Act : Vo Theophilus, thu masa chu Jesu thilbol le, thuhil aboncha akipattil’a pat



Yüklə 146,58 Kb.
səhifə2/6
tarix17.08.2018
ölçüsü146,58 Kb.
#71308
1   2   3   4   5   6
Act 6:4 chuteng keiho tah vang taona le hil lhang kin’a kipumpeh jo’uvinge,” atiuve.
Act 6:5 Athu chu mipi maiya lung lhai aumin, hijeh chun tahsan le Lhagao Thenga dim Stephan toh, Philip le Prochorus, Nicanor le Timon, Parmenas le Juda houva kilalut chidang tiamdang mi Antioch khoa hung Nicolaus alhengdoh-un,
Act 6:6 amaho chu Solchah ho angsunga adinsah-u leh, Solchah hon ataopeh-uvin achunguva khut a-ngamtauve.
Act 6:7 Hichun Pathen thu achaljah tan, Jerusalema seijuiho mijat ha-punin apungin, Thempu ho lah a tamtah jong tahsan thun anung tauve.
Act 6:8 Stephen chu lungset le thahat adimtan, mipi lah a melchihna le thil kidang lentah tah aboldoh tai.
Act 6:9 Hichun akiminvo na banga cham-Ihat miho Houthua kikhopna in kitia konin mi phabep, Cyrene gama, Alexandria, Cilicia le Asia a hung kon ho akipatdoh-un Stephen chu akinelpiu leh,
Act 6:10 aman chihna le Lhagao thu asei chu anel thei tapouve.
Act 6:11 Chuphat’in amahon mi phabep, “Ama nin Mose le Pathen taitomna thu asei kajauve,” tia sei dingin atilseuvin ahi.
Act 6:12 Hiti chun mipi le upa ho, Danthu themho aban tilset’uvin, amaho achunga achu’vin, aman’un Hou vaipoloi kikhop-naa akailut’un,
Act 6:13 jouthua hettohsah-na bol din mi tampi adinsah-uvin, amahon, “Hichepa hin Muntheng le Danthu douna thu tang louhel’in asei sei jengin,
Act 6:14 Nazareth Jesun hiche mun hi asuhmanga Mose’n eipeh-u chondan ho hi akheldoh ding ahi,’ tia asei jong kajauve,” atiuvin ahi.
Act 6:15 Hichun Hou vaipoloi kikhopnaa tou chengsen Stephen chu avesoh keiyun ahileh amai chu Vantil maiso bangin amu’ve.
Act 7:1 Thempu chungnungin, “Hi-chengse hi hiti mong ham?” atileh;
Act 7:2 Stephenin adonbut’in, “Ngaiyu-vin sopite le pate ho: Penna bul-pipa Abraham chu Haran a cheng dia ache masang, Mesopotamia gama achen laiyin loupina Pathen ahenga ahung kilah-in
Act 7:3 ama jah a, ‘Nagam leiset le naphung mite dalhan potdoh-in lang keiman kavetsah ding gam jonin chetan,’ ati.
Act 7:4 Hijeh chun ama Chaldea gama konin achen Haran a achengtai. Apa thi nungin tua nachen nau hiche gamsunga hin akichon lut-sah-in,
Act 7:5 ahinla agam leiset halsi khat, kengpeh thol jeng cha jong ama din apepoi; cha anei lou vangin, agam chu ama le anunga achilhahpa apeh din thu anatep’e.
Act 7:6 Pathenin hiti hin achilhah te chu mi gama gapem’uva, mihon sohna atohsah diu, genthei hesoh a abol diuvin aseiye.
Act 7:7 Pathenin aseiyin, ‘Amahon sohna agatoh peh-u nam mite chu thu katan khuma, chujou teng Abraham chilhahte hung kitoldoh-uva hiche lai mun’a Keima kinbol’a eihou diu ahi,’ ati ahi.
Act 7:8 Chuin Abraham chu cheptan ding kitepna thupeh apen, hijeh chun Isaac ahingin niget nin chep atan-peh-in, Isaac-in Jacob, Jacob’in penna pate som le ni ahingin chep atanpeh-e.
Act 7:9 “Penna pate chu Joseph chunga athang thip’un Egypt gama ajoh mangun, ahile Pathenin aumpi jingin,
Act 7:10 ahesoh genthei tin tanga konin ahin-huhdoh peh-in, Egypt lengpa Pharaoh ang’a lungset le chihna apen, hijeh chun lengpan Egypt gam pumpi le ama insung pumpia vaipon asemtai.
Act 7:11 Hichun Egypt gam pumpi le Canaan gam pumpia kel alhan, gentheina lentah ahung, lhungin, i-puteuvin neh le chah akimu joutapouve.
Act 7:12 Hichea hin Jacob’in Egypt gama anneh aume, ti ajah phat’in i-puteu chu khatvei chan nan agah solpai jenge.
Act 7:13 Anivei chan nan Joseph-in asopite akihetdohsah tan, Jacob insung chu Pharaoh geiyin ahetai.
Act 7:14 Chuphat’in Joseph-in jong apa Jacob le a-inkote mihem som sagi le nga jen chu gakou din mi asol’in,
Act 7:15 Jacob jong Egypt’a ahungsuh tai. Hichun ama ahin i-puteu ahin athitauvin,
Act 7:16 alongu chu Shechema alepoh-uvin, Shechem muna Abrahamin Hamor chatea kona dang-kaa achohsa lhan’a chun avuitauve.
Act 7:17 “Pathenin Abraham koma akihahsel’a athutep phat chu ahung lhin pai ding phat’in, Egypt gama mipi apungtel tul jengun,
Act 7:18 Joseph hephalou leng chom khat hung letdoh geiyin apunguve.
Act 7:19 Leng-chompa hin ijat miteu heltah-in dohan abol’in, i-pu i-pateu chu achasen jouseu ahing aum louna din acham louvun polama apaidoh sah jenge.
Act 7:20 Hiche lai tah hin Mose apengin Pathen din it aum lheh jenge; lha thum sungin apa insunga avah-un,
Act 7:21 ama jong apaidoh phat’uvin Pharaoh chanun akilah-in achapa vah-in ahin kivahdoh tai.
Act 7:22 Mose chu Egypt mite chihna jouse ahil’un, athusei jouse le anatohna chan a pheltah ahiye.
Act 7:23 “Mose chu kum som li alhin phat’in asopi Israel chate gavil ding alungthima aumdoh tai.
Act 7:24 Mi khat hi adih loutah a kibol amun, ama chu akithopin aphu lahnan Egypt mipa chu athattai.
Act 7:25 Mose gel’a chu Pathenin ama khut mangchaa amaho chu huhhingna apeh got ahi asopi ten kihetnah tau atileh, amahon ahepouve.
Act 7:26 Ajingin ahenguva ahung kit leh mi ni akina lhonin, aman akah lhona chamna thu aseiyin, ‘Mi te ni, sopi cha hilhona ibol’a khat’in khat adih louva kibol nahi lhon ham ?’ ati.
Act 7:27 Ahinla a-in-hengpa adih louva bolpa joh chun Mose chu asondoh-in, ‘Keiho chunga vaipo le thutana kon natun beh am ?
Act 7:28 Janhia Egypt mipa natha banga chu tha ding neigot ham ?’ ati.
Act 7:29 Hiche athusei jeh hin Mose ajam-in Midian gama agapemin, hikoma chun chapa ni agahinge.
Act 7:30 “Kum som li lhinin Sinai mol gamthip laiya Vantil khat hamboh lah meikongin Mose henga ahung kilah-e.
Act 7:31 Hiche thil amu hi Mose’n adatmon, ga ve chen dia anailut leh Pakai o ahung gingin,
Act 7:32 ‘Keima napu napate Pathen, Abraham le Isaac chule Jacob Pathen kahi,’ ati.
Act 7:33 ‘Nakeng te nia konin nakeng-chot te ni sut lhan, ijeh-inem itile nadinna chu muntheng ahi.
Act 7:34 Egypt gama kamite kibolsetna kaven kamu chentai, chule apen gin’u kajan apuidoh diuva hung kumlha kahi; hijeh chun tun hungin Egypt’a kasol ding nahi,’ ati.
Act 7:35 “Hiche Mose amahon apai-dal’uva, ‘Vaipo le thutan a kon natun beh am ?’ atipau, hichepa tah hi Pathenin hamboh lah a ahenga hung kilah Vantil ban thahat’a amaho vaipo le huhdoh din asoltai.
Act 7:36 Amahin Israelte ahinpuidoh chun Egypt gama jong Twikhanglen san mun le gamthip noiya kum som li sungin thil kidang dang le melchih-na tampi anabol’e.
Act 7:37 Hiche Mose hi ahiye Israel chate jah a, ‘Pathenin nasopiteu lah a kei tobang Themgao khat natundoh peh diu ahi,’ tia sei chu.
Act 7:38 Gamthip laiya Houbunga anapanga, i-pu i-pateu toh pang khoma Sinai mol’a Vantil toh kihouva, eiho pehson dia hinna Thupeh lapa chu ama hi ahin,
Act 7:39 i-pu ipateu ama noiya alut nom pouvin, asondoh-un alungthim-un Egypt lam angai cha jingun,
Act 7:40 Aaron jah a, ‘Kamasanguva lam- kai din pathen lim tobang ho nei-sempeh-un, ajeh chu Egypt’a kona eihin puidoh pau hiche Mose chu achunga ipi soh hitam kaheta-pouve,’ atiuvin ahi.
Act 7:41 Hiti chun amahon hiche lai hin bongnou lim asemun, hiche koma hin kilhaina abol’uvin, akhut’a asemsau thil ho ja nan golnop abol’uve.
Act 7:42 Hijeh chun Pathenin akihei mang khumin van’a ahsite hou din amaho chu apedoh-in, Themgao ho lekhabua kisun bangin: ‘Vo Israel insung mi, kum som li sung gamthip laiya Sa thao le kilhainaa neihou louvu hilou ham ?
Act 7:43 Moloch houna ponbuh po leuvin, Rephan ahsi pathen iimsemthu napo leuvin Hiche nasemsau thil ho hi houdin nago meu ! Hijeh a chu Babylon kal’a katolmang diu nahiuve,’ akiti.
Act 7:44 I-pu i-pateuvin gamthip laiya, Alim kigon namu bang bangin ponbuh san,’ tia Mose jah a thusei Pathenin avetsah hettohsah na Houbuh chu aneiyun,
Act 7:45 hiche hi i-pu i-pateuvin alason’un, Joshua lamkainaa Pathenin i-pu i-pateu masanga chidang namdangte ano-doh a amahon gam alo lai geiyun ahinpo lut’uvin, David nikho lai geiyin aume;
Act 7:46 David chu Pathen angsunga lungset achanjeh-in Jacob Pathen Inmun amudoh din athume.
Act 7:47 Ahinla in chu Solomonin asahpeh bouve.
Act 7:48 Ahivangin Chungnungpen chu khut’a kisa in’a achengpoi, hichea hin Themgaopan :
Act 7:49 ‘Pakaiyin, “Van kalaltouna ahin, Leiset kakengto ngapna ahi; Nangin itobang in neisah peh ding ham? Kacholdo mun ding hoikom ham?
Act 7:50 Ijakai keiman kakhut tah a Kasemsa hilou ham?” tin aseiye,’ ati.
Act 7:51 “Milou chalte, lungthim le nabeng te nia cheptanlou ho tobang, napu napateu bangin nang hon Lhagao Theng nadoudal jing jengui.
Act 7:52 Napu napateuvin Themgao koi-pen bolset louva akoiyum ?Alhacha Theng hung masanga anaseiphong masa chengse athat’uvin, nang hon tun ama najoh doh-un nathattauve,
Act 7:53 chule Vantiltea kona Danthu kilahson nang ho nahiuvin, nit la nanit pouve,” ati.
Act 7:54 Asei chengse ngaiho chu alungthimu . atongkhan athimah cheh-un Stephen chu ha agoikhum cheh-uve,
Act 7:55 Stephen vang chu Lhagao Thengin adim pai jengin, van lam , agah vet leh Pathen loupina le Pathen jetlama Jesu adin amun;
Act 7:56 “Ven, van akihon’a Mihem Chapa chu Pathen jetlama ding kamui!” ati.
Act 7:57 Chutah chun amahon hahoh-in ahoh-uvin anabeng akisip cheh un, ahonjangin adel lut’uvin,
Act 7:58 khopi polama aleh doh-un songin aseptauve. Ahetoh a pang hon Saul kiti gol-lhang khat kengbul’a apon-sil’u akoiyuve.
Act 7:59 Mihon Stephen songa asepet’u chun aman ahin-samin, “Pakai Jesu, ka-lhagao lan !” tin aseiye.
Act 7:60 Hichun aboh khup’in oging tah-in asamin, “Pakai, hiche chonsetna hi amaho chunga sim-dan!” ati. Hiche hi aseiyin akijam-dap deltai.
Act 8:1 Hiche nikho hin Jerusalema Houbung chunga hesoh gentheina lentah achutan, Solchah ho tilou adangse Judea gam le Samaria gama ajamchehsoh heltauve.
Act 8:2 Hou-gut mi phabep’in Stephen chu avuiyun, hakan akauve.
Act 8:3 Saul vang chun Houbung suh-mangna din in tin’a alut’in numei pasal aman’in ajendoh doh jengin songkul’a. akhum thu thui.
Act 8:4 Mi ajamcheh ho chu avah leuvin Kipana Thupha thu asei-phongin apangjo tauve.
Act 8:5 Philip jong Samaria khopia achesuh-in miho jah a Messiah chu aseiphong-tai.
Act 8:6 Mipi hon asei chengse ajah uva melchihna abol ho amu phat’un lung khat tah-in Philip thuseiho chu lung lut cheh-in angaiyui.
Act 8:7 Ajeh chu mi tamtah a konin lhagaoboh ho hapenin apeng-un ahung potdoh doh jengun, langthi ho le elbai ho geiya dam-doh doh jeng ahiuvin,
Act 8:8 khopi sunga chun kipana tampi asohdoh tai.
Act 8:9 Khopi sunga hin amin Simon kiti mitphel doithem khat aumin, Samaria jat mite chu mitpheldoi avetsah a ama le ama i-khat hiya kiseilen lheh ahin,
Act 8:10 ama hi aneova pat alen geiyin lung lut tah-in athu angaiyun, “Hichepa hi Pathen thahat Chungnung kiti chu ahi,” atiuve.
Act 8:11 Phat sottah amitpheldoi chu amaho kidang tah a avetsah jing jeh-in lung khat tah-in angai nasauve.
Act 8:12 Ahin Philip’in Pathen Lenggam le Jesu Christa mina Kipana Thupha aseiphong tahsan chengse chu numei jong pasal jong baptize achansahtai.
Act 8:13 Simon ama-tah jengin jong atahsanin, baptize achan jouvin Philip toh akiloiyin, melchihna le tha neina nasatah tah a thil kidang abol ho amu leh adatmo lheh jengin ahi.
Act 8:14 Jerusalema um Solchah hon Samaria khopin jong Pathen thu akisantauve, ti ajah phat’un aheng-uva Peter le John asolpeh-un,
Act 8:15 amani ahung suh lhonin amaho chu Lhagao Theng achan theina diuvin ataopeh lhone;
Act 8:16 ajeh chu Pakai Jesu min’a baptize chang bep ahinalaiyun, alah-uva khat beh jong Lhagao Theng chang loulai ahi.
Act 8:17 Chuin Peter le Johnin achunguva khut a-ngap lhon leh Lhagao Theng achangtauve.
Act 8:18 Solchah te ni khut ngap’a kona Lhagao Theng kipeh chu Simonin amun amani chu sum apen,
Act 8:19 “Ken jong koi hileh achunga khut ka-ngap chan Lhagao Theng achanna din hiche tha neina hi neipe lhonin,” ati.
Act 8:20 Ahinla Peterin ajah a, “Na-sum le nangma manthan, Pathen thilpeh suma chohjou dol’in nagel-’in ahi!
Act 8:21 Pathen maiya nalung-thimput adih loujeh-in hiche thua hin namu jong aumpon, chan jong naneipoi.
Act 8:22 Hijeh chun hiche nathilse gel’a kon hin lung heiyin, nalungthima hitobang nagel hi a-ngaidam theina din Pakai henga taovin
Act 8:23 ijeh-inem itile cheikha khaveng vung banga kha adih louva kihen nahi kamui,” ati.
Act 8:24 Simonin adonbut’in, “Nasei chengse hi khatcha kachunga achuh louna din nangnin Pakai henga kei khel’in neitaopeh Ihonin,” ati.
Act 8:25 Peter le Johnin Pakai thu ahettohsah lhona aseisoh phat Ihonin Jerusalema ahung kile kit Ihonin, Samaria miho kho tamtah a Kipana Thupha aseiphong peh Ihone.
Act 8:26 Pakaiya kon Vantil khat’in Philip jah a thu aseiyin, “Kipat-doh-in lang Jerusalema kona Gaza jotna lamlena khun lhanglama chesuh temin,” ati; alam len chu donlouva kikoithip ahitai.
Act 8:27 Philip jong akipat’in acheleh ven, Ethiopia mi nukiso, Ethiopia lengnu Candace Semangpa, agou chengse chunga vaihom, Jerusalema Pathen hou dia hung,
Act 8:28 akile kit lamin akangtalai chunga atounaa Isaiah Themgao lekhabua asim’e.
Act 8:29 Hichun Lhagaovin Philip jah a, “Chen lang hiche kangtalai khu lhonpin,” ati.
Act 8:30 Hijeh chun Philip alhailut jeng leh Isaiah themgao lekhabu asim gin ajan, hichun, “Nasim chu na-het hinai ?” atileh ;
Act 8:31 aman, “Hoiya, mi khattouvin eihilchet louleh iti kahet ding ham?” atin, Philip chu hung ‘kaldoh a amatoh toukhom din agah kouve.
Act 8:32 Aman Pathen lekhabu asimna lai mun chu hiche hi ahi: “Ama chu tha dinga kikai kelngoi bang le Kelngoi nou amulvoupa ang’a paopoh lou bangin Kam cheng khat jong keh louvin aum’e.
Act 8:33 Kineosahnaa thu adih-in atanpeh pouvin, Ama khanggui hi kon asei ding hitam? . Ajeh chu leiset’a kona ahinkho kiladoh ahitai,” kiti lai ahi.
Act 8:34 Nukisopan Philip agah hou-vin, “Neihil chen temin, Themgao-pan ama chung chang thua ha, midang khattou thua hiche hi asei ham’?” ati.
Act 8:35 Chutah-in Philip apaodoh-in Pathen lekhabua panin Jesua Kipana Thupha aseipeh tai.
Act 8:36 Lampia ahung kijot jot lhon leh twi veina khat’a ahung Ihonin, nukisopan agah houvin, “Ven twi hi, baptize kachanmona ding ipi um am ?” atileh;
Act 8:37 Philip’in ajah a, “Nalungthim pumpia natahsan leh baptize chang theiyin nate,” ati. Aman, “Jesu Christa chu Pathen Chapa ahi, ti katahsan nai,” ati.
Act 8:38 Chuin nukisopan kangtalai chu angah din aseiyin, anilhonin akumlha Ihonin twi lah a chun Philip le nukisopa alut lhonin Philip’in nukisopa chu baptize achansah tai.
Act 8:39 Twi lah a kona ahung kaldoh phat Ihonin Pakaiya kon Lhagaovin Philip chu alhoh mangin nukisopan amukit tapon, ahivangin ache na lampia kipah tah-in achepaitai.
Act 8:40 Ahinla Philip chu Azotus khopia akimudoh-in, chule aman Caesarea alhun kahsen achepeh-in Kipana Thupha asei-phongpeh-e.
Act 9:1 Saul chula Pakai seijuite gihsal le that din ahai let lut nalaiyin, Thempu chungnung heng a achen,
Act 9:2 chuche Lampia kai jouse chu koi koi hijongleh numei pasal amudoh chan kan’a Jerusalema ahinkai lut theina din Damascus khopia Houthua kikhopna in dunga peh din lekha agathume.
Act 9:3 Acheleh Damascus khopi ahin-phah ding konin phot lot louvin van’a konin vah khat’in akimvel asalvah soh jengtai.
Act 9:4 Hichun ama tol’a akileh lhan, ogin khat’in ajah a, “Saul, Saul, ibol’a nangin neibol-set set ham ?” ati.
Act 9:5 Ahinla aman, “Vo Pakai, nang koi nahim ?” atileh ; Aman, “Keima nabolset jing Jesu chu kahi;
Act 9:6 hijongleh kipatdoh-in lang khopi sunga khun lut’in, chuteng ipi nabol ding kiseipeh nan nate,” ati.
Act 9:7 Alhonpi miho chu paopoh uhsa beihel’in ading thip chet’un, ogin chu aja nauvin koima amupouve.
Act 9:8 Saul chu tol’a konin ahung dingdoh-in amit te ni ahasah vangin imacha amuta-pon, hijeh chun mihon akhut’in akaiyun Damascus khosunga apuilut tauve.
Act 9:9 Nithum sungin kho mu louvin aumtan, nelou donlou-vin aumtai.
Act 9:10 Damascus khopia hin amin Ananias kiti seijui khat aumin, Themgao thilmua mu aneinaa Pakaiyin ajah a, “Ananias,” atileh; aman, “Ven Pakai ka-um’e,” ati.
Act 9:11 Hichun Pakaiyin ajah a, “Kipat’in lang, ‘Lamjangpet kiti khosung lamlen khu jonin, Judas in’a Tarsus a hungkon Saul kitipa chu gaholin; ven, ama ataopet ahin,
Act 9:12 aman Themgao thilmua mu aneina Ananias kiti mi khat hunga kho amukit theina dia achunga khut a-ngap ding amui’,’ ati.
Act 9:13 Ahinla Ananias chun adon-but’in, “Pakai, hiche mipa thudol itobang tah a Jerusalema nami-thengte ijat’a abolset hitam, ti mi tamtah a kona kijataa;
Act 9:14 chule hichea nangma min pan’a tao jouse jong matna ding Thempu pipu hoa kona thu neina anei ahi,” ati.
Act 9:15 Ahivangin Pakaiyin ajah a, “Chen, ama hi namdangte le leng ho, chule Israel chate angsunga kamin po le dia manchah a kalhen ahi;
Act 9:16 ijeh-inem itile Keima min jal’a ijatvei hesoh genthei athoh ding jong kavetsah ding ahi,” ati.
Act 9:17 Ananias chu achen insunga alut’in Saul chunga khut a-ngamin, Sopi Saul, Pakai, lampia nahenga hung kilah Jesu chun kho namukit theiya Lhagao Theng nadimsetna dinga eihinsol ahi,” ati.
Act 9:18 Apettah chun amit te nia konin nga lip tobang ahung pul lhan ahileh kho amukittan, chuin akipatdoh-in baptize achangin,
Act 9:19 an aneh le atha akile kittai.
Act 9:20 a pet pet chun Houthua Kikhopna in dung jousea Jesu kiti hichepa chu Pathen Chapa ahi, tin asamle tai.
Act 9:21 Ahin asei japha chanin adatmo lheh jengun, “Jerusalema hiche min’a tao jouse subei hei hoi chu hichepa hi hilou hiya, chule amaho chu kanchom’a Them-pu pipuho henga akailut theina dinga hung hilou ham ?” atiuve.
Act 9:22 Ahinla Saul chu asei ahattou tel tul tan, Jesu chu Messiah ahi-mongtai, tin Damascus khopia Juda ho chu anelkhupsoh keiye.
Act 9:23 Nikho sot thimpi nungin Saul that din Juda ho akihousom’un,
Act 9:24 athilgonu hi Saul’in ahedohtai. Saul thana din khopi dongkot jouse asun ajanin a-ngah-un,
Act 9:25 ahivangin janin aseijuiten pol-langa akhumun kulpi pang’a akhai-Ihatauve.
Act 9:26 Jerusalema ahung phat’in seijuite toh kiloikhom ding agon, ahinla amahon Saul chu seijui khat hi dia atahsan loujeh-un aki-chauve.
Act 9:27 Hichun Barnabas-in Paul solchah ho henga apuiyin, ajah-uva itobanga lampia chu Pakai amu’a, Pakaiyin ajah a thu aseiya, chule Damascus khopia chu aman itobang tah a hangsan’a Jesu min’a thu asei ahilchen- tai.
Act 9:28 Hichejeh chun Saul jong amahotoh Jerusalema alut le apot len, hangsan tah-in Pakai minin thu asei len,
Act 9:29 Greek’ chon’a chon Juda ho akihoupin akinel pin, hijeh chun tha din agot lotauve.
Act 9:30 Ahinla sopiten ahetdoh phat’un Saul chu Caesarea ahinpuisuh-un Tarsus lama asolmang tauve.
Act 9:31 Judea le Galilee chule Samaria gam pumpi Houbunga vang chamna alengtan, akiphut det cheh cheh-in, Pakai gingin aumin, Lhagao Thengin lhamonin, panpin amijat apungtel tul’e.
Act 9:32 Peter chu gamtin’a ava le naa Lydda a mithengte heng geiyin ahungtai.
Act 9:33 Hichea chun Aeneas kiti mi khat amudoh-in, ama chu langthia kum get jen jalkhun’a kijam ahi.
Act 9:34 Amapa jah a hin Peterin, “Aeneas Jesu Christan nadamsah ahitai, kipatdoh-in lang nalupna kigot’in,” atileh; ama aki-patdoh pai jenge.
Act 9:35 Hichu Lydda le Sharon a cheng jousen amu’vin Pakai lama akiheisoh tauve.
Act 9:36 Joppaa chun seijui numei amin Dorcas ahi tia Tabitha kiti, thilpha bol le thilpeh a thalhingtah khat aum’e.
Act 9:37 Hiche lai hin amanu anan athitai; mihon asil jou phat’uvin indan chungnunga alupsah-ui.
Act 9:38 Lydda hi Joppa komcha ahi-jeh-in seijuihon Peter Joppaa aum ahet phat’uvin mi ni asol’un, “Lungset’in kinomsot louhel’in kahenguva hung jengin,” tin aga ngehsah-uve.
Act 9:39 Hijeh chun Peter jong akipatdoh paiyin amanitoh akilhonin, ahung lhun phat’in mi hon indan chungnung chun, apuitouvun, meithai jouse athinu kim-vel’a adingun akap-un, Dorcas-in ahin laiya akhuipeh-u sangkhol ho le sangkhollen ho chu Peter avet- sah-uve.
Act 9:40 Ahin Peterin amaho chu abonchauvin polama anodoh-in aboh khup’in ataovin, chuin along lam ngan akiheiyin, “Tabitha thouvin,” ati. Chutah-in amanun amit te ni ahasah leh Peter amun, athoudoh tai.
Act 9:41 Chuin Peterin akhut apeh akaidingin, mithengte le meithaiho chu akouvin amanu chu ahingin amaho apetai.
Act 9:42 Athu hi Joppa gam pumpia akihesoh tan, mi tampin Pakai atahsanlo tauve.
Act 9:43 Peter chu Joppa khoa savun sempa Simon in’a nikho tamtah anichonge.
Act 10:1 Caesarea chun amin Cornelius kiti, Italy sepailoi atiu sepai jalamkai khat aumin,
Act 10:2 ama hi hougut tah, ama le a-insung mi aboncha Pathen gingte, miho thil-peh a hongphal tah, chule Pathena tao jing ahi.
Act 10:3 Amahin nikhat ni-Ihah lam nidan thum donin Themgao thilmua mu aneinaa Pathena kon Vantil khat ahenga hunga ajah a, “Cornelius,” ahinti kichentah-in amui.
Act 10:4 Comelius-in kicha tah-in mit lha louhel’in Vantil chu aven, “Ipi ham Pakai ?” tia ahouleh, aman ajah a, “Nataona ho leh mi nakhotona ho chu het jing din Pathen angsunga alhung toutai.
Act 10:5 Chule tun Joppaa mi sol’in lang Peter kiti Simon chu gapuisah tan;
Act 10:6 ama chu Twikhanglen pang’a cheng savun sem Simon in’a alhunge,” ati.
Act 10:7 Ajah a thusei Vantil chu apotdoh phat’in Cornelius-in insung lhacha mi ni leh hougut tah, ama vengtup’a pang sepai ho lah a khat akouvin
Act 10:8 thilsoh ijakai ahilchensoh phat’in amaho chu Joppaa asoltai.
Act 10:9 Ajing nikhoa amahon Joppa khopi ahinphah ding kon’un sun nidan som le ni donin Peter chu inchunga tao dingin akaldohtai.
Act 10:10 Peter agilkela an aneh nom phat’in, neh ding agotpeh-u leh agaochangin,
Act 10:11 van kihonga thil phenghep hop khat aning lia kikhit’a Ieiset’a hung kikhai lha amun,
Act 10:12 asunga chun Ieiset’a ganhing namkim, avah le akithol tho chule chunga leng adimset’uve.
Act 10:13 Hichun ahenga o-khat ahung gingin, “Peter, kipat’in that’in lang nen,” ati.
Act 10:14 Ahinla Peterin, “Hithei hih hel’inte Pakai, keiman itih-in jong thilboh le atheng louho kane ngai-poi,” ati.
Act 10:15 Ahivangin o-gin chun ani-vei nan ajah a. “Pathenin asuh thengsa chu bohsah hih-in,” ati.
Act 10:16 Hitobang hin thumvei akibol’in chuin thil chu van lama akitol toutai.
Act 10:17 Peter agaochan’a thil amu chu ipi ti na hintem tia aki-ngaito pet tah-in ven, Cornelius mi sol ho chun Simon in ahol’un kelkot maiya adingun
Act 10:18 ahinkouvun, Peter kiti Simon chu chukoma alhun alhun lou adongui.
Act 10:19 Peterin agaochan thudol agel pettah hin Lhagaovin ajah a, “Ven, mi thumin naholui ;
Act 10:20 dingdoh-in kumlhan lang lung sa-ih louhel’in amaho khutoh kilhonin, ajeh chu keiman kahinsol ahiuve,” ati.
Act 10:21 Chuphat’in Peter chu miho henga ahung kumsuh-in, “Ven, nahol’u chu keima kahi, nahung lo nau jeh ipiba ham?” ati.
Act 10:22 Amahon, “Sepai jalamkai Cornelius, midih le Pathen ging, Juda vaipi seiphat mi chun nangma a-in’a kousah a nathusei ngai dia Vantil Thengin ahil ahi,” atiuve.
Act 10:23 Hichun Peterin amaho akoulut’in alhunsah tai. Ajing nikhon Peter akipatdoh-in amaho chutoh akilhonin, Joppa khoa sopite phabep’in jong aki-lhonpiuve.
Act 10:24 Ajingin amaho Caesarea khopi alhungun, Cornelius chun aphunggol ho le agol apai ngaitah tah ho akoukhomin ana ngah jinge.
Act 10:25 Peter ahung lut phat’in Cornelius chun analamdot paiyin, akengphang bul’ah aboh khup’in chibai aboh tai.
Act 10:26 Ahinla Peterin ama chu akaiding loiyin, “Dingdoh-in keijong mihem kahi-bouve,” ati.
Act 10:27 Hitia akihoupi pum hin insunga alut leh mi tampi kikhom agatoh-in,
Act 10:28 hijeh chun aman ajah-uvah, “Juda min jat-chom mi kiloipia ahenga kholai len hi Dan toh akitolou nang hon jong nahecheh-ui; ahinla Pathenin mihem koima aboh le atheng lou kati louna din eivetsah tai;
Act 10:29 hijeh a chu eihung kisol’a lung sa-ih louhel’a hung kahi. Hichejeh a chu kadoh nahi, ipi thua neihung kou-sahba ham?” ati.
Act 10:30 Cornelius chun adonbut’in, “Tu phat gei hin ni li alhingtan, nilhah lam nidan thum don’a ka-insunga katao pet’in ven, kama-sanga ponbang leh sil mi khat ana-dingin,
Act 10:31 Cornelius, nataona aki-sangin, mi thil napeh chengse chu Pathen angsunga akigeldoh jinge.
Act 10:32 Joppaa mi sol’in lang Peter kiti Simon chu gakousah tan; ama chu Twikhanglen panga cheng savun sem Simon in’a lhung ahi,’ ati.

Yüklə 146,58 Kb.

Dostları ilə paylaş:
1   2   3   4   5   6




Verilənlər bazası müəlliflik hüququ ilə müdafiə olunur ©muhaz.org 2024
rəhbərliyinə müraciət

gir | qeydiyyatdan keç
    Ana səhifə


yükləyin