Mahsulotning mikroskopik tuzilishi. Savatchani 2% li ishqor eritmasiga solib qaynatiladi, suv bilan yuviladi, so‘ngra nina yoki pinset bilan o‘rama bargni va naychasimon gulni ajratib olib, xloralgidrat eritmasi yordamida mikroskop ostida ko‘riladi (3-rasm).
O‘rama bargning hap ikki tomonida o‘rtadagi yirik tomirlar bo‘ylab ketgan qalin devorli hujayralardan iborat sklerenxima-mexanik to‘qimasi, o‘rama bargning yupqa qismida (chetida) esa ayrisimon, ikki uchli tuklar hamda efir moyili sarg‘ish bezlar uchraydi. Bezlar murakkabguldoshlar oilasiga xos tuzilgan bo‘lib, umumiy kutikula bilan qoplangan ikki qatorda 4 qavatdan joylashgan efir moyi ishlab chiqaruvchi hujayralardan tashkil topgan. Efir moyli bezlarning yuqorisidan ko‘rilganda 8 (sakkiz) raqamini eslatadi. Efir moyli bezlar naychasimon gullarda ham bo‘ladi. O‘rama bargning ichki hujayralarida ba’zan mayda druzlar uchraydi.
Mahsulotning mikroskopik tuzilishi. Buymodaron o‘simligi bargi vagulining mikroskopik tuzilishi tekshiriladi.
Ishqor eritmasida qaynatib, yoritilgan bargning tashqi tuzilishi mikroskop ostida ko‘riladi (4-rasm). Epidermis tashqi tomondan to‘lqinsimon ravishda joylashgan kutikula qavati bilan qoplangan. Epidermis hujayralari egri-bugri devorli, ayniqsa bargning pastki tomonidagi epidermis hujayralari ko‘proq egri-bugri devorli va maydaroq bo‘ladi. Ustitsalar 4-5 ta epidermis hujayralari bilan o‘ralgan bo‘lib, bargning yuqori tomoniga nisbatan pastki tomonida ko‘proq uchraydi.
Barg hap ikkala tomondan 4-7 hujayrali oddiy tuklar va tashqi ko‘rinishi tuxumsimon, yaltiroq efir moyli bezlar bilan qoplangan. Tuklarning asos qismi 4-6 tagacha kalta, oxirgisi juda ham uzun - terminal hujayradan tashkil topgan. Tuklarning oxirgi uzun hujayrasi tezda sinib ketadi. SHuning uchun bargda 4-6 hujayrali asos qismigina qoladi. Efir moyli bezlar murakkabguldoshlar oilasiga xos ravishda tuzilgan. Bezlar 8 (ba’zan 6) ta 3-4 qavat va 2 qator joylashgan efir moyi ishlab chiqaruvchi hujayralardan tashkil topgan. Barg tomirlari bo‘ylab yog‘simon moddalari yoki sariq-qo‘ng‘ir rangli donachalari bo‘lgan ajratuvchi yo‘llar joylashgan.
