31Ar lendes undu Caparnaumenna, osto Alileasse. Ar peantanes tien i *sendaresse, 31 ar anelte quátine elmendo i lénen ya peantanes, an quetierya sáme túre. 33 Ar enge i *yomencoasse nér haryaina lo faire, úpoica rauco, ar yámes taura ómanen: 34 “Ai! Mana men ar lyen, Yésus Nasaretello? Ma utúliel nancarien me? Istan man nalye, Eruo Aire!” 35 Ar Yésus naityane se, quétala: “Na quilda ar tula et sello!” Ar apa hatie i nér undu endeltasse, i rauco túle et sello, ú maliéno se. 36 Tá elmenda lantane illinnar, ar carampelte quén as i exe, quétala: “Mana nostale quetiéno ná si? An túrenen ar melehtenen canis i úpoice fairi, ar ettulilte!” 37 Ar i sinyar pa se *etelender mir ilya nóme i *oscaitala noriesse.
38 Apa autie i *yomencoallo lendes mir coarya Símon. Mal Símondo verio amil náne *tarastaina túra úrenen, ar carnelte arcande sen pa sé.
