sa maadn so katitimo o sagorompong a Muslim, a adn a makamomoayan on a manga taw a siran i komokompas ko btad o kaphagingd a siran so Ahl as Shura, odi na ahl al halli wa al Aqd, a sii kiran phakapoon so olowan a pagonotan o manga Muslim, ko ingd a katatagoan kiran.
Imanto a masa na makamomoayan so pagtaw a Islam, go makamomoayan so lopa a kawali o Islam, aya bo a migagadong a maada na so parinta o Islam a phakapoon sankanan a sagorompong a Akila o pagtaw a gianan i madadadas sankai a masa, sabap sa so pagtaw a Islam, na kominowa sa atoran a kadato a salakaw ko Islam, a odi kadato a Malakiyyah (kingdom) na kadato a Democrasya ko kiazosonan iyan odi, na kadato a Semi-communism, sa da dn a khatoon a ba on mianagotiap ko kadato a Islam, a so pagtaw na ithoro iran so akila iran na so akila na aya thoro ko olowan a Pagonotan o manga Muslim.
Sii ko kadakl o manga kalilimod a miangaaadn ago so manga opakat a kaiislami a piamakatindg na aya dn a bantak iran na so kapnggalbk sa kapakandod o kaphagingd a Islam, ogaid na mbidabida so okit a itotolad iran, adn oto a aya kinowa niyan a okit na so kapamantiari sa ibabagak iyan so sabala a katampar o Islam, adn pman a aya bo a siangan iyan na so kapphakabagra ko paratiaya ko kasaromag iyan ko Aqidah, na ibabagak iyan so kandoniya a barandiya, adn pman a aya bo a siangan iyan na so kandoniya sa ibabagak iyan so kaniniawai ko Islam, sa tanto dn a madakl a manga opakat a palaya zasagintas a sasangann iyan ko Islam.
Na o ilaya a manga opakat aya na daa ibbtad iran a manga tamana a manga masa a andai kaoma niyan na miapasad so sapankat a pnggalbkn iyan ko Islam, sa zakat pman ko pankat a ika dowa, so sabagi a pnggiraw a daan a pakabagrn so paratiaya na go bo so kaphagingd a Islam na o izaan kiran i kathay a kaphakabgra iran ko paratiaya na di ran katawan o pira ragon, adiadi o pitharo iran a ragon sa manggayi ka adn a miatndo a masa niyan, sa gianan na tindg a di makaphapasod ko okit a mapiya a kanggalbk a itotolad o Islam, gioto i sabap a pkhaipos dn so poloan a manga ragon na pmbongawn dn so mangoda na giikhasad so ikaririga na da dn a kakhasalin o btad, sa o nayawa ankanan a antap iran na taman sa bankit na di dn makatindg so kaphagingd a Islam.
Adn pman a salakaw a opakat a pakandodorogn iyan so dowa a papak o Islam sa marani ko kiniokitn on o Rasulullah  ogaid na sii ko kiapakaadn iyan sa bagr na minisogat on so waraan o manosiya, a kalawan sa thipho na miapatingoda niyan so onga o galbk iyan na miakaadn sa mabagr a garobat o ridoay na da niyan magaga so ronda niyan na minitalas so kota iyan, sa miakalombat so panagontaman iyan.
Tanto a mapiya a kabatiyaa ko kitab i Dr. Yusuf al Qaradhawi a bithowan iyan sa (Ayna al Khalal - Anda Mabibinasa?) A pindiorobasaan akn sa basa Mranaw ka an lankap so gona niyan a giankaya a kitab na minsan pn mapontok ogaid na piamagosay niyan so sabap a kiaola o manga galbk a kaiislami sa da niyan kisampay ko apta a babantakn iyan, ago inibagay niyan so okit a lalan a aya pagokitan sa kisampay ko simalaw.
Manga Oripn o Allāh, giankaya a Islam a inipanolon o Rasulullah  ko manga manosiya na so kapagndod o kadato iyan ago so kaphagingd iyan a parinta na sii misasankot ko panagontaman o manga Muslim, ka kagiya gianan i piakanggolalan o Allāh  a kabaya iyan a izana niyan sankai a pagtaw so kapnggalbka on, sa titikayan iyan a Allāh , sa so kapnggalbk o Muslim na paliogat a isonkad iyan ko kiniokitn on o Rasulullah  sa khaadn so sagorompong a magawid on, sa pnggalbkn iran sa tarotop sii ko manga ginawa iran ago iphanolon iran ko manga taw a makalilibt kiran, sa tharimaan iran a gioto dn i okitokit iran sa da dn a tharimaan iran a okitokit a salakaw ron.
Anda dn i kapakamoayan ankanan a sagorompong a maaasa iyan so langowan a pakayan a katao ago paratiaya ko Islam, na magiog magnda so doniya na phakamoayan ago magndod so Islam sa datar o kiapangondato iyan sa paganay sa pmaradikaan iyan so doniya ko rarad o jahiliyyah a kapapantagan a mabagr a di so jahiliyyah a paganay ko masa o Rasulullah .
Ogaid na so jahiliyyah imanto na jahiliyyah a sagintas a kna o ba datar o jahiliyyah a paganay a lankap dn ko doniya sabap sa di pn makamomoayan so Islam sa masa oto, na so kiasogoa ko Rasulullah  na miaponas so jahiliyyah a lankap ogaid na adn a malalamba a jahiliyyah a sagintas a tanto a mabagr i sandiyata ago ronda, ka kagiya aya phagosarn iyan a bagr na bagr a katao ago barandiya.
Giankaya a Muslim imanto a makamomoayan a somiobra sa isa ka billion a kadakl iyan na miaopakat so shaytan a manosiya ago so parinta niyan sa di dn aya khagaga o ba iran awai so agama iran, sa ba siran khafir odi na ba iran tarimaa a so salakaw ko Allāh  na aya tuhan, ogaid na so Iblis, na inikasoat iyan a kaonoti ron o Muslim ko sabaad a manga galbk iyan mapiya pn di niyan mabaloy a kafir, gioto so piakalankap Rasulullah  gowani a mataban iyan a Makkah, a inisogo iyan ko Ali Bin Abi Talib ago so Khalid Bin al Walid a paminasaan iran so manga barahala o manga Arab sa panotongn iran ago proroptn iran, na so kiada o barahala a pzimbaan o manga Arab na pitharo iyan a: Da dn a khaadn a al Uzza ko oriyan o kiapagombasay o barahala a al Uzza o manga Arab sa di dn anan khasimba pharoman, ogaid a tig iyan na inikasoat dn o Shaytan a kaonoti ron o Muslim ko sabaad a galbk iyan a marata.
Manga Oripn o Allāh, so manga ridoay o Islam a manga ala a parinta sa doniya na piamimikiran iran i kabinasaa iran ko Islam ago so manga Muslim, sa pinggonanao siran o manga shaytan a manosiya ko Sbangan ago so Sdpan, na miatoon iran so mabagr a okit a kakhabinasaa iran ko Muslim, sa kitii so inokitan iran, miatoon iran a so Islam na agama a makatitindg ko kapaginontolan, maana a sii kakadn sa lmbak ko langowan a btad iyan, na anda dn i kada ankayaa Islam ko kababaloy niyan a zosokod sa lmbak na khaadn so kabinasa sii rkaniyan, na so Muslim a komkpit on na datar oto a anda dn i kaawa iyan sankoto a darpa a kazosokod na khaadn on so kaantiyor ago so kabinasa, sabap roo na san iran inokiti so manga Muslim ago so Islam, sa pianamaran iran a mapokas so Islam ago so Muslim ko kababaloy niyan a komakadn sa lmbak a zosokod, sa dowa a lalan anan, paganay ron na so Islam ago so Muslim na patoray a di isampay ko goris a lmbak sa ba makazokod ka phakaadn sa bagr, a di kharn, sa inadn iran san so langowan a pangalang, na amay ka di siran magaga sa makalampas ka phakaoma ko goris a lmbak na panamaran iran a makalampas on sa di ron makatarg, ka an maadn so kabinasa sa di niyan dn maoyag so bagr iyan.
Misabap san na pinggalbk o manga parinta a ridoay o Islam ago so manga lompokan iran a kaoyati ko manga Muslim sa ibolog siran ko gii ran kapagagama ka kagiya di siran khasaparan o ba iran gnkn mapiya pn inipamatay ran, sa aya okitan na pakasobraan odi na di tarotopn, gioto i sabap a so kiapakaoma a Britania sii sa India, na ininggolalan iran ankanan a pamikiran, sa tiabangan iran so sabaad a manga Muslim roo sa piangoyatan iran ko kanggalbk iran ko agama Islam, ogaid na piakalawan iran taman sa so isa a opakat roo o manga Muslim na miagaga iran a kapakalampas iyan ko tamana o Islam, sa piakalankap o olowan iran a skaniyan na nabi a phagwahiyan, sa miaadn so Qadianism, a aya asal oto na Islam ogaid na minibolog sa tarotoyan ko kiapakala o panabang a ipmbagay ron sa masoln o parinta a jahiliyyah a shaytan a manosiya.
So pman so sabaad a manga Muslim sa India, na inogopan iran mambo sa masoln ogaid na di ran pakatatarotopn sa aya bo a gii ran manggalbk na so sabala a galbk o Islam sa ibabagak iran so sabagi on, ka an dn a matatap a datar o papanok a sasabala i papak, na katawan tano a so kawang na di mritan sa papanok a sasabala i papak.
Katawan imanto sa doniya, a o pnggalbk ka sa Islam, a sobo so paratiaya ko Allāh  i pnggalbkn ka sa ipipilak ka so sabala a katampar a so kapakatindg o parinta ko lopa a so pitharagombalay o Rasulullah  sii sa Madinah, na langowan a parinta a jahiliyyah sa doniya na phakabolosn iran ankanan a galbk ago pagogopan iran pn ka kagiya ppkaogop kiran ko kapnggarobata iran ko Islam ago so manga Muslim, sa di ran dn matoon so okit a kakhaadn o bagr, a gioto so phagosayin tano a so kakadn sa zokodan.
Na so mambo so sabaad a Muslim a daa bbntl iran ko masosowa na gii ran tharoon a giankai a galbk tano a kaiislami na tatawfiqan o Allāh  ka tarosan ko doniya a apiya anda zong ko kapnda’wah niyan na pphakalawang, ka kagiya so dn so Allāh  i giikhakandiri sa kapkhatrang o manga parintaa soranga sa kapphakasold ankaya a manga Muslim a giimanolon ko Islam. Allahu Akbar, Lomindong tano ko Allāh  o ba tano mabaloy a Muslim a datar anan a aya bo a pzabotn iyan na so kasasandngan o mata niyan na di niyan katawan so galbk sa masoln o ridoay ko kapmbinasaa on.
Amay pman ka adn a lompokan a matotoon iyan so thito a lalan sa kakhaadn o bagr na pagosaran iran sa langowan a bagr sa kabinasa niyan, sa di dn makamoayan, sa gianan dn i mambbtad sa masa ini. So mambo so Muslim a korang i sabot na aya panolon iran na ino tano pzibay a so parinta a katatagoan rki tano na kna o ba iran rkitano pzaparn so agama Islam, kagiya giankoto a manga taw na aya bo a katawan iran ko Islam na kazambayang, kaphowasa kanayk, na gioto i gii ran on katharoa sa so parinta a jahiliyyah na di niyan isasapar so Islam.
Manga Oripn o Allāh, giai i manga pagns a patot a katokawan o langowan a Muslim, sa diai khasabot o di kaosari sa mala a batiya ago pangokay ko katao, ka so manga ridoay tano na aya phagosarn iran a ipnggba iran ko Islam na so katao a madalm a maito ko manga Muslim i makasisinb on. Apiya so dn so sabaad a manga lompokan a Islam a giinggalbk sa maydan na makatokaw na aya kasasakodowan iyan na so kamapiaan o ridoay niyan a di so agama niyan a sabap a kiapakatindg iyan.
Pphamagosayin tanoai ka pdai ko sarig o Allāh  a amay ka di misampay ko manga Muslim na adn a kadostaan on o taw a makatotokaw ron a da niyan pangndaon ko manga taw a di ron makatotokaw. So ridoay o Islam na gii siran nggalbk sa gagawii dawndaw a tarotop so bagr iran a katao ago tamok, sa kapmbtad iran sa manga plano ko kapmbinasaa iran ko manga Muslim, na so manga Muslim na sabap ko daa parinta iran a phakasangan ko kapagrna ko ronda o ridoay na aya giimakanggalbk na so pizakatawan a ulama a adn a sabot iyan ko mambbtad sa tanto a malobay so bagr iyan sa kapphakatokawa niyan ko pagtaw a Islam.
Isa a mabagr a panolon o ridoay a mala a minibinasa niyan ko Islam ago so Muslim, na so kinipanolonn iran ko Islam sa aya bo a tayodn o manga taw na so maori a alongan, ka so doniya na ingd a kanggayagomaya, sa kailangan dn a so manga Muslim na manga mimiskin, ka an iran kagowadn so manga kawasa kiran, sa aya kailaya iran on na so manga kawasa na manga tabowakar a mawatan ko sorga a marani ko naraka, na giankaya a paratiaya na tiarima o kadaklan ko manga Muslim, sa adn a manga ompongan iran a aya pkhitolad o katharo iran ago so galbk iran na so kakhababayai ko kamimiskin o Muslim, ka kagiya kon a so miskin na lalayon iyan katatadman so Kadnan a di so kawasa, sa miakaogop oto ko kaboboklo iran adi siran khabaya zokat sa pagpr na kinowa iran a dalina ka kagiya massndod siran ko giikambarasimba ago so giikipanolonn ko agama, a giankai a manga taw na opama ka sii siran miagintaw ko masa o Umar Bin al Kathab, na mataan a kataaman iran so badas iyan sa lphadan iyan siran ko di ran kapnggalbk sa sokatan o ginawa iran ago so pamiliya iran sa daawa sa kanggalbk sa simba.
Manga Oripn o Allāh, so kamimiskin na sakit a inipannkat o Islam so kabolongi ron, da dn a miatoon akn a satiman bo a dalil ko Qur’an ago so Sunnah o ba kiababayai o Islam so kamimiskini, aya mataan na inidatar o Islam ko shaytan a patot a kalindongan ko Allāh  so gasta iyan, sa da dn a sambayang o Rasulullah  inonta a lominindong ko Allāh  phoon ko kamrmr, sa gianan i karina sa kiagaraobata on o Islam ago bialoy o Allāh  so zakat a rokon o Islam, a gianan i inggarobat ko kamimiskini, na andamanaya i kaptharoa on sa so miskin na tomo a di so kawasa a Muslim.
Manga Oripn o Allāh, paliogat a pakalaan tano so kapphaganada tano ko manga antap o ridoay tano ko kapmbinasaa iran rkitano, ago pakabagrn tano so paratiaya tano ko Allāh  ago pakablangn tano so gii tano kapaganada ko Islam sa tarotop ka gianan i okit a kaphakandod o kiphagintawn tano ron, sa madakl dn a kiapamagosaya tano sankanan a bandingan, sankai a mizasaloyana a manga Khutbah, sa gii tano khasokasowin ka an pphakala so sabot tano ron ago makala so anogon tano ron sa maoyag rkitano so panamar ago so kasigi antaa ka kabaya sa kapakapagintaw ko thito a goliling o agama, ka an tano maparoli so limo o Allāh  sankai a doniya na sampay sa akhirah.
Giankai a masa tano imanto na maito ko manga taw o ba iran phlaboi a bandingan so ndadatar aya a osayan ka kagiya kon a piakalklk, ka obaba dn katokawi o parinta a somosopak ko Islam, na manga oripn o Allāh  go phoon tano misampay ko datar anan a btad a apiya so kaptharoa tano ko kabnar o Islam ago so manga Muslim na ikhalk tano, na so mambo so kalankapan a Muslim na ikalk iran o ba iran pkhan’g so datar anan a manga bandingan na gianan dn so tarotop a kiathapapay ago kiathaoripn ko ridoay, na khasanaan anan a ipagbong o taw sa naraka a khakowa niyan so rarangit o Allāh .
Di tano ikalk so kaphangnala tano ko manga kabnar o Islam, ago so manga Muslim, sa tomo a san tano masokar a di sa ba sii tano mamatay ko kasosondong ko ridoay ka mataan a da dn a kapakaslang o taw a ikalk iyan so ridoay nyan sii ko poso iyan. Sa dn sa taw a Muslim a matay a da niyan mazimalaw a kapakaogop iyan ko Jihad sa lalan ko Allāh  na skaniyan na miatay a monafiq, na so monafiq na sii phakabaling ko ampasampas o naraka jahannam, ka lawan ko kafir sa kasikasaan.

Manga Oripn o Allāh, pangnin tano ko Allāh  a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.

وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ

إِنَّهُ هُوَ التَّوَّابُ الرَّحِيمُ

Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.



Khutbah Al Eid

So Bandingan ko Buka sa Hariraya

Ki: Alim, Hassanor Bin Maka Alapa

Al Murshid Al Am

Al Insan Islamic Assembly of the Philippines

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا, وَأَشْهَدُ أَلاَّ إِلَهَ إِلاَّ اللهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ , اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَصَحْبِهِ وَمَنِ اهْتَدَى يِهَدْيِهِ إِلَى يَوْمِ الدِّينِ وَبَعْدُ:
فَيَاعِبَادَ اللهِ يَقُولُ الْحَقُّ تَبَارَكَ وَتَعَالَى فِي الْقُرْآنِ الْكَرِيمِ:
وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللهَ لَمَعَ الْمُحْسِنِينَ (العنكبوت 69)

Innalhamda lillāhi nahmaduhu wa nastaīnuhu wa nastagfiruh, ar k’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn, wa ba’du:

Fayā ibādallāhi, Yaqūlul Haqqu Tabāraka wa Ta’ālā fil Qur’ānil Karīm:
Walladīna jāhadū fīnā lanahdiyannahum subulanā wa innallāha lamaal muhsinīn (al Ankabut 69).
Allāhu Akbar, so Allāh na lbi a Mala a inipangalimo tano niyan ko kinisampay tano sankai a gawii a babarakatn, giai so gawii a kariala o Muslim a inisnggay o Islam a dowa a mala a gawii a inisogo iyan so kakhalamilami ran ago so kababaya iran ko kapzagad iyan kiran a siran so dowa a Buka a so buka sa powasa Eid al Fitr ago giankai a Eid al Adh’ha a pmbthowan tano sa buka sa hariraya.
Manga Oripn o Allāh, giankai a manga ala a gawii tano na pzagad ko oriyan o katonaya tano ko manga ala a simba tano ko Allāh  a pd ko manga polaos o Islam, ka so buka sa powasa na khaadn ko oriyan o kiatonaya tano ko manga simba ko agama a skaniyan so kiapowasai tano ko Ramadhan, na bialoy o Allāh  a so buka sa powasa na kariala oto o manga Muslim a miaromasay siran ko kiapamowasa iran sa pkhalamilami siran sa kapipiya ginawa ka an iran magdam so kala o limo o Allāh  sii kiran.
Gia pman ankai a buka sa hariraya, a so Eid al Adh’ha na pkhaadn ko ika sapolo ko olanolan a Dhul Hijjah, a so manga Muslim a nomanayk na miapasad iran dn so kiatonaya iran ko pinakamala a rokon o Hajji so ka oqup sa Arafah ko alongan a ika siyaw ko Dhul Hijjah, na so kiapita iyan na khaadn ankto a kariyala a bithowan sa kariala a kakhorban, ka kagiya so manga nomanayk na zombaliin iran so manga korban iran ko darpa a pazombalian on sa Makkah, sa soasoat iran ko Kadnan iran a Rabbul Alamin. Sa so mambo so manga Muslim ko pirikharikhaban o doniya na gii siran khorban sa soasoat ko Allāh ,.
Manga Oripn o Allāh, giankai a gawii a Eid al Adh’ha na giai so gawii a kakhorban, a maana a kasombali sa ayam sa soasoat ko Allāh , iniiza ko Rasūlullāh  so manga pipiya a simba na pitharo iyan a aya mapiya a simba na so kakhorban sa binatang a phakatoronn so dara (rogo) iyan ko kasombalia on sa soasoat ko Allāh , aya sabap anan na kagiya so manga pananakoto ko manga Arab, na pphanombalian iran sa manga korban so manga katuhanan iran a barahala, sa soasoat iran on, na da oto kasoatn o Allāh  o ba so inadn iyan a binatang na sombaliin sa korban ko salakaw ron a da on adn ka skaniyan na inadn pn o Allāh  a kna o ba tuhan, na so kakhorban o taw sa ingaran o Allāh  na gioto na katankd a mataan a so siombali iyan a binatang a inizoasoat iyan ko Allāh  na rk oto o Allāh  ka skaniyan i miadn on a patot a sii rkaniyan mizoasoat sa di ron pd so salakaw ron. Misabap san na mimbaloy so kakhorban a pd ko manga ala a simba sii ko Islam, ka kagiya pphakitanodan iyan so maana o tawhid, a kapakaisaisaa ko Allāh  ko kapzimbaa on.
Manga Oripn o Allāh, giankai a gawii na ipphananadm ko isa a pamiliya a ama ago ina ago wata a siran oto a pamiliya na tinindos siran o Allāh  ko manga taw ko doniya sabap ko kiapromasay ran ko agama o Allāh , sa mianarig siran on sa tarotop a sarig, sa inibgay ran so mala i arga a nganin sa korban ago soasoat ko kabaya o Allāh . Pitharoo Allāh  a:

وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللهَ لَمَعَ الْمُحْسِنِينَ (العنكبوت 69)

So siran oto a miromasay siran sa mianagontaman siran sa katoona rkami,

na matatankd a thoroon ami siran ko manga lalan (a khitoon) rkami, go mataan a so Allah na pd iyan so manga taw a giiphiapiya (al Ankabut 69)
Gianan so pamiliya a miatindos a miamankolong ko pandi o kapakaisaisaa ko Allāh  ko liawaw o lopa ko masa a da dn a taw a salakaw kiran a ba iran aawidi so panolon o Islam. Giankai a kadaklan ko manga simba (manasik) o Hadjji na ipphananadm kiran ka an di pkhalipati so kiapromasay ran sa makowa siran a ladiawan a mapia a pzayanan o Muslim a gopn phakasalono.
Gankanan a pamiliya na gianan so ama a tinindos o Allāh  a Nabi a bolayoka iyan a so Ibrahim , so karoma na skaniyan so maonotn a bai a barasabar a so Hājar, na so wata a bilangataw a mapantang na skaniyan so Ismail, a so kapphananadmi kiran ko kapia o manga galbk iran na inidakat o Allāh  ko kitab iyan a Qur’an a pkhabatiya o manga taw sa taman ko kagba o doniya, sa so bantogan iran na di khasalongan sa di khaonaan ago di khasaloba, ka oman thmg so musim na ba dn pphamagoman sa ipangoranka niyan, a di dn kharomaby so kababago niyan, ka oman lomimpa so masa na so kapkhathay niyan na aya on gii pharas sa imbagobago niyan.
Giankai a pamiliya a paganay a mawid ko agama a kapakaisasaa ko Allāh , na oman i isa kiran na adn a mala a sangan iyan ko kiatharagombalaya on ago so kiapakabkn iyan ko liawaw o lopa. So Ibrahim na katawan so thotolan on a skaniyan na taw sa Ur sii sa Iraq a isa nan a mabagombar a ingd ko masa niyan na so kiatoroa on o Allāh  sa miaknal iyan so bnar a tuhan na diolon iyan so pagtaw niyan a barasimba sa barahala a pd on si ama iyan na da niyan siran matoro sa mianinggaposan so btad iyan ko kiatotonga iran on ko makadg a rapog, sa miailay ran so tanda a mapayag ko da niyan katotong, na da siran paratiaya na gianatan iyan so ingd a pilombayan sa romiapo ko mawatan a ragat on sa mianginsdpan sa kaomag sa Canaan, taman sa inisampay sa lopa a Misir, a pd iyan so karoma niyan a Sārah, na gowani a khadiatan sa marata o dato sa Misir so Sārah sabap ko kataid iyan a bai, na da pakambatasa o Allāh  so gasta iyan on, na inibgay niyan on so wata iyan a bai a so Hajar, na miapangaroma o Ibrahim, na gowani a makambalingan siran sa Canaan sa mimbawata so Hājar, na kiasiiban so Sarah ko di niyan kapmbawata na piangni niyan ko Ibrahim a ipakawatan iyan siran, na gioto i sabap a inilalakaw siran o Ibrahim sa minisampay siran sa lopa a Makkah.
Manga Oripn o Allāh, so langowan a giimanggolawla na palaya dn matatago sa ilmi o Allāh  a di katawan o manosiya so phakambowatn iyan on a mapia sii ko pkhaori a masa, opama o sii pagilaya ko rinayagan o bontal na di mapia oba taogn so karoma ago so wata ko darpa a da a ba on siringan ago daa pakaig on antaa ka pamomolan a khasarindongan, ogaid na sabap ko hikmah o Allāh  na giimanggolawla so da sa itongan o manosiya.
Gowani a mioma siran o Ibrahim ko balintad a malilibt a manga palaw na so kapantaran iyan na adn a miboboto ron a lopa a adn a sapoon on a kayo na inibagak iyan siran on a pd iran so loto iran a gango a korma ago so kalonkong a kobal a tatagoan sa ig, na kagia tomalikhod so Ibrahim na da niyan siran dn dingili sa lomialakaw dn na tiawag o karoma niyan a Hājar sa tig iyan a ino kami nka sii mbagakn, na da dn smbag, na kagia kawatanan na tiawag o Hājar sa pitharo iyan a: Hay Ibrahim, ba rka ini pandoan o Kadnan ka, na dominingil so Ibrahim sa liankaw niyan siran sa pitharo iyan a: Oway, na pitharoo Hājar a so Allāh  na di kami niyan pagilangn sa ba kami madadas, sa mizalimbotawan ko Kadnan iyan a Masalinggagawn, sii sankoto a masa na so Ismail na maito pn a ikaririga a pzoso.
Na gowani a kadalongan kiran so Ibrahim na liangag iyan a langit na iniporo iyan so mbala a lima niayn sa pitharo iyan a:
رَبَّناَ إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ , رَبَّنَا لِيُقِيمُوا الصَّلاَةَ فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ

(إبراهيم 37)

Kadnan ami mataan a sakn na piakabaling akn so moriataw akn sa balintad a daa babasoka on (gia Makkah) sii ko walay nka a sslaan, Kadnan ami ka an iran mipamayandg so sambayang na adn ka sa manga poso o sabaad ko manga taw a magagawi kiran, go rizki inka siran sa pd ko manga onga a sapad ka oba siran makapanalamat sii rka (Ibrahim 37).
Sii sankanan a btad na inraw dn o Ibrahim so kaganati niyan ko karoma a darodopa a bilangataw a maonotn ago so wata iyan a bago a mama a onga o poso iyan a aya niyan bo wata ko kinitolod dn o omor, a katawan tano so anogon o ama ko wata iyan a mama a bothong pn, na so kabaya iyan ago so ranon iyan ko pamiliya niyan na aya niyan dn korban sa gii niyan kapromasay sa pantag sa kapakamoayan o panolon iyan a Tawhid, so kapakaisaisaa ko Allāh  ko kasimbaa on, sa mimbalingan skaniyan sa Palestine.
Skaniyan oto a ina a bilangataw a so Hājar na tionay niyan so sangan iyan ko kiaritana niyan ko ikaritan iyan a so Ismail sa tarotop so pananarig iyan ko Allāh  sa di niyan siran pagilangn, na da mathay so masa na mialngan so ig a loto iran na riaot dn a kawaw so Islamil, sa miagaropasay dn, na kagia kaorowan so Hājar na miakatikharas na liankaw niyan so sabala a kilid o palaw ko balintad na mianizakay sa kaphlalakaw niyan ka oba on makatoon sa makatabang on ko mambbtad o wata iyan, na kagia maoma niyan so sabala a katampar o balintad na komiasoy pman ko phoonan iyan sa inisampay sa miakapito niyan makasoy na inidaplak a dokaw ago apos, na da mathay na miakagdam sa rapandas, na miakapananawag sa pitharo iyan a: Ba adn a phanabantabang? Na miailay niyan a manosiya a gioto so Jibril a zasalin sa mama na pitharo iyan on a adn a magmbowat a pakaig a miphamakaig iran ago adn a pmbalayin a walay sankai a darpa a walay o Allāh , na inidasl iyan a palo niyan ko lopa na miakambowat on so ragiray a maito a ig, na pinggagaanan o Hājr sa pphangakopn iyan oman somolapay ago linibt iyan a maroni a ator ka oba matangl sa di tomoga sa mada ankoto a maito a ragiray. Pitharoo o Rasūlullāh  a opama ka so Hājar na piakambaya iyan so ig ko kapthoga iyan na khabaloy so ig a Zam Zam a lawas a ig a pthoga sa mapayag.
Sii ko kiaadn ankoto a pakaig na miakaoma so manga papanok a giisiran on phapaigo, na adn a salompok a tomtmbng a manga taw sa Yaman a pd ko pakatotopo a Jurhum na miakasagad siran ko marani sankoto a balintad na miailay ran so manga papanok a pkhaboliok siran sankoto a darpa, na inantok o isa kiran sa gioto na papata sa adn a ig roo, na siogo iyan so isa kiran sa amadn iyan, na miaoma niyan so ig a Zam Zam ago so Hājar a pd iyan so wata iyan a Ismail, na minggagaan komasoy sa inilapoy niyan ko manga pd iyan so miailay niyan, na so kaitokawi ran on na siongowan iran so Hājar na piangni ran on a roo siran dn maling a pd iyan, na miniog ogaid na inisarat iyan kiran a so pakaig na rk iyan sa da a kabnar iran on oba iran mamilik sa maradika siran ko kaphaginom on, na miakaayon siran. Ipoon roo na kiatagoan sa taw a Makkah, na so kiapakala o Ismail na sii kiran dn miabatak ko katharo sa basa Arab, ka kagia so manga Jurhum na bangnsa siran a Arab, na so Ismail, na kna o ba Arab ago so ina iyan na taw sa Misir a kna a ba Arab.
Gowani a phmamangoda dn so Ismail na miakaoma si ama iyan, na so kiailaya niyan ki ama iyan na inalaw niyan sa pizakasakaw niyan, na sii sankoto a masa na mithataginp so Ibrahim sa pikhorban iyan so wata iyan a mama, na kagia makanaw na tialowan iyan so wata iyan a bothong sa pitharo iyan on a ikaritan ko miailay akn sa taginpn a giiko ska khorbann na antonai mapipikir ka, na pitharoo o wata iyan a: