Act : Vo Theophilus, thu masa chu Jesu thilbol le, thuhil aboncha akipattil’a pat



Yüklə 146.58 Kb.
səhifə1/6
tarix17.08.2018
ölçüsü146.58 Kb.
  1   2   3   4   5   6

Solchah

  • Act 1:1 Vo Theophilus, thu masa chu Jesu thilbol le, thuhil aboncha akipattil’a pat
    Act 1:2 alhensa Solchahho, Lhagao Theng jal’a thu apeh a, Ama lahtouva aum ni gei thu ahin;
    Act 1:3 gim hesoh athoh joukal nisom li sungin ahing monge ti hetchetna tampi toh thon Solchahho henga akilah jin, Pathen lenggam thudol aseijie.
    Act 1:4 Amaho toh aumkhompet’un ahil-chah-in ajah-uva, “Jerusalema kon-in potdoh Iouvin kasei najahsau Pa thutep chu ngah jo’uvin;
    Act 1:5 ijeh-inem itile Johnin twiya baptize achansah vangin nangho vang ni phabep jouleh Lhagao Thenga baptize nachan diu ahi,” ati.
    Act 1:6 Seijuiho akikhop khomsoh phat’un ajah a, “Pakai, tua hi Israel Lenggam nasemphat peh ding hi-tam ?” tia adoh-u leh;
    Act 1:7 Jesun ajahuva, “Pan achamtah a atha neina’a gotsa akoi phat nikho chu nang ho het ding dol ahipoi;
    Act 1:8 hintin Lhagao Theng nachunguva ahung lhun teng thahat naneiyuva, Jerusalem le Judea gamsungsea jong Samaria le leiset kol kimvel geiya Keima het-tohsah a napan dingu ahi,” ati.
    Act 1:9 Hicheng hi aseiya amahon avet pettah-un lah touvin aumtan, amit mu’va konin meilhang khat’in atol-mangtai.
    Act 1:10 Jesu hitia akitol manga amahon van lam avet vet pettah-uvin ven, ponbangleh sil mi ni akom’uvah ahung ding lhonin,
    Act 1:11 amani chun, “Galilee gam miho, ibol’a dinga van lam navet vet’u ham? Hiche Jesu nakom’uva kona van’a kilatou hi, van lama akaltou namu bang banguva hung kit ding ahi,” ati lhone.
    Act 1:12 Seijuiho chu Jerusalem kom-cha kilometer khat bang gamla Olive lhang kitia konin Jerusalem lama ahung kilekit tauve.
    Act 1:13 Seijuite chu Peter le John, Jacob le Andrew, Philip le Thomas, Barthomew le Matthew, Alphaeus chapa Jacob le gam ngailu Simon chule Jacob chapa Judas hicheng hi ahiuvin, ahung lhun’uvin aum nau indan chung-nunga akaltoutauve.
    Act 1:14 Abonchau-vin numeiho le Jesu nu Mary toh Jesu sopi pasal ho pumin akiloiyun ataojom jinguve.
    Act 1:15 Hitia aum laiyu hin sopite lah a Peter akipatdoh-in, (mipi akikhom jat chu ja khat le som ni jen ahiuve)
    Act 1:16 Sopite ho, Jesu manho hinlamkaiyah Judas thudol Lhagao thengin David kam’a asei masah pathen lekhabua thu chu guilhung tei ding ahin;
    Act 1:17 ijeh-inem itile Judas chu eiho lah a khat’a kisim’a, hiche lhacha mun jong chang ahi.
    Act 1:18 “Judas hin akhan gitlou man sum chun leimun khat achon, ahin-la atumpi ahung pomin jalah tah a apoh jal’in, asung alai jouse aleng cheh tai.
    Act 1:19 Athu hi Jerusalema cheng jouse het’in aumdoh tan, hijeh chun amaho paovin hiche leimun chu, Thisan leimun’ ti nan Akeldama asah tauve.
    Act 1:20 “Chujongle Labua chun : ‘Ama mun chu ong hen lang Koiman loda hen,’ akitin; Amavang : ‘Atohmun chu midang khat changjo hen,’akiti.
    Act 1:21 Hijeh chun eiho lah a Pakai Jesu avaikon availhun laiya eiho toh umkhom jing ho lah a mi,
    Act 1:22 John phat laiya pat i-lah-uva kona Jesu lahtouva aum ni geiya thudol he-them khat chun athodoh thu hi eiho toh hettohsah a pangkhom ding ahi,”ati.
    Act 1:23 Chuphat’in mi ni, Justus tia kikouji Barabbas kiti Joseph le Matthias chu atungdoh tauve.
    Act 1:24 Chutah-in ataovun, “Pakai, nang-man mitin lungthim nahesoh keiye, hiche te ni kah a hin lheng-doh tan,
    Act 1:25 koipen hin, ama mun kijot’a che mang Judas panna lhacha mun le Solchah mun hi lo le natim ?” atiuve.
    Act 1:26 Chuin amani ding hin vang asan’u leh, vang kisep chu Matthias chunga achun, hijeh chun ama hi Solchah som le khat chutoh akisimthatai.
    Act 2:1 Pentecost lhin nin abonchauvin mun khat’a aum’uve,
    Act 2:2 Chuin phulou helouvin van lama konin hui hattah gin bangin ahung gingin atou nau in chu apumin adimsoh jenge.
    Act 2:3 Hichun meikou bangin lei tampi ahung kilah-in achung cheh-uva aki-ngan aumden leh,
    Act 2:4 abonchauvin Lhagao Theng adimsoh keiyun lhagaovin seidoh theina apeh bang cheh-in paochom pao-chomin thu aseipantauve.
    Act 2:5 Hichea chu vannoi chitin namtin’a kona hung khom Juda mi houva gunchu ho Jerusalema aum laiyu ahin,
    Act 2:6 hiche o chu ahung gin phat’in ahon ajanga ahung lhai khom cheh-u leh ama ama pao cheh a athuseiyu akihettoh jengu chu adatmo lheh jengui.
    Act 2:7 Mihon datmo le kidang asauvin, “Ven, hichea thusei ho hi Galilee gam mi jeng hilou ham ?
    Act 2:8 I-atileh eiho khat cheh-in ipen nau gamkai pao cheh a ijah theiyu ham?
    Act 2:9 Eiho Parthia, Media, Elam gam mi, Mesopotamia gama cheng, Judea gam le Cappadocia gama cheng, Pontus le Asia gama kon,
    Act 2:10 Phrygia le Pamphylia, Egypt le Cyrene naiya Libya lhanga cheng, abang jong Rome a kona hung kholjin
    Act 2:11 Juda mi le Juda ki-sosah ihiuvin, Crete le Arabia hung kon jong aumin, Pathen natoh nasa-tah aseiyu khu ipao chom cheh-in ikijah theiyui,”atiuve.
    Act 2:12 Abonchau-vin datmo le lung kichi-ah tah-in khat le khat aki houvun,”Hiche hi ipi ti na hintem ?” atiuve.
    Act 2:13 Midang hon vang ajontaiyun, “Hiche ho hi lengpitwi kham hiuva hi!” tin asei-yui.
    Act 2:14 Peter chu som le khat chutoh ading khomin,oging tah-in japi lam ngan thu aseitai;”Vo Juda miho le Jerusalema chengte,nabon-chauvin hiche hi heuvin lang kasei chengse hi lung nachangin ngaiyun.
    Act 2:15 Na-ngaito banguva hiche miho hi lengpitwi kham ahipouve, ajeh chu tu hi jingkah nidan ko bou ahina-laiye;
    Act 2:16 amavang hiche hi Joel Themgaova kona kiseisa :
    Act 2:17 ‘Pathenin “Ni nunung lam teng hiti ding ahi,” atin; Tahsa mihem pumpi chunga ka-lhagao kabuh lhah a, Nachapateu le nachanu teuvin gaothu asei diu; Nakhangdong teuvin Themgao thilmu tampi amu’va, Na-upateuvin mang tampi anei diu ahi
    Act 2:18 Chule kasoh pasal ho le numei ho chunga jong Hiche nikho laiya .chu kalhagao kabuh lhah ding ahin, Hijeh a chu amahon gaothu asei diu ahi.
    Act 2:19 Chunglam van’a thil kidang dang kabol’a, Noi leiset chunga melchihna tampi kaboi ding; Thisan, meikou muthim lhang-khalkiheh ding.
    Act 2:20 Nisa hung thim ding, Lha thisan banga san ding ; Pakai nikho nasatah le akiphondohna ding Hung lhun masanga chuti ding ahi.
    Act 2:21 Chuteng koi hileh Pakai minphah chan Huhhinga um ding ahiye,” tia’asei chu ahitai.
    Act 2:22 “Israel mite, hiche thu ho hi ngaiyun! Nang hon nahet banguvin, Nazareth khoa Jesu kiti mipa chu Pathenin aphatsah phot-chetna nalah tah-uva thil kidang ho le datmo tin cheng chule melchihna tampi abolsah ahi.
    Act 2:23 Pathen in ahet masah a agontohsa dung-juiya hiche Jesu pehdoh a aum chun nang hon Dan neiloute khut’a thingpel’a nakhenbeh-un nathat tauve;
    Act 2:24 Ama chu thinan ahenjou hoi ahi loujeh-in, thi genthei nan ahen chu Pathenin asut lhan, akai-thoutai.
    Act 2:25 Ajeh chu David-in jong ama thudol asei chun :Keiman kamasanga Pakai kamu jingin, Suh lingjou kahilouna din kajetlama apang jinge;
    Act 2:26 Hijeh chun kalungthim akipah-in, Kaleiyin thanop thu aseiye ;Katahsaphe jeng jong hi Kinem’a um jing ding ahi;
    Act 2:27 Nangin ka-lhagao jong noimigama dalhapon natin, Namithengpa jong mon mangsah pon nate.
    Act 2:28 Hinna lampi chengse neihetsah tan Namaiya kipana lhingset’a neipeh ding ahi,’ati.
    Act 2:29 “Sopite, ho, olmo louhel’in iphung bulpiu David thudol hi najah-uva kasei ngam’e; ama athin avuiyuvin, avuikhuh chu tuni geiyin ilah-uva aum jing nalaiye.
    Act 2:30 Themgao ahijeh-in Pathenin achilhah lah a khat alal-touna atousah dia akihahselna chu ahe jingin, “
    Act 2:31 ahet masah jeh chun Christa thodoh kit ding hi asei masan :’Ama chu noimigama akidalha denpon, Atahsaphen jong mon mangna amupoi,’ati.
    Act 2:32 Hiche Jesu hi Pathenin akaithoutai, keiho chengse hi hettohsah kahiuve.
    Act 2:33 Ama chu Pathen jetlama choisangin aumtan, Paa kona thutep Lhagao Theng alah chu ahin bung lhan, nang hon namu’va najah-u hi ahi.
    Act 2:34 Ijeh-inem itile David chu Van’a akal-pon, hitijoh hin aseiye : ‘Pakai chun ka-Pakai jah a, Kajetlama tou jingin
    Act 2:35 Keiman namelmate chengse Nakengto chotpha kaneisah masangsen,’ati.
    Act 2:36 “Hijeh chun Israel insung miten kihet cheh hen, nang hon thingpel’a nakhetbeh-u hiche Jesu hi Pathenin Pakai le Messiah a asem ahitai,” ati.
    Act 2:37 Asei ngai chengse chu alungu hem’a kidot abang jengin, Peter le Solchah dang ho jah a,”Ipi kabol diu hitam sopite ?” atiuve.
    Act 2:38 Peterin ajah-uva, “Nachon-set lung heiyun lang, khat cheh-in nachonset’u ngaidamna dingin Jesu Christa minin baptize chang cheh-uvin, chuteng Lhagao Theng Pathen thilpeh hi nachan diu ahi;
    Act 2:39 ijeh-inem itile thutep chu nang ho le nachateu chule gamla tah a um Pakai i-Pathenuvin akouho jouse dinga ahi,” ati.
    Act 2:40 Peterin Thudang tamtah-in jong ahettohsah-in tilkhouto thon ajah-uva, “Hiche khang gilouva kon hin kihuhhingun,” ati.
    Act 2:41 Hijeh chun asei jop chengse chu baptize achangun, hiche nikho chun mi sang thum jenin abetauve.
    Act 2:42 Amaho chu Solchah ho thuhil’in jong, antheng jongin jong chule taovin jong gunchutah-in apangdet jing tauve.
    Act 2:43 Thil kidang le melchihna tampi Solchah hoa kona akiboldoh phat’in amitakip chunga kichatna achutai.
    Act 2:44 Atahsan ho abonchauvin thu khatseh akisauvin, ijakai nei-Ihangin aneikhomun,
    Act 2:45 aneiyu athil-keo chengseu ajoh-un, a-ngaichat dungjui cheh-in akihom jiuve;
    Act 2:46 niseh le lung khatseh pun Houin a gunchu tah-in akikhom jiuvin, in tin’a changlhah hehbal’in akihom-un, lung lhaisel le kipah tah-in an anekhom jiuvin;
    Act 2:47 Pathen avah-choiyun mipi pumpi seiphat achangui. Hichun Pakaiyin niseh leh huhhinga umdoh ho chu aloi lah-uva abejing jin ahi.
    Act 3:1 Peter le John chu tao phat nilhah lam nidan thumin Houin a achetou lhone.
    Act 3:2 Chuin Houin kaiya cheho henga khut-doa thil thum dinga ahinpoh-uva ‘Kotkhah hoi’ kiti Houin kelkot bul’a niseh leh kitousahji, anu-sunga kona elbaiya pengpa chu aumin,
    Act 3:3 amahin Peter le John Houin a lut kigo amun, i-khat khat apehna lhon din thil athume.
    Act 3:4 Peterin John toh ama chu avechang mel’in “Keini lam hinven,” ati.
    Act 3:5 Hijeh chun aman i-khat khat mu ding kinemin amani phatah-in avei.
    Act 3:6 Hichun Peterin, “Keiman dangka le sana kaneipon, kanei hiche hi napenge, Nazareth Jesu Christa minin lam jot tan!” ati.
    Act 3:7 Hiti chun akhut jetlamin atuh-in akaithou leh, apettah chun akengphang te ni le akhochong dung jouse ahatdoh-in,
    Act 3:8 ama akichomin ading jangin lam ajot’in, amanitoh Houin a alut’in, avah len, akichom chomin Pathen avahchoi choi jenge.
    Act 3:9 Mipin jong ama ava le lea Pathen avahchoi choi jeng chu amu cheh-uvin,
    Act 3:10 Houin ‘Kotkhah hoi’ kiti laiya kitousahjia khutdo pa chu ahi ahetdoh phat’uvin hichepa chunga chu ipi thilsoh hitam, tin lung dong-in akicha gamtauve.
    Act 3:11 Elbai kidamsah pan Peter le John akolchah jing phat’in mipin adat mouvin, Solomon hongcha kiti laiya chun ahenguva ahung lhai khom’uve.
    Act 3:12 Peterin amu phat’in mipi agah houvin, “Israel mite, ibol’a hiche thilsoh hi nadatmouva, keini thahat le houdih jeh a ama hi lam kajotsah thei lhona nagel’u va, neivet vet jengu ham ?
    Act 3:13 Nang hon napehdoh-uva Pilate’n lhadoh dinga thu atan jouva jong a-angsung laitah a napaisau, alha-cha Jesu chu i-pu i-pateu Pathen, Abraham Pathen, Isaac Pathen, chule Jacob Pathenin achoi-at ahin,
    Act 3:14 nang hon Atheng le Adihpa chu napaiyun tolthatpa joh chu nalha-doh peh diuvin nathum’ui;
    Act 3:15 hinna Bulpi chu nathat’uvin, ahinla Pathenin Ama chu thinaa konin akaithou kittai, keiho hi ahetoh kahiuve.
    Act 3:16 Ama min a tahsan vanga hiche namu’va nahetsapau hi ama tahsanna chun ama hi adamtheng-sah hel jenga, hiche ama min’a chu nabonchau angsunga kidinsah ahi-tai.
    Act 3:17 “Tun sopite, nang hon jong navaipoteu banga hetoh louva nabol’u ahi kahenai;
    Act 3:18 chujongle Pathenin a-Messiah chun gim hesoh athoh ding thu Themgao jouse kamsunga ‘anaphondoh masah chu hitia hi guilhung ahitai.
    Act 3:19 Hichejeh chun chonset lung heiyun lang nachonset chengseu suhmanga aumna din hung kile kit’un,
    Act 3:20 chutileh Pakai angsunga konin lhagao haldoh kitna thei umdoh-in tin, Aman nang ho dia lhendohsa akoi Messiah Jesu chu ahinsol thei ding ahi.
    Act 3:21 Hiche Jesu chu Pathenin akhang khanga a-Themgao theng ho jouse kama ahinsei jing banga thil ijakai akiledohsah kit phat kah a van’a lahtouva umtei ding ahi,
    Act 3:22 Mose’n jong, ‘Pakai na-Pathen’uvin kei banga hi nasopiteu lah a kona Themgao khat natundoh peh diu ahi ; ipi hileh aman nasei-peh chanu aboncha na-ngaisoh kei diu ahi.
    Act 3:23 Koi hileh hiche Themgaopa thusei ngailou chu mipi lah a kona kisumang ding ahi,’ ati.
    Act 3:24 Samuel a pat ama nunga thusei Themgao chengsen jong tu hiche nikho ho ding hi anaphon masah sau ahitai.
    Act 3:25 Nang ho hiche Themgao ho leh, Pathenin napu napateu apeh a Abraham jah a, ‘Nangma chilhah vanga vannoi phungtin phatthei chang diu ahi,’ tia ateppeh hiche Kitepna chate chu nahiuve.
    Act 3:26 Pathenin amasaa nang ho dia alhachapa chu akai-thouva, nagit louna chengseuva kona leheisoh keiya phatthei naboh diuvin nahenguva ahinsoltai,” ati.
    Act 4:1 Peter le Johnin mipi jah a thu asei nalai lhonin, Thempu ho le Houin ngah sepai lamkaipa chule Sadducee hon ahindel vuh-un,
    Act 4:2 mipi thu ahilna lhona Jesu jal’a thinaa kona thokitna aseiphong Ihon chu athi mah ten jengun,
    Act 4:3 amani chu aman’uvin nilhah ahi-pai phat’in ajinga din mihenna in’a akhumtauve.
    Act 4:4 Ahinla athusei lhon jaa mi tampin atahsanin, amijat jong sang nga jen alhingtauve.
    Act 4:5 Ajing nikhon avaipoteu le upaho chengse le Danthu themho Jerusalema akikhomun,
    Act 4:6 (Thempu chungnung insung lhah jeng, Thempu chungnung Annas le Caiaphas toh John le Alexander ahiuve,)
    Act 4:7 amani chu alailunguvah adinsah-un, “Ipi tha neina neiya, koi min pan’a hiche hi nabol Ihon ham tin adongui.
    Act 4:8 Chutah chun Peter Lhagao Theng adimset’in ajah-uva, “Japi vaipote leh upate ho,
    Act 4:9 tunia elbaipa thilpha kibolpeh chung chang a eikidong lhona, ama iti kihuhdoh ham, kiti ahileh,
    Act 4:10 Israel mipi leh nang ho nabonchauvin kihet cheh-un, Nazareth Jesu Christa, nang hon thingpel’a nakhetbeh-uva, Pathenin thinaa kona akaithou kitpa min kipana, hichepa jeh a chu ama damthenga na angsunguva ding’ah ahi.
    Act 4:11 Hiche hi, “Insa hon napaiyu Song, Inning khomdet pen’a pang,’ kiti chu ahitai.
    Act 4:12 Chule koima dang’ah ‘huhhingna ‘aumpoi; ‘ijeh-inem itile vannoiya mihem lah a. huhhinga i-umna diuva kipea min dang him him aumpoi,” ati.
    Act 4:13 Mihon Peter le John hanje chu amu’vin, lekha them lou, mi-mol ahi lhon aheuvin adatmo lheh jengui; amavang Jesu toh kiloisa ahi lhon ahenauve.
    Act 4:14 aboldam lhonpa ma amani toh adin-khom jing amu’u leh asuhsetna din imacha abol theipouve.
    Act 4:15 Chuin amani chu akouvun Hou vaipoloi kikhopnaa kona potdoh din asol’uvin, amaho achangin akihou khomun,
    Act 4:16 “Hiche mi te ni hi iba ilo diu ham ? Ijeh-inem itile ama ni jeh a melchihna soh hi la Jerusalema cheng jouse het’a kiphong-doh ahitan, eihon jong iseilep thei pouvin,
    Act 4:17 hijongleh athu mipi lah a akithejah be louna dingin, miho koimacha jah a hiche min’a hi thu asei kit lhon louna din gihsal’u hite,” akitiuve.
    Act 4:18 Chuin amani akouvun Jesu min’a thu aseiphong thei lhon Iou ding, mijong ahil thei lhon louhelna din akhah chah tauve.
    Act 4:19 Ahinla Peter le Johnin amaho adonbut Ihonin ajah-uva, “Pathen thu sanga nang ho thu ngaijoh Pathen mitmua, dih jom, nang hon ngaitouvin;
    Act 4:20 keinin vang kamusa le kajahsa lhon chu kaseida thei lhon louhel ding ahi,” ati lhone.
    Act 4:21 Thilsoh chung chang jeh a mihon Pathen avahchoi cheh-u leh, mipi jeh chun talen peh-na theiya thepmona imala amudoh pouvin, hijongleh amani chu nasa-tah-in agihsal kit leuvun alhadoh tauve.
    Act 4:22 Achunga damsah theina thil kidang kibolpehpa ma chu akum som li val ahitai.
    Act 4:23 Alhadoh phat’un Peter le John jong aloite henga ahung Ihonin Thempu pipu ho le upabon ajah lhona agih nau thu chu asei-peh Ihontai.
    Act 4:24 Amahon ajah phat’un lung khat tah-in ogin khat’in Pathen akouvun, “Vo Pakai, van le leiset, Twikhanglen chule asunga um jouse Sempa nangma nahi,
    Act 4:25 Lhagao Thenga kona kapu-luiyu nalhacha David kama ‘Ibol’a chidang namdangte lung hanguva, Mipin pannabei thil angaitou ham?
    Act 4:26 Leiset lengte akigol’un, avaipoteu jong akikhomun Pakai le a-Messiah dou din agouve,’ tia kiseisa chu
    Act 4:27 atahbeh-in hiche khopi sunga hin thao nanusa nalhacha theng Jesu dou din, Herod le Pilate, chidang nam-dang toh chule Israel mipi geiyin akikhomun,
    Act 4:28 bol dinga nakhut tah a nagontohsa le nalungthima na-ngaito chengse chu bol ding agotauve.
    Act 4:29 Chule tun Pakai, ami gihsal nau hi vetan, chujongle nalhachate hin hangtah a nathu asei ngamna diuvin lung ngamna pen,
    Act 4:30 nalhacha Theng Jesu min’a dammo veiset akiboldama, mel-chihna tampi akiboldoh a chule thil kidang dang akisodohna din nakhut hin lhangin,” atiuve.
    Act 4:31 Hitia chu ataovu leh aum nau mun chu ahung kilingin, amaho abonchauvin Lhagao Theng acha-ngun lung ngamtah-in Pathen thu aseitauve.
    Act 4:32 Atahsan loise chu lung khatseh le hinkho khat’in aumun, koiman anei athilkeo chu amaa tuma sei louvin, abonchan akikop cheh-uve.
    Act 4:33 Thahat nasatah kengin Solchah hon Pakai Jesu thokit thu ahettohsah-un, achunguva phat-theina lentah-in aume.
    Act 4:34 Ijeh-inem itile alah-uva khat cha jong alha-sam aumpouve, lou le in neihon jong ajoh-un aman jouse chu ahin-choi khom’uvin
    Act 4:35 Solchah ho keng-bul’a akoiyun, mihon angaichat bep cheh-in ahoppeh jiuvin ahi.
    Act 4:36 Mi tilkhouva pang ahi, tia Solchah hon Barnabas asah-u, Cyprus a peng Levi mi Joseph chun
    Act 4:37 lou ching khat aneiyin agajoh-in sum chu ahinchoiyin Solchah ho kengbul’a akoiye.
    Act 5:1 Amin Ananias kiti pasal khat hin ajinu Sapphira jong anomin anei thil khat ajoh-in,
    Act 5:2 ajinu het’in thilman akeh khat akikoiyin, akeh khat chu ahinchoiyin Solchah ho kengbul’a akoiye.
    Act 5:3 Hichun Peterin, “Ananias, ibol’a nalung sung Satan nalo dimsah a Lhagao Theng najoulhep’a, gam man akeh khat chu nakoiden hitam ?
    Act 5:4 Najoh masanga nanga ahibanga najoh nunga jong nanga chu nathu thu hilou ham ? Ibol’a hitobang thil hi nalungthima navop ham? Mihem hilouva Pathen najoulhep ahi-bouve!” ati.
    Act 5:5 Ananias chun thu hicheng hi ajah jah chun alhun athitai; hichea hin ajapha jouse chunga kichatna lentah ahung lhungtan ahi
    Act 5:6 Gol-lhang ho ading-doh-un along chu atom’uvin chule apodoh-un agavuitauve.
    Act 5:7 Nidan thum don nungin thilsoh umchan hepha louvin ajinu ahung lut’e.
    Act 5:8 Peterin amanu ana-houvin, “Seitemin, hijat man a bou hi gam chu najoh Ihon ham?” ati-leh; amanun, “Henge, hijat ahi nai,” ati.
    Act 5:9 Chuphat’in Peterin ajah a, “Ibol’a nangnin Pakai Lhagao patep dia nagot lhon ham ? Ven, najipa vuiho kotpi phung ahung geitauve, nang jong napohdoh pai diu ahitai,” ati.
    Act 5:10 Amanu jong alhu paiyin Peter kengbul’a athidentai. Gollhang ho ahung lut’u leh amanu athisan ahung toh-un, along chu apodoh-uvin ajipa koma agavuitauve.
    Act 5:11 Chutah chun Houbung pumpi le athilsoh ho japha chan chunga kichatna lentah ahung lhungtai.
    Act 5:12 Mipi lah a melchihna le thil kidang tampi Solchah hon akhut tah-uvin aboldoh doh jengun, chujongle lung khat tah-in Solomon hongchaa chun aum cheh-ui.
    Act 5:13 Midang koiman amaho jop ding a-ngap chatapon, ahinla mipin aseipha jing nauvin,
    Act 5:14 hijeh chun mipi lah a Pakai tahsan tahbeh ho pasal’in jong numeiyin jong abe jingun,
    Act 5:15 Peter ahungle tengleh ale beh achunguva achuh khahna din, dammo veise jouse khosung lam- len dunga ahinpodoh-un khunpeh chung le pheh dunga alupsah-ui.
    Act 5:16 Jerusalem kimvel khopi dunga mipi ahung kikhom’un, dammo veise jouse le Ihagaoboh vop ho ahinpuiyun, abonchan aboldamsoh keiyui.
    Act 5:17 Thempu chungnung chu chu-pet’a Sadducee loi lah a aloite chengse chutoh akipatdoh-in, athang tom behseh jengun,
    Act 5:18 Sol-chah ho chunga khut alhauvin, aman’un, lhangpi kihenna in’a akhumtauve.
    Act 5:19 Ahinla hiche jan chun Pakaiya kon Vantil khat’in songkul kotkhah ahongin amaho apuidoh-in ajah-uva,
    Act 5:20 “Cheuvin Houin a ga dingun lang hiche Hinna thudol hi abonchan gaseipeh tauvin,” ati.
    Act 5:21 Hiche ajah phat’un khovah lhah-in Houin a alut’uvin thu agahiltauve. Thempu chungnung chunla aloite chengse toh ahungin Israel chate Hou vaipoloi upa chengse toh Hou-thua kikhopna abol’un, amihenho’u gakailut dingin songkul’a mi asol’ui.
    Act 5:22 Vaihom asol ho’u ahungu leh Solchah ho chu songkul sunga aga-mu tapouvin, ahung kile kit’uvin athudol aphongun,
    Act 5:23 “Songkul kaga Ihun’un kotheh chengse phatechan akiheh-in songkul ngah ho jong kotpi phung dunga ading cheh-un, kot kahondoh phat’un la asunga koima kamupouve’” atiuve.
    Act 5:24 Athu-seiyu hi Houin ngah sepai vaipopa le Thempu pipu loiyin ajah phat’un Solchah ho chu iti hiuva hichea hi ipi hungsoh hitam, tin alunggel’u abeihel tai.
    Act 5:25 Hichepet hin mi khat ahenguva ahungin, “Ven, songkul’a namihen ho’u khu, Houin a ading-un mipi thu ahil’uve,” ati.
    Act 5:26 Chu-phat’in Houin ngah sepai vaipopa le vaipoloi chengse akon’un amaho agakailut’uvin, mipi akichauvin songa ase louna diuvin pumhat’in vang abolpouve.
    Act 5:27 Solchah ho ahinkailut phat’un Hou vaipoloi kikhopna adinsah-un, Thempu chungnungin amaho adongin,
    Act 5:28 “Hiche min pan’a mi nahil louhelna diuva hachang kham-a nakikhamu ahin, ahinla ven, hiche nathuhil’u hi Jerusalem na-dipsoh hel’un, hiche mipa thisan phu hi keiho chunga lhut khum din neigouve !” atiuve.
    Act 5:29 Ahivangin Peter le Solchah hon adonbut’un, “Mihemho thu hilouva Pathen thu joh a kanun tei tei diu ahi.
    Act 5:30 Ipu ipateu Pathenin thinga nakhai sanguva nathasau Jesu chu akaithouvin,
    Act 5:31 Israelte achonset chengseu ngaidama aumna dia chonset lung heina apehna din ama chu Pathenin ama jetlama vaipo le huhhingpan achoisangtai.
    Act 5:32 Hiche thu ho ahetoh a chu Pathenin athua nung ho apeh Lhagao Theng le keiho kahiuve,” atiuve.
    Act 5:33 Ajapha chan alung hang beh-seh jengun Solchah ho chu thadoh jeng din akiloltauve.
    Act 5:34 Hichun Hou vaipoloi lah a Pharisee mi, amin Gamaliel kiti, Danthu hilthem, mi jousen ajasohkei, ama chu ading-doh-in Solchah ho chu phat chom khat polama soldoh dingin aseiyin,
    Act 5:35 chuin Hou vaipoloi jah a, “Hiche miho chunga hi ipi bol ding natiu ham kichih theiyun.
    Act 5:36 Ijeh-inem itile tu masangin jong Theudas kiti mi khat anaumin, ama le ama i-khat hidannin akiseiyin, pasal phabep jen, ja li bangin ajop’uvin, ahinla ama atha phat’un anungjui chengse akithe chehsoh-in, imacha lou asoh tai.
    Act 5:37 Hiche nung hin leiset mi kisim laiyin Galilee mi Judas ahung kipan kit’in, mipi phabep geiyin akijuisah-e; ama jong hi amang thah tan, anungjui chengse jong akithecheh tauve.
    Act 5:38 Hijeh a chu tu hiche thua jong kaseipeh nahiuve, hiche mihoa kon hin kikangseuvin lang don dauvin, ijeh-inem itile hiche jong hi mihema kon le lunggel chule natoh ahile kisumang thou ding ahi;
    Act 5:39 Pathena hungkon ahivangleh nasuh mang jou lou diu ahin, ajo leh Pathen kidoupi nahilo diu ahi,” ati. Gamaliel thun anungun,
    Act 5:40 Solchah ho chu akou lut’uvin, avoh jouvun Jesu min’a thu asei louhelna diuvin hatah-in agihsal’un alhadoh tauve.
    Act 5:41 Solchah ho chu Hou vaipoloi kikhopna maiya konin achedoh-un, chuche Min jal’a hesoh genthei thoh a kiloma akibol’u chu akipah lheh jengui.
    Act 5:42 Niseh-in Houin le a-in tin’uva tang louhel’in thu ahil’un, chule Jesu chu Messiah ahi Kipana Thupha aseiphong jingui.
    Act 6:1 Hiche lai chun seijuiho mijat apunbe cheh cheh phat’un niseh a thil kihopnaa ameithaiho’u anah-sah peh pouve, tin Greek pao tho Juda-numeiho chu Hebrew mite chunga aphun’un, akah-uva kinahna asodoh tai.
    Act 6:2 Chuphat’in som le ni chun seijui jouse akoukhom’un, “Keihon Pathen thu seiphong ka-ngah-uva dokhanga ankong sem’a kapan diu adihpoi;
    Act 6:3 hijeh chun sopite, hiche kin’a kapansah diuvin, nalah-uva konin Lhagao le chihna dim mia nahettohsau sagi lhengdoh-uvin;


    Dostları ilə paylaş:
  1   2   3   4   5   6


Verilənlər bazası müəlliflik hüququ ilə müdafiə olunur ©muhaz.org 2017
rəhbərliyinə müraciət

    Ana səhifə