Act : Vo Theophilus, thu masa chu Jesu thilbol le, thuhil aboncha akipattil’a pat

Act 10:33 Hijeh a chu nakou ding kahinsol pai jengle, hitia nahung jeng hi apha lheh-e. Tua keiho chengse hi Pathen mitmua kikhoma, Pakaiyin ipi naseisah ding ham ngai dia um kahiuve,” ati.
Act 10:34 Peter apaodoh-in, “Tahbeh-in Pathenin mi le mi kah a lang- kaina aneipoi, ti kahedoh tai;
Act 10:35 chitin namtin lah a koi hileh Ama ginga adih bol jouse chu ama dia santhei ahicheh-e,
Act 10:36 Aman mi jouse Pakai, Jesu Christaa chun Israel chate henga dingin chamna Kipana Thupha thu chu ahinthot’in,
Act 10:37 Johnin baptize chandol lhang asap jouvin Galilee gama pat Judea gam pumpia athu athangsoh tai, ti naheuve;
Act 10:38 Nazareth Jesu chu Pathenin Lhagao Theng le thahat abuh lhah khumin, Patheninakivop-pi jeh-in Ama achelen Diabol bol gentheiya umte adamsah-in napha atong lei.
Act 10:39 Judea gamsung le Jerusalema thil hichengse abol hetoh a pang keiho kahiuve; ama chu thinga akhaiyun athat tauve.
Act 10:40 Ahinla Pathenin Ama chu nithum lhin nin thinaa konin akaithouvin, akiphondohsah chu
Act 10:41 japi heng ahilou vangin Pathenin hettohsah a pang dia alhentum keiho heng ahin; hiti chun thinaa kona atho-doh nung’in Amatoh kanekhom kadon knom’uve;
Act 10:42 chule mipi henga Ama hi Pathenin mihing le mithi thutan dinga atun ahitai ti kasap leuva kahettohsah diuvin eithu lhah-uve.
Act 10:43 Themgao jousen Ama thudol ahettohsah-u ahin, koi hileh Ama tahsan jouse chu Ama min jal’a chonset ngaidamna amu ding aseiyui,” ati.
Act 10:44 Peterin hiche hi asei nalaiyin thu ngaiho jouse chunga Lhagao Theng achutai.
Act 10:45 Chidang namdang ho chung geiya Lhagao Theng kipe akibuh khum jeng chu Peter toh hung lhon cheptan mi atahsan loiyin adatmo lheh jenguve.
Act 10:46 Ijeh-inem itile paochom chom thoa Pathen avahchoiyu chu ajah-u ahi. Chutah chun Peterin adonbut’in,
Act 10:47 Eiho chan banga Lhagao Theng changtaa hite ho baptize channa ding twi kham thei ding koiham?”
Act 10:48 Hiti chun amaho chu Jesu Christa min a baptize chang din aseitai. Amahon Peter chu ni pha-bep beh nichong dingin alhotauve.
Act 11:1 Solchah ho le Judea gam-sunga sopiten chidang nam-dangten jong Pathen thu akisanu hi ajatauve.
Act 11:2 Peter Jerusalema agalhun touleh cheptan loiyin ama ana oimouvin,
Act 11:3 “Ibol’a cheptan lou miho henga chea an nehkhompi nahim?” atiuve.
Act 11:4 Hichun Peter akipanin aban chan ajah-uvah aseipeh-in,
Act 11:5 “Joppa khopia katao leh gao kachangin, Themgao thilmua mu kanei na-a thilpheng hep hop khat van’a kona aninglia hung kikhai lhaa, keima komcha hung ki-nga kamun,
Act 11:6 phatecha kavet chenset leh neh thei ganhing nam-kim, chunga leng vachate kamui.
Act 11:7 Hichun ogin khat hin kajah a. ‘Peter, kipat’in that’in lang nen, ati kajai.
Act 11:8 Ahinla keiman, ‘Hithei hih hel’inte Pakai, thilboh le atheng lou imacha kakamsunga lut kha louhel ahi,’ kati.
Act 11:9 Ahivangin ogin chun van’a konin nivei chan nan eihindonbut’in, ‘Pathenin asuh thengsa chu bohsa hih-in,’ eiti. ,
Act 11:10 Hitobang hin thumvei ahung kibol’in van’a akitol toutai.
Act 11:11 Hichun ven, hichepet tah a hi Caesarea kona kahenga hung kisol mi thum chu kalhunna in maiya anading tauve.
Act 11:12 Lhagaovin ma lung sa-ih louhel’a amaho chutoh lhona kache din eiseipeh-e. Hicheng sopi gup ho jong hin eilhonpiuvin, mipa insunga chun kaluttauve.
Act 11:13 Mipa chun kajah-uva a-in a Vantil ding amun, ‘Joppa mi sol’in lang Peter kiti Simon chu gakousahtan,
Act 11:14 aman nang le na-insung pumpi huhhinga naum na diu Thupha naseipeh dingu ahi,’ ati thu aseitai.
Act 11:15 Ajah-uva thusei kagah kipat panbep leh abul’a eiho chunga achuh bang chun amaho chunga jong Lhagao Theng achutai.
Act 11:16 Hichun kenjong Pakaiyin, Johnin twiya baptize achansah ahin, nang ho vang Lhagao Thenga baptize nachansah diu ahi,’ ati chu kageldoh-e.
Act 11:17 Chutia Pathenin Pakai Jesu Christa itahsanuva eipeh-u thilpeh tobang chu amaho jong apeh leh, kei koi kahiya Pathen kakham thei ding ham ?” ati.
Act 11:18 Amahon hiche hi ajah phat’un aneldauvin, Pathen avahchoiyun, “Ahile Pathenin chidang namdang te jong hinna dia lung heina apeh ahita ong!” atiuve.
Act 11:19 Thoh hahsa asoa Stephen kitha lo jeh a jamcheh chengse chu Phoenicia le Cyprus chule Antioch geiyin acheuvin, koima dang jah a seilouvin Judate henga Thu chu aseileuve.
Act 11:20 Ahin alah-uva phabep Cyprus le Cyrene miho, Antioch ahung Ihun phat’un Greek miho toh akihouvun Pakai Jesu aseiphong tauve.
Act 11:21 Amaho chu Pakaiyin aban thahat’in ahu jingun, hijeh chun Pakaiya atahsan mi tamtah akihei luttauve.
Act 11:22 Hiche thu hi Jerusalema Houbung’in ajatan, hijeh chun Barnabas chu Antioch geiyin asol’un,
Act 11:23 ama ahung leh Pathenin alungset nau amun akipah lheh jengin, amaho chu Pakaiya lunggil tah a um-chah jing din atilkhouvin ahi;
Act 11:24 ajeh chu Barnabas hi mipha le Lhagao Theng dimset chule tahsan det mi ahi. Mi tampi Pakaiya alutbe tauve.
Act 11:25 Barnabas chu Saul hol din Tarsus a achen,
Act 11:26 Saul amudoh phat’in Antioch a ahinpuiye. Kum khat Ihingset amanin miho chu Houbunga akikhoppi ji lhonin, mi tampi ahil lhonin, hiche Antioch khoa hi seijuite chu ‘Christian’ ahinsah masah pen’u ahi.
Act 11:27 Hiche lai hin Themgao phabep Jerusalema konin Antioch a achesuh-ui;
Act 11:28 chuin alah-uva amin Agabus kitipa chu akipatdoh-in Lhagao thahat’in vannoi pumpia kel Ihah ding asei masan, hiche hi Claudius nikho laiyin aguilhungc.
Act 11:29 Hijeh chun seijuite chu ajokham cheh a thil tokhoma Judea gama sopite thot dingin aktloltauve;
Act 11:30 adongkhom’un Barnabas le Saul khut’ah Houbung upate agah thot’ui.
Act 12:1 Hiche lai hin Herod Iengpan Houbung mi konkhat chunga ban-gol khautah-in na atongin abol-setai.
Act 12:2 John upa Jacob chu chem-jamin athattai.
Act 12:3 Amitha hin Juda miho alung lhaisah amun, Peter jong amatbe kit’e, aphat hi cholso-lou changlhahkut lai ahiye.
Act 12:4 Peter amat chun songkul’a akhumin, mi li lia kiloi sepaiho chun kilhauva a-nga diuvin apedoh-in, kalchuh kut kichai teng mipi ang’a puidoh dingin agoi.
Act 12:5 Hiti hin songkul’a akhumtan, ahinla Houbungin ama din lung luttah-in Pathen henga ataopeh-uve.
Act 12:6 Herod-in Peter chu puidoh dinga agotni jan chun Peter, a-ngah sepaite kah a a-ihmun, thih khao nin akihenin, kotpi bul’a jong a-ngah a pang sepaiho ading jingui.
Act 12:7 Hichun ven, Pakaiya kon Vantil khat ahung kilah-in, akikhumna bom sung avahchansel’e; Vantil chun Peter pang abengin asukhang-in, “Kipatdoh loiyin!” ati. Chutah chun akhut te nia akihenna thih khao te ni chu akilhamtai.
Act 12:8 Chuin Vantil chun ajah a, “Nakong kigah-in nakengchot te ni kise loiyin,” ati. Aman chutin aboltai. Chuin ajah a, “Naponin kihuitup loiyin neihin juiyin,” ati.
Act 12:9 Peter apotdoh-in ama chu ajuitai; hichea chun Vantil thilbol chu atahbeh a soh-in agel-pon, gaochanga mu aneiyin agel bouve.
Act 12:10 Vantil le Peter chun kot-ngah masa le ani na akhel lhon leh khopi sung lutna thih kotkha apha lhonin, kotkhah chu ama ni dingin acham tah-in akihong jengin, apot-doh lhonin khosung lamlen khat ajui lhon leh Vantil chun Peter ada-lhapaitai.
Act 12:11 Hichun Peter akhangdoh lap’in, “Tua vang Pakaiyin a-Vantil ahinsol’a Herod ban thahat le Judate kinepna chengsea eihuh-doh ahitai, ti kahedoh tai,” ati.
Act 12:12 Ahetdoh phat hin Peter chu aminchom Mark kiti John nu Mary in’a ahung leh mi tampi kikhomin anataovui.
Act 12:13 Aman kot po nung chu akiu leh donbut din amin Rhoda kiti lhacha numei khat ahunge,
Act 12:14 ahin Peter ogin ahi ahetdoh phat’in akipah behseh jengin kot honta ‘louvin alhai lut’in kot polam’a Peter din thu chu agaseiphong-jo tai.
Act 12:15 Ahinla mihon amanu jah a, “A-ngol’a nahi,” atiuve. Amanun atah mong ahi thu asei tei tei vangin, amahon, “A-Vantil hiya chu,” atibep’ui.
Act 12:16 Ahinla Peterin kot akiu kiu jeng phat’in agah hon’u leh ama amu cheh-un kidang asa lheh jenguve.
Act 12:17 Hichun Peterin athip behna diuvin khut ajap’in, Pakaiyin itobanga kidangtah a songkul’a kona ahin puidoh ham, ti thu aseiyin, “Hicheng thusoh hi Jacob le sopite gaseipeh tauvin,” atin, apotdoh-in munchoma achetai.
Act 12:18 Khovah vah-in Peter chung changa thusoh jeh chun sepaiho lah a boina lentah asodoh tai.
Act 12:19 Herod chun Peter ahol’a amudoh jou lou phat’in a-ngah a pang ho chu akhol chilsoh keiyin tha dingin thu atantai. Amavang chu Judea gama konin Caesarea achesuh-in chukoma aumdentai.
Act 12:20 Herod chu Tyre le Sidon mite chunga alung hang lheh jenge; hijeh chun agam miho loikhat ahungun, lengpa Semanga pang Blastus chu athu nun’un cham lensah din athum’ui; ijeh-inem itileh agam miteu chun Herod lengpa gama neh le chah akilah-u ahiye.
Act 12:21 Akitepniu-vin Herod chun lengpon chol aki-sil’in, laltouna atouvin, ajah-uva thu aseiye.
Act 12:22 Hichun mipin asam’un, “Mihem ogin mai mai ahipoi, pathen ogin ahibouve,” atiuve.
Act 12:23 Aman loupina chu Pathen pelou-va aumjeh-in hiche pettah chun Pakaiya kon Vantil khat’in adengin, lungin anen athitai.
Act 12:24 Pathen thu vang achal jal’in akhangtou cheh tai.
Act 12:25 Barnabas le Saul vang chu kin achaisoh lhon phat’in aminchom Mark kiti John chu ahinpui lhonin Jerusalema konin ahung kile kit Ihontai.
Act 13:1 Antioch khoa Houbunga chun Themgao le mihilphabep aumun; amaho chu Barnabas, Niger kiti Simeon, Cyrene gam mi Lucius, gambih vaipo Herod toh seilet tha Manaen chule Saul ahiuve.
Act 13:2 Amaho chu Pakai kinbol’a an a-ngol laitah-un Lhagao Thengin, “Kakou-na natong din Barnabas le Saul neipedoh-uvin,” ati.
Act 13:3 Hijeh chun an ngol’a atao jouvun achung lhona thenso khut ngap abol’un asoldoh tauve
Act 13:4 Lhagao Theng sol’a konin Barnabas le Saul chu Seleucia ajonsuh lhonin, chua pat’in Cyprus lama akitol lhontai.
Act 13:5 Salamis kho alhun hat lhonin Judate Houthua kikhopna in hoa Pathen thu asei-phong lhonin, akithopi lhon ding John jong ahiuve.
Act 13:6 Twikol gamsung achotsoh-uva Paphos kho ahung gei phat’in Juda mi Themgao lhem, mitpheldoi them Bar-Jesu kitipa chu amudoh tauve;
Act 13:7 ama hi twikol gamvaipopa, Sergius Paulus, mi-lung chingtah chutoh kihe ahin, gamvaipopan Pathen thu asei lhon ngai dingin Barnabas le Saul chu akouve.
Act 13:8 Hichea chun mitpheldoi thempa Greek paova amin Elymas jong atipau chun amani thusei adou-dal len gamvaipopan atahsan louna ding aboltai.
Act 13:9 Chuin Paul kitipa Saul chu Lhagao Theng adimset’in amapa chu ave changmel’in,
Act 13:10 “Vo thilpha jouse doudal, Ihep lhahna le nambolna dimset, Diabol son, Pakai lampi dih heikonle ding nabol hi natat lou lai ding ham?
Act 13:11 Tun ven, Pakaiyin nachunga khut alhatai, phat chom khat sunga nisa vah him him namu lou ding ahi,” atileh ; apettah chun meijing le muthim-in ahintomin, kho amulou jeh chun akhut’a kaile ding mi aholtai.
Act 13:12 Hichun Gamvaipopan thilsoh chu amun Pakai thudol kihilna kidang asan atahsantai.
Act 13:13 Paul le aloite ni chu Paphos a konin akitol’un Pamphylia gama Perga kho alhungun, Johnin amani dalhan Jerusalema ahung kile kit-tai.
Act 13:14 Paul le Barnabas vang ache-pai lhonin Pisidia gama Antioch kho alhung lhonin Choldo nikhon Houthua kikhopna in’a alut’in atou lhontai.
Act 13:15 Danthubu le Themgao lekhabu akisim chaiyin Houthua kikhopna in vaihompan miho asol’in ajah lhona, “Sopite ni mipi tilkhou-na ding thu nanei Ihon leh sei lhonin,” agatisah-e.
Act 13:16 Hijeh chun Paul adingdoh-in khut ajah-in aseiyin : “Israel mite le Pathen gingte jousen ngaiyun.
Act 13:17 Hiche Israel mite Pathen chun i-pu i-pateu analhengdoh-in, Egypt gama apem laiyun achoi len lheh jengin, aban thahat panin ahinpuidohtai.
Act 13:18 Kum som li tobang sungin pa naovah bangin gamthip noiya akhan chah-u aven,
Act 13:19 chuin Canaan gamsunga mihem nam sagi asuh-mang phat’in, agam’u chu agoulo diuvin apen,
Act 13:20 kum ja li le som nga geiyin achenguve. Hiche nung chun Samuel Themgao nikho lai geiyin amaho chu Thutan vaibol ho apen ahi.
Act 13:21 Chuin amahon leng athum’u leh Pathenin Benjamin phunga Kish chapa Saul chu kum som li geiyin akoipeh-e.
Act 13:22 Pathenin Saul chu apaidoh nungin aleng diuvin David atungdoh-in, ama, thudol’a hin Keiman kalung dei-tah David, Jesse chapa kamudoh tai, aman kalungdei chan abol ding ahi,’ tin hettohsahnan aseitai.
Act 13:23 David chilhah a kon hin thutep dungjuiyin Pathenin Huhhingpa Jesu chu ahinlhut tan ahi.
Act 13:24 Jesu kiphondoh masang hin Johnin lungheiya baptize chan ding thu Israel mipi henga aseiphonge.
Act 13:25 John chun atoh achaisoh ding konin, ‘Nang hon kei hi koiya neigel’um? Keima Ama chu kahipoi; amavang ven, kanunga khat ahunge, kei hi Ama kengchot khao te ni sut lham dia jong kilom kahipoi,’ ati.
Act 13:26 “Abraham chilhah sopite le nalah-uva Pathen ging miho, hiche Huhhingna thu hi eiho henga hung kithot ahitai.
Act 13:27 Ijeh-inem itile Jerusalema ilengteu le avaipoteuvin Ama chu anahedoh pouvin, Choldo niseh le kisimji Themgao thuseiho chu guilhunsah nan hekhen louvin Ama chu themmo achan’un,
Act 13:28 athi-na thei lom themmona amudoh jou lou geiyun jong Pilate henga atha na din a-ngeh-uve;
Act 13:29 achung chang thudol kisei jouse asuh bulhingsoh phat’un thing chunga akikhainaa konin adom lhauvin avuitauve.
Act 13:30 Ahinla Pathenin Ama chu thinaa konin akaithouvin,
Act 13:31 nikho phabep-pi sungin Galilee gama pat Jerusalem lama alhonpi miho henga aki-lah jin, amaho chu tua hi mipi henga hettohsah a pang ahiuve.
Act 13:32 Chule pu le pate henga hungsoh dinga kiteppeh thutep chu keihon kipah tah a kaseiphongu ahi,
Act 13:33 hiche chu Pathenin achateu eiho henga aguilhunsah nan Jesu chu akai-thouvin, athudol hi labu ninaa akisunin : ‘Nangma kachapa, Tunia kahin nahi,’ akiti.
Act 13:34 Mon mangna mu louhel dinga Pathenin thinaa kona akaithou thudol chu hiti jong hin aseiye : ‘Keiman David kipe thonlou le atheng Phattheina kapeh ding nahiuve,’ akiti.
Act 13:35 Aman labu munchom khat’a jong aseiyin : ‘Nalhentum lhachapa chu Nangin mon mang dia naphaldoh lou ding ahi,’ akiti.
Act 13:36 David vang chun ama khang laiyin Pathen lungdei abol’in, athin, apu apate toh akivuithan, mon mangna amutan,
Act 13:37 Pathenin akaithou kitpan vang mon mangna amupoi.
Act 13:38 Hijeh a chu hiche hi nahet cheh diu ahi sopite, Jesu jal’a chonset jouse ngaidamna thudol nahenguva kaseiphongu ahin, Mose Danthua kona them nachan jou louna jouseuva chu
Act 13:39 koi hile atahsan chan them chang’ah ahi.
Act 13:40 Hijeh chun Themgaoho thusei nachunguva ahung chuh louna din ching theiyun :
Act 13:41 ‘Veuvin nahsahmo ho, Kidang sauvin lang mangthah-un; Ajeh chu nanikho laiyun thil khat kabol’in, Hitobang thil hi min seipeh jong leu chun natahsan louhel diu ahi,’ tia asei chu,” ati.
Act 13:42 Akikhendoh phat’un mihon Choldo nikit jongleh ajah-uva hiche ho aseipeh kit diuvin a-ngeh-uve.
Act 13:43 Houthua kikhopna in’a akikhendoh doh-uvin Juda mi tampi le Juda houva kilalut ah hougut tam-pin Paul le Barnabas nung ajuiyun, amanin amaho chu Pathen lungset- naa umdet jing din atilkhou lhone.
Act 13:44 Choldo nikit’in akhothing hel tobangin Pakai thu kisei ngai dingin akikhomtauve.
Act 13:45 Mipi kihonlel lul’a akikhop jengu chu Juda hon amu-doh phat’un athangseuvin, Paul thusei chu ataitom’un anel kalle-tauve.
Act 13:46 Ahinla Paul le Barnabas hangtah-in thu asei lhonin, “Pathen thu hi amasaa nang ho seipeh lou khoh ahin, nang hon napai mangu-va tonsot hinna chang dia kilom nakisah louvu leh, ven chidang namdangte henga kihei tauvinge.
Act 13:47 Ijeh-inem itile Pakaiyin keiho hitia hi eiseipeh-u ahi: ‘Keiman nang hi chidang namdang salvah dia katun’a, Vannoi pumpia sochatna lampi dia katun nahi,’ tia asei ahi,” ati.
Act 13:48 Chidang namdang hon hi-cheng hi ajah phat’un akipah-un Pakai thu kisei chu achoi-an’un tonsot hinna chang dia kigosadema umhon atahsan tauve.
Act 13:49 Chuin Pakai thu hiche gamkol sungsea chun achalsoh tai.
Act 13:50 Amavang Juda mihon hougut numei lal ho le khopi sunga lamkaiho atilseuvin, Paul le Barnabas abolset sah-uvin agamkol sunguva konin adeldohsah tauve.
Act 13:51 Amanin amaho dounan akeng-phanga leivui athin lhah khum lhonin Iconium lama ache lhontai.
Act 13:52 Seijui ho vang chu kipana le Lhagao Thengin adimset’uve.
Act 14:1 Iconium khoa Juda ho Hou-thua kikhopna in’a alut khom lhonin, hitima chun thu asei lhon leh Judate le Greek mi tampin atahsan tauve.
Act 14:2 Hichun Juda mi atahsang lou hon sopite dounan chidaag namdang ho atilseuvin asulung hangtauve.
Act 14:3 Ahivangin ama ni sotpi anichong lhonin, alungset- na thu hettohsah a amani khut’a melchihna thil kidang tampi bolsah Pakaiya hangtah-in thu asei jom jing lhone.
Act 14:4 Hichun khopi sung miho chu kehni akisouvin, abang Juda miho langa apangun, abang solchah te ni lama apangui.
Act 14:5 Ahinla chidang namdang ho le Juda mi phabep’in alamkaiteu toh kithon amani chu nahsahmoa bol’a songa seding agouvin ahile,
Act 14:6 amanin ahetdoh lhon phat’in Lycaonia khopi Lystra le Derbe chule akimvel gamsunga ajamlut Ihontai;
Act 14:7 hikom dunga jong chun Kipana Thupha aseiphong lhone.
Act 14:8 Lystra khoa chun apen’a pat kengbai, itih a jong lamjot louhel, akeng chasah thei louhel pasal khat atouvin ahi.
Act 14:9 Amahin Paul thusei angaiyin, Paul’in avechang-mel’in ahileh damsah theina kham tahsan anei chu amun,
Act 14:10 oging tah-in, “Nakeng te nin ding jangin,” ati. Mipa chu ahung kichomdoh jengin avah le paitai.
Act 14:11 Mipin Paul thilbol chu amu phat’uvin Lycaonia paovin oging tah-in, “Eiho lah a pathen ho chu mihem lim’a hung kumlha ahitauve!” tin asamtauve.
Act 14:12 Barnabas chu Zeus asah-un, Paul chu thusei lamkai ahijeh-in Hermes asah-uve.
Act 14:13 Chule khopi maiya ahouin kisa Zeus doi Thempupan bongchal ho ahinkaiyin pahvui ho jong ahinchoiyin dongkot phunga mipi chutoh amani hounaa kilhaina gan tha din agouve.
Act 14:14 Ahinla solchah te ni Barnabas le Paul’in ajahdoh lhon phat’in aponsil abottel jeng lhonin mipi lah a alhai lut lhonin apengjah Ihontan,
Act 14:15 “Miho, idia hiti ho hi nabol’u ham ? Keini jong nang ho banga mihem kahi lhonin, hitobang pannabei thil hoa kona hi van le leiset chule Twikhanglen le asunga um jouse Sempa, Pathen hing jing henga nakiheina diuva Kipana Thupha kaseipeh lhon nahibouvui.
Act 14:16 Aman khang masa laiyin chitin namtin hi Ama dei cheh a chon din alhan,
Act 14:17 ahi-vangin Ama ipi ahichu hettohsahna beiyin akoidehpoi, ajeh chu thilpha aboljin, van’a konin gotwi napeu-vin, muchi chivo gaphat, kum kihei chin nakoipeh-un, neh le chah napeuvin, nalungthimu kipa le thanopna adim jinge,” ati lhone.
Act 14:18 Hicheng hi asei lhonin amani houna dinga gan athagot’u chu asutang nah nah lhone.
Act 14:19 Hichea chun Antioch le Iconiuma kona hung Juda mihon mipi chu athu nun’un Paul chu songin asesah-un, athi ahitai, tin khopi polama akaidohtauve.
Act 14:20 Ahinla ak

oma seijuite adin pet’uvin Paul athoudoh-in khopi sunga aluttai; ajing nikhon Barnabas toh Derbe lam a ache Ihontan ahi,
Act 14:21 Hiche khopia chu Kipana Thupha aseiphong lhona, seijui tampi asemdoh jou lhonin Lystra le Iconium chule Antioch lama ahung kile kit lhonin,
Act 14:22 genthei hesoh tampi thoh a Pathen lenggama ilut mong diu ahi tin tahsana pang det jing dingin seijuiho atilkhou lhonin alungu asuhal lhon’e.
Act 14:23 Houbung jousea Houbung upa alhen-peh lhonin, an ngol’in ataovun, atahsanpau Pakaiyah upa ho chu apedoh doh jenguve.
Act 14:24 Paul le Barnabas-in Pisidia ajotpa lhonin Pamphylia alhung lhonin,
Act 14:25 Perga thu aseiphong jou lhonin Attalia achesuh Ihontai.
Act 14:26 Chua konin kongin akitol lhonin, ahintoh chaisoh lhon hiche natoh tong dinga Pathen lungsetnaa akipehdohna lhon khopi, Antioch jonin ache Ihontai.
Act 14:27 Ahung lhun lhon phat’in Houbung mi abonchan akhom Ihonin, Pathenin amani aman-chah a atoh jouse aseidoh Ihonin, chidang namdangte dia tahsan lam kihon thu asei lhon’e.
Act 14:28 Antioch khoa seijuite toh sotpi aumkhomna lhon chu phat chomcha ahipoi.
Act 15:1 Judea gama konin mi phabep ahungun sopite chu, “Mose Danthu dungjuiya chep natan louvu leh huhhingin umthei pouvin nate,” tin ahiltauve.
Act 15:2 Hiche thudol’a chun Paul le Barnabas toh akihanel lheh jengun akinahso phat’un athu ngaito khom din Paul le Barnabas to midang phabep toh Jerusalema chea Solchah ho le upaho toh kihoutoh din alhengdoh tauve.
Act 15:3 Houbung sol’a konin amaho acheuvin Phoenicia le Samaria ajot papeh-un, chidang namdang ho Pathena akiheilut thu aseipeh-u le sopite chengse akipah lheh-ui.
Act 15:4 Jerusalem alhun phat’un Houbung miho le Solchah ho chule Houbung upahon analamtouvin, amahon ajah-uva Pathenin amaho amanchah a na atoh chengse aseiyuve.
Act 15:5 Hichea hin atahsansa ahivanga Pharisee loi hinalai mi phabep akipatdoh-un, “Amaho chu chep tanpeh a Mose Danthu anit tei diu ahi,” tin aseiyui.
Act 15:6 Solchah ho le Houbung upaho hiche thu ngaito ding hin akikhom tauve.
Act 15:7 Tamtah a kholtohna anei nungun Peter akipatdoh-in ajah-uva, “Sopite, masang chun nang ho lah a kona keima kama hi chidang namdangten Kipana Thupha ajah-uva atahsanna diuva keima Pathenin eilhendoh chu naheuve,
Act 15:8 chule mi lungthim hesoh Pathenin ahenguva ahettohsah-in, eiho eipeh bangun amaho jong Lhagao Theng apei ;
Act 15:9 eiho le amaho kah a dat neichom louvin tahsanin alungthim’u asuthengtai.
Act 15:10 Chuti ahileh ibol’a tua ipu ipateu leh eihon jong ipoh jou louvu namkoljon chu seijuite lengkouva naseuva Pathen napatep’u ham?
Act 15:11 Keihon vang Pakai Jesu lungset vanga tahsan jal’a huhhinga eiho i-um diu banga amaho jong chuti dinga katahsanu ahi,” ati.
Act 15:12 Akikhom mipi chu athip chet jengun, Barnabas le Paul’in Pathenin amani amanchah a chidang namdangte lah a melchihna ho le thil kidang aboldoh ho asei lhon chu angaisoh keiyuve.
Act 15:13 Amanin thu asei chai Ihonin Jacob’in adonbut’in, “Sopite kasei ngai ta diuvin!
Act 15:14 Simonin chidang namdangte Pathenin avil’a alah-uva kona ama min’a ding mi alhendoh thu aseitai.
Act 15:15 Hiche hi Themgaoho thusei toh akitoh soh keiyin hitin akisune :
Act 15:16 ‘Hiche nung hileh Keima hung kile kit’ing ting, Alhusa David houbuh chu kasah phat’a; A-in gem jouse kasah phat ding, Katundoh kit ding ahi;
Act 15:17 Chutia chu mihem amoh chengsen Pakai ahol theiyuva, Ka min a kikou chidang namdang jousen jong ahol thei ding, atin,
Act 15:18 khanglui laiya pat hicheng thil ho hetsah Pakaiyin aseiye,’ kiti ahi.
Act 15:19 Hijeh chun chidang namdang ho lah a kona Pathen lama hung kiheiho chu bolgenthei dau hite, tin ka-ngaitoi;
Act 15:20 amavang amaho chu lekha thot’u hitin, doi houna thil thenglou neh, jon than-hoi, alol kimeh a kithatsa le thisan neh a kona kitim them din hil’u hite;
Act 15:21 ijeh-inem itile khanglui laiya pat Mose’in khopi jouseah athusei ding anei jingin, Choldo nikho seh leh ama thudol Houthua kikhopna in jousea akisim jinge;” ati.
Act 15:22 Solchah ho le Houbung upaho chule Houbung pumpi lung gel’in alah-uva kona mi lhendoh a Paul le Barnabas toh Antioch khoa sol din pha asauvin, Barsabbas kiti Judas le Silas, sopiten ajabol cheh te ni chu alhengun,
Act 15:23 aban’a kisei bang hin asun’un amani khut’a athot tauve ; “Solchah ho le Houbung upa; sopite chengsen, Antioch le Syria chule Cilicia gama um chidang namdang ho lah a sopite chengse kasalam’ui.
Act 15:24 Keiho lah a konin mi koi koiham keiho thupeh louhel’in ahungun thu tampin nahung sulung jingun lung ling laovin nakoiyui, ti kajauve;
Act 15:25 hijeh chun keihon lung khat tah-in mi lhendoh a amaho chu nahenguva i-ngailut tah-u Barnabas le Paul toh hinsol tha ding pha kasauve,
Act 15:26 amaho hi i-Pakaiyu Jesu Christa min’a ahinkho phal ngam cheh ahiuve.
Act 15:27 Hijeh a chu Judas le Silas kahinsol’u ahin, amanin jong hiti imaho hi thuchangin seipeh nau-vinte.
Act 15:28 Ijeh-inem itile Lhagao Thengin jong keihon jong akhoh cheh ho tilou pohgih hahsa dang nachunguva koi lou ding pha kasauvin,