Mövzu 8. Menecmentin metodları.
1. Menecmentin metodları və idarəetmədə onların rolu.
2. İqtisadi metod.
3. İnzibati metod.
4. Sosial-psixoloji metod.
Metod yunan sözü olub üsul deməkdir. Bütün elmlərdə olduğu kimi menecmentin də metodları vardır. Bu metodlar idarəetmə elminin öyrənilməsi, bu elmdən irəli gələn funksiyaların və prinsiplərin həyata keçirilməsinin üsuludur. Menecmentin metodu idarəetmə subyektinin idarəetmə obyektinə təsir mexanizmidir. İdarəetmə metodu idarə edilən sistemə necə, hansı üsul və vasitələrlə təsir etmək lazım olduğunu bildirir.
Menecmentin metodu idarə olunan kollektivin xüsusiyyətlərindən, mədəniyyət səviyyəsi və psixoloji iqlimindən asılı olaraq, idarəetmə sisteminə təsir vasitəsidir.
Menecmentin metodlarının aşağıdakı cəhətlərini xarakterizə edə bilərik.
1. Menecmentin metodu idarəetmə funksiyalarının həyata keçirilməsini təmin edir.
2. Menecmentin metodu idarə olunanı idarə edənin iradəsinə tabe etdirmək üsuludur.
3. Menecmentin metodları fərdin fərdə, fərdin kollektivə, kollektivin kollektivə, kollektivin fərdə təsir üsuludur.
4. Menecmentin üsulu təşkilatın məqsədinə nail olunması üsuludur.
Təcrübəli rəhbərlər bütün idarəetmə metodlarından bacarıqla istifadə edir və onları üzvi surətdə əlaqələndirirlər.
Bu üsullar müəssisənin maliyyə-iqstisadi fəaliyyətini genişləndirməyə, təsərrüfatçılıq fəaliyyətinin inkişafına, əmək ehtiyatlarının əmək prosesində fəallığının artırılmasına, tərəfdaşların, partnyorların, təchizatçıların, alıcıların cəlb olunmasına, rəqabət qabiliyyətinin gücləndirilməsinə təsir göstərir. İdarəetmə qərarlarının işlənməsi və reallaşdırılmasının təşkilati aspektlərini menecer aşağıdakı menecment metodlarından istifadə etməklə həyata keçirə bilir:
1) İqtisadi metodlar.
2) İnzibati metodlar.
3) Sosial-psixoloji metodlar.
Dostları ilə paylaş: | 
