15 Hlárala ta, quén mici i cainer ara i sarno quente: “Valima ná ye mate massa mi Eruo aranie!”
16 Yésus quente senna: “Enge nér ye manwane túra ahtumat, ar tultanes rimbali. 17 Ar mentanes núrorya i ahtumatto lúmesse, quetien innar náner tultaine: “Tula, an sí ilqua manwa ná!” 18 Mal illi mici te *yestaner anta castali uien tule. I minya quente senna: 'Amancien imnin resta, ar mauya nin lelya cenien sa. Iquin lyello, áva sana ulco pa ni pan ua ece nin tule!' 19 Ar exe quente: 'Amancien imnin yantar lempe mundoron, ar ménan tyastien te. Iquin lyello, áva sana ulco pa ni pan ua ece nin tule.' 20 Ar exe quente: 'Evérien nissenna, ar etta ua ece nin tule.' 21 Íre nanwennes, i mól nyarne nati sine heruryanna. Tá i cavo turco náne rúşea ar quente mólyanna: 'Mena lintiénen mir i maller ar tier i ostosse, ar á tala sir i penyar ar *hroaloicar ar *cénelórar ar *úlévimar!'
