Túle *sendaresse i lendes ter orirestali, ar hilmoryar leptaner ar manter i cari oriva, ascátala tai máltatse. 2 Mal quelli i Farisaron quenter: “Manen ná i cáralde ya ua lávina i *sendaresse?” 3 Mal Yésus hanquente téna: “Ma ualde oi ehentie pa ya Lavir carne íre sé ar i neri óse náner maite? 4 Lendes mir i coa Eruva ar camne i mastar taniéva ar mante ar antane tai i nerin óse, ómu tai uar lávina matso aiquenen hequa i *airimoin erinque.” 5 Ar quentes téna: “I Atanyondo ná Heru i *sendareo.”
6 Túle hyana *sendaresse i lendes mir i *yomencoa ar peantane. Ar enge tasse nér yeo forma náne hessa. 7 I parmangolmor ar i Farisar tirner se, cenien qui nestumne aiquen i *sendaresse, hirieltan lé yanen pollelte *ulquete se. 8 Mal sintes manen sannelte, ananta quentes i nerenna arwa i hessa máo: “Á orta ar tara i endesse.” Ar orontes ar tarne tasse. 9 Tá Yésus quente téna: “Maquetin lello: Ma ná lávina i *sendaresse care márie hya care ulco, rehta quén hya nancare se?”
