28 Qui Eru sie netya i celvar i restasse, i ear síra ar enwa nar hátine mir urna, manen ole ambe netyuvas lé, elde pitya saviéno! 29 Etta áva cesta mana matuvalde hya mana sucuvalde, ar áva same quárele, 30 an ilye nati sine nar yar i mardo nóri cestar, ono Atarelda ista i samilde maure sine nativa. 31 Mal á cesta minyave aranierya, ar nati sine nauvar len napánine!
32 Áva ruce, á pitya lámáre, an Atarelda asánie mai anta len i aranie! 33 Vaca yar samilde ar á anta annar i penyain. Cara len *pocoller i ua oi yeryuvar, *alaloitala harma menelde, yasse arpo ua tule hare hya malo ammate. 34 An yasse harmalda ea, tasse yando endalda euva.
35 Hepa i quilta oşweldasse ar calmaldar uryala, 36 ar elde na ve atani yétala ompa herulto entulessenna i veryanwello, polieltan latya sen mí imya lú ya tulis tambala.
