Apa nati sine i Heru cille exi *otoquean ar etementane te atta ar atta epe inse, ilya mastonna yanna sé immo tulumne. 2 Quentes téna: “I yavie ná úvea, mal i molir nar mance. Etta á arca i yaviéno Herullo, mentieryan queni hostien yavierya. 3 Á etelelya! Yé! Mentan le ve euler mici ñarmor. 4 Áva cole *pocolle, hya poco matson, hya hyapat; ar áva *suila aiquen i mallesse. 5 Íre tulilde mir coa, minyave queta: 'Nai coa sina samuva raine!' 6 Ar qui ea tasse meldo raineo, rainelda seruva senna. Mal qui ua ea er, nanwenuvas lenna. 7 Etta á lemya coa tanasse, mátala ar súcala i nati yar antalte len, an ye mole ná valda *paityaleryo. Áva leve coallo coanna.
8 Ente, íre menilde mir osto ar camilde le, mata i nati panyaine epe le, 9 ar á nesta i hlaiwar sasse, ar nyara tien: 'Eruo aranie utúlie hare lenna.' 10 Mal quiquie tulilde mir osto ar ualte came le, mena mir palle malleryar ar queta: 11 'Yando i asto ya himyane talulmanta ostoldallo palalme oa lenna. Ono nat sina alde ista, i utúlie hare Eruo aranie!' 12 Nyarin lenna: Soromen i aure namiéva nauva *cólima lá ya nauvas sana oston.
