15 Er mici te nanwenne íre cennes i anes nestaina, ar hoa ómanen antanes alcar Erun. 16 Ar lantanes cendeleryanna epe Yésuo talu ar hantane sen; anes Samárea nér. 17 Hanquentasse Yésus quente: “Ma únelte i quean nestaine? Masse, tá, nar i hyane nerte? 18 Ma enge *úquen ye nanwenne antien alcar Erun, hequa nér sina hyana nórello?” 19 Ar quentes senna: “Á orta ar mena; savielyanen acámiel mále.”
20 Mal íre anes maquétina lo i Farisar pa i lúme yasse Eruo aranie tulumne, quentes téna hanquentasse: “Eruo aranie ua tule mi lé lávala quenin cenitas hendultanten. 21 Ente, queni uar quetuva: 'Cena sisse!' hya 'Tasse!' An yé, Eruo aranie ea endeldasse.”
22 Tá quentes i hildonnar: “Tuluvar aureli yassen meruvalde cene er i aurion i Atanyondova, mal ualde cenuva sa. 23 Ar queni quetuvar lenna: 'Cena tasse!', hya: 'Cena sisse!' Áva lelya tar ar áva nore ca te.
