1726(32) dh. Mui, 11/60 Telgrafnâme Mahrec Merkezi: Bandırma Numara: 1543 Tarih: Fî 23 Haziran sene [1]326 / [6 Temmuz 1910]



Yüklə 29,82 Kb.
tarix30.01.2018
ölçüsü29,82 Kb.
#41262

1726(32)

DH. MUİ, 111/60_3



Telgrafnâme

Mahrec Merkezi: Bandırma

Numara: 1543

Tarih: Fî 23 Haziran sene [1]326 / [6 Temmuz 1910]

Dahiliye Nezâreti Celîlesi'ne

Ailemizin ta‘ayyüşüne medâr olmak üzere Couteaux Biraderler'in Ermeni karyesinde senedi hakanî ile mutasarrıf oldukları Kocatarla'daki ruhsatnâmeli taş ocağında nezâret etmekde ve işlemekde iken bugün karyei mezkûre Kilise Meclisi Reisi Puzant oğlu Manuk refakatinde kilise cemiyeti ve bir cemmi gafîr olduğu hâlde üzerimize hücum birle katletmek derecesinde çâkerlerini darb ederek karyei mezkûrede Couteaux Biraderler adamlarından hiçbir kimseyi yaşatmayıp mahv edeceklerini beyân etdiklerine karyei mezkûre vekili Sebuh Efendi'nin bu defa Dersaâdet'den karyeye avdeti ile beraber vuku bulduğundan eğer teşvikât olduğuna ve Ermeni Murahhasası Rahib Karabet Efendi'nin malumât ve inzimâmı re’yi ile olduğu hissolunduğuna ve bu tasavvurun vuku bulacağı iki gün mukaddem istişmâm olunarak kable'lvuku‘ men‘i esbâbının istikmâli zımnında Bandırma Kaymakamlığı'na vuku bulan müracaat üzerine zinhâr fenalığa meydan verilmemesi karye muhtarına bâtezkirei mahsusa bildirilmiş iken muhtâr vekili mûmâileyh ile savuşmalarını vak‘anın zuhuruna mebnî çolukçocuk canımızın ...

DH. MUİ, 111/60_4

... muhafazası zımnında daimî suretde mezkûr karyede jandarma bulundurulmasını ve icabının icrasını istirhâm ederiz.




Couteaux Birader[ler]
tarafından memur

Şişman* oğlu Polodoros



Couteaux Biraderler
tarafından memur

Mail oğlu Şetek



Ermeni karyesinden

Taşçı Ustası Tolastolu(?) Haçik ve tâifesi



Ermeni karyesinden

Taşçı Ustası Karabet oğlu Oskiyan ve tâifesi



Ermeni karyesinden

Taşçı Ustası Serkis oğlu Kurt ve tâifesi




* Metinde "Şişem" şeklinde geçmektedir.

DH. MUİ, 111/60_1

Dahiliye Nezâreti

Muhaberâtı Umumiye Dairesi

Şube: 3/2031

Evrak Numarası: 59

Tarih: 28 Haziran sene [1]326 / [11 Temmuz 1910]

Telgraf

Karesi Mutasarrıflığı'na

Şişman* oğlu Polodoros ve rüfekâsı imzalarıyla Bandırma'dan çekilen 23 Haziran sene [1]326 telgraf kopyasının celb ve mütâlaasıyla mütecâvizlerin derdest ve te’dîbi ve bu misillü tecavüzâtın men‘i vuku‘u esbâbının istikmâliyle keyfiyetin inbâsı.



* Metinde "Şişem" şeklinde geçmektedir.

DH. MUİ, 111/60_7

Telgrafnâme

Mahrec Merkezi: Karesi

Numarası: 5616

Aded: 176

Dahiliye Nezâreti'ne

C. 23 Haziran sene [1]326. Şişman oğlu Polodoros ve rüfekâsının akîbi vak‘ada vuku bulan müracaatları üzerine derhal icabı icra ve mütecâsirleri derdest edilerek ciheti adliyeye tevdî‘ ile beraber tecavüzleri men‘ etdirilmiş olduğu Bandırma Kaymakamlığı'ndan bildirilmiş ve livâca tedkikât edilmek üzere sureti cereyânı muamele hakkında izahât taleb edilmişdir.

Fî 30 Haziran sene [1]326 / [13 Temmuz 1910]

Mutasarrıf

Mümtaz

DH. MUİ, 111/60_6



Dahiliye Nezâreti

Muhaberâtı Umumiye Dairesi

Şube: 3/2125

Evrak Numarası: 176

Tarih: Fî 1 Temmuz sene [1]326 / [14 Temmuz 1910]

Ermeni karyesinde jandarma bulundurulması hakkında

Karesi Mutasarrıflığı'na

30 Haziran sene [1]326 tarihli telgrafnâmei vâlâları cevabıdır. Bandırma Kazası dahilinde Couteaux Biraderler'in mutasarrıf oldukları taş ocağında işlemekde olanlara tecavüzâtda bulunan eşhâsın derdest ve ciheti adliyeye tevdî‘ edildikleri beyân olunmasına nazaran hükûmet vazifei müterettibesini ifa etmiş ve tecavüzi vâki‘ hakkında yapılacak bir şey kalmamış ise de bu bâbda nezârete keşîde edilen telgrafnâmede vak‘anın hudûsu mevki‘i mezkûrda daimî suretde jandarma bulunmamasından münba‘is olduğu beyân ve oraya jandarma ikame olunması lüzumu da dermiyân kılınmasına nazaran taş ocağında işlemekde olan amelenin âtiyen yine bu yolda dûçârı tecavüzât olmamalarını te’min için orada jandarma ikamesi muktezî görüldüğü hâlde bu cihet hakkında da icabı hâlin icrası bâbında.

DH. MUİ, 111/60_2

Karesi Mutasarrıflığı

Tahrirât Kalemi

Aded: 201

Couteaux'ların adamı ile Ermeni karyeliler beynindeki taş ocağı ihtilâfâtı, nizâ‘ı hakkında

Dahiliye Nezâreti Celîlesi'ne

Nâzır beyefendi hazretleri

30 Haziran [1]326 tarihli ve yüz yetmiş altı numaralı telgrafnâmeye zeyldir. İsti‘lâmı vâkı‘a cevaben Bandırma Kaymakamlığı'ndan ahîren alınan tahrirâtda Ermeni karyesinde Couteaux'lar ile köylüler beyninde münâza‘un fîh olup Orman ve Ma‘âdin Nezâretince tedkik edilerek köylüler tarafından sened ibrâzında yeniden tedkikât icra edilmek üzere muvakkaten köylülerin müdahalesinin men‘i karargîr olarak vâki olan tebliğ ve iş‘âr üzerine köylülerin müdahalesi men‘ edilmiş olan taş ocaklarının bulunduğu mevkide Couteaux Biraderler'in adamları tarafından amelenin ikametine mahsus olmak üzere inşa etdirmek istedikleri kulübenin inşa edildiği mahallin kiliseye aid olduğu ve kilise mütevellîsi nâmına senedi bulunduğu iddiasıyla kilise cemiyeti ile hey’eti ihtiyariyesinin eseri teşviki ile karye ahalisinden beşon kişi kulübe inşasıyla meşgul olan amelenin üzerlerine gidip taş ve toprak atmak suretiyle kovaladıkları ve bu esnada ameleden iki kimseyi tutarak merkûmları elleri ile darb etdikleri ve Couteaux'nun adamı da kaçıp köylülerin dahi arkasından taş atdıkları icra edilen tahkikâtdan anlaşıldığı ve esnayı vukuâtda mahalli vak‘ada bulunup firar etmiş olan Couteaux'nun adamı hükûmete gelip ihbar etmesi üzerine derhal mahalline tahkik memuru ve kuvvei kâfiye i‘zâm edilerek mütecâsirleri derdest ile ciheti adliyeye tevdî‘ edilmekle beraber köylülerin hod behod tecavüzleri men‘ u ref‘ etdirilmiş ve hey’eti ihtiyariye ile kilise cemiyeti dahi celb edilerek hod behod bu gibi tecavüzâtda bulunmayarak bu bâbda bir iddiaları var ise ale'lusul hükûmete müracaat eylemeleri lüzumu tenbih ve ihtar ve ba‘demâ tecavüzâtda bulunmayacaklarına dair te’minâta rabt edilmiş olduğu iş‘âr olunmuşdur, efendim hazretleri.

Fî 18 Receb sene [1]328 ve fî 12 Temmuz sene [1]326 / [25 Temmuz 1910]

Karesi Mutasarrıfı

Muharrem Mümtaz bin Salim

DH. MUİ, 111/60_10

Karesi Mutasarrıflığı

Tahrirât Kalemi

Aded: 224

Ermeni karyesindeki taş ocakları yanında bir karakolhâne te’sisi için emir verilmesi hakkında

Dahiliye Nezâreti Celîlesi'ne

Nâzır beyefendi hazretleri

Muhaberâtı Umumiye Dairesi Üçüncü Şubesi ifadesiyle şerefvârid olan 3 Temmuz sene [1]326 tarihli ve yüz elli sekiz numaralı tahrirâtı aliyyei nezâretpenâhîlerinde iş‘âr buyurulduğu vechile Bandırma Kazası dahilinde Ermeni karyesinde müte‘addid taş ocakları olup ocaklarda ara sıra yekdiğere tecavüz ve taarruz vuku bulmakda olduğundan orada bir karakolhâne te’sisiyle daimî suretde jandarma bulundurulması Bandırma Kaymakamlığı'yla bi'lmuhabere mûcibi muhassenât olacağı anlaşılmakla jandarma ikamesi için merci‘inden Livâ Jandarma Kumandanlığı'na emir verdirilmesi ma‘rûzdur, efendim hazretleri.

Fî 3 Şaban sene [1]328 ve fî 26 Temmuz sene [1]326 / [8 Ağustos 1910]

Karesi Mutasarrıfı

Muharrem Mümtaz bin Salim

DH. MUİ, 111/60_11

Dahiliye Nezâreti

Muhaberâtı Umumiye Dairesi

Şube: 3/2614

Evrak Numarası: 224

Tarih: Fî 4 Ağustos sene [1]326 / [17 Ağustos 1910]

Hulâsa: Bandırma maden ocaklarında jandarma ikamesi hakkında

Harbiye Nezâreti Celîlesi'ne

Bandırma Kazası dahilinde kâin Ermeni karyesindeki müte‘addid taş ocaklarında işlemekde olanlar tarafından ara sıra yekdiğere tecavüz ve taarruz vuku bulmakda olmasına ve bu da mevki‘i mezkûrda daimî suretde jandarma bulunmamasından münba‘is olduğu muhaberâtı câriyeden anlaşılmasına binâen oraya jandarma ikame olunması hakkındaki mütâlaa Karesi Mutasarrıflığı'ndan istifsâr kılınmışdı. Bu kere cevaben alınan tahrirâtda mahalli mezkûrda bir karakolhâne te’sisiyle daimî suretde jandarma bulundurulması mûcibi muhassenât olacağından bahis ile Livâ Jandarma Kumandanlığı'na emir i‘tâsı lüzumu iş‘âr olunmakla icrayı icabı re’yi âlîi nezâretpenâhîlerine menûtdur. Ol bâbda.

DH. MUİ, 111/60_8

Dahiliye Nezâreti

Muhaberâtı Umumiye Dairesi

Şube: 3/2682

Evrak Numarası: 4186

Tarih: Fî 9 Ağustos sene [1]326 / [22 Ağustos 1910]

Ücretli telgraf

Karesi Mutasarrıflığı'na

C. 26 Temmuz sene [1]326 tahrirât. Bandırma'nın Ermeni karyesindeki taş ocaklarının jandarma ile muhafazası Harbiye Nezâreti'ne yazılmışdır. Ancak amelenin ahali tarafından tekrar silah ile tehdid edilmeye başlanıldığı ifade olunduğundan muhabere neticeleninceye değin mahalli mezkûrun tahtı muhafaza[ya] alınması muktezîdir.

DH. MUİ, 111/60_9

Dahiliye Nezâreti Celîlesi'ne

Nâzır beyefendi hazretleri

Bandırma Kazası'na tâbi Ermeni karyesinde bâruhsatı resmiye imal eylemekde olduğumuz taş ocaklarına ahalii karye tarafından vâki olan tecavüzün men‘ini istid‘â etmekle beraber ahalii merkûme tarafından tehdidâtda bulunulduğu oradaki adamlarımızla amelemizin hayatı tehlikede bulunduğunu evvel ve âhir istirhâm eylediğimiz hâlde hükûmeti mahalliye tarafından sem‘i itibar edilmediği cihetle geçenlerde adamlarımızdan üç kişinin mecrûh olduğu malumı âlîleridir. Bu defa tarafımızdan vâki olan istid‘â ba‘de'listi‘lâm Karesi Mutasarrıflığı'nın arîzai cevabiyesi üzerine icrayı icabı fî 4 Ağustos sene [1]326 tarih ve 759 numarasıyla Harbiye Nezâreti'ne tezkirei nezâretpenâhîleri tastîr buyuruldu ise de muamelenin neticelenmesi biraz vakte muhtac olduğundan ve ahîren Ermeni köyünden aldığımız telgrafnâme ve mektublar meâllerine nazaran ahalii merkûme yine adamlarımızın hânelerini taşlamağa ve silah ile tehdide tasaddî etmekde bulunmakla yine bir kötü tehlikeye intizâr etmekde olduklarından bu yüzden yeniden zuhur edecek fenalığın mes’uliyeti hükûmeti mahalliyeye aid ise de bunun önü alınması neye mütevakkıf [ise] hemen icrası ve jandarma hakkında Bâbı Seraskerî'den karar verilinceye değin mahalli mezkûrun tahtı muhafazaya alınması bâbında emr u fermân hazreti men lehü'lemrindir.

Fî 9 Ağustos sene [1]326 / [22 Ağustos 1910]

Galata'da mukim

Mösyö Couteaux ve Frères Vekili



Mihran Şirinyan



Yüklə 29,82 Kb.

Dostları ilə paylaş:




Verilənlər bazası müəlliflik hüququ ilə müdafiə olunur ©muhaz.org 2024
rəhbərliyinə müraciət

gir | qeydiyyatdan keç
    Ana səhifə


yükləyin