Act : Vo Theophilus, thu masa chu Jesu thilbol le, thuhil aboncha akipattil’a pat

Act 20:20 itobang tah a im beehel’a thil phachom ding chu japi lah hihen intin hijongle nang ho kahilji hitam!
Act 20:21 Juda ho hihen Greek mite hijongle kibang cheh-in Pathen lama lung aheiyuva i-Pakaiyu Jesu Christa atahsanna diuvin kahet-sahji’e.
Act 20:22 Chule tun ven, Lhagaova kigahna jeh-in Jerusalem lam kajonin, chukoma kachunga ipi ahung lhun ding kahepoi;
Act 20:23 khopi jousea kanchalna le hesoh genthei-nan ei-nga jing hi bou Lhagao Thengin eihetsah ahi.
Act 20:24 Ahivangin Pathen lungset Kipana Thupha hettohsah ding Pakai Jesu’a kalah katoh ding kin hi kamolso pou le kahinkho jeng jong hi imacha man din ka-itchapoi.
Act 20:25 Nalah-uva chelea Pathen lenggam seiphongle kahin, ahinla ven, nang hon kamai namukit louhel diu tun kahetai.
Act 20:26 Hijeh a chu tunia kichentah a kaseipeh nahiuve, amangthah um jongleu chun mo kapopoi ;
Act 20:27 ijeh-inem itile nahenguva Pathen lungdei apumpia hetsah lou im mang kaneipoi.
Act 20:28 Kichih theiyun lang nachin diuva Lhagao Thengin napeh-u kelngoi-hon chunga jong ching theiyun, Pathenin athisana achohsa a-Hou-bung chu ching them’uvin.
Act 20:29 Kache nungle ngei giloutah tah nalah-uva hung lut’a kelngoihon hi adep louhel ding kahetai;
Act 20:30 nang ho lah a kona jong mi hung kipat’uva thu akaleh akalouva seiya seijuite phabep geiya apui manguva akijuisah diu ahi.
Act 20:31 Hijeh chun kiging phau-vin, kum thum sunga tang louhel’a sun le jan’a mit lhi puma nachang cheh-uva katilkhou jing chu geldoh jingun.
Act 20:32 Chule tua hi nang ho khan-tousah thei le suh thengsa ho lah a gou chankhomsah thei Pathen le alungset thua nang ho kakhum-lut nahitauve.
Act 20:33 Koima dangka, sana, nihchen ponsil kadeipoi.
Act 20:34 Kei le kaloiho ngaichat chan hiche kakhut te ni hin abol bulhit jing nang ho tah’in nahet’u ahi.
Act 20:35 Pakai Jesu amatah-in, ‘Lah sang-in peh nopnajo ahi,’ ati chu geldoh jinga na hatoh a alhasam chatmo ho kithopi theina dia thil ijakai najui diuvin kavetsahsoh tauve,” ati.
Act 20:36 Paul’in thu hicheng aseiyin dilsun abonchauvin ataopitai.
Act 20:37 Chutah-in abonchauvin akap-un, Paul akoiyun achop’uve;
Act 20:38 ajah-uva, amai amukit lou diu aseijeh tah jong chun na asa behseh jengun ahi. Chuin kong mun geiyin ahung thah-ui.
Act 21:1 Upaho toh kakilhauvin jangkeiyin kongin kakitol’un Cos kalhungui ; ajingin Rhodes kalhungun, chua konin Patara kalhunguve;
Act 21:2 chuin Phoenica jotpa ding kong khat kamu’vin, kong chun katouvun kakitoltauve
Act 21:3 Cyprus twikol akimu phah phat’in veilam ngan kapel’un Syria lam jonin kakitol paiyun, konga thil so-Ihah ding aumjeh’in Tyre khopi’a ka-kingauve.
Act 21:4 Seijuiho kaholdoh-un hikoma chun ni sagi kanichong-ui; Lhagaova konin amaho hin Paul Jerusalema ache ding aja-dauve.
Act 21:5 Nikho chujat kanichon jouvun kakipatdoh-uvin kholjin ban kamasot tauve ; hichea hin seijuite chu ajite achateu pumin khopi kul-pamgeiyin eihung thah-un, Twikhanglen pamchin’a dilsun katao-vun, khat khat’in kakilhauvin,
Act 21:6 keiho kong sunga kakaldoh-un, amaho in lama akiletauve.
Act 21:7 Twichung kholjin chainan Tyre a konin Ptolemais gei kakitol’un, hikoma chun sopite salam kabol’un akom’uvah nikhat kani-chongui.
Act 21:8 Ajing nikhon kakipatdoh-un Caeasarea kalhungun, sagi lah a Philip Evangelist pu in’a kalut’uvin amatoh ka-um khom’uve.
Act 21:9 Philip hin cha nu jinei loulai cheh li aneiyin, amaho hi gaothu-seiyin apangui.
Act 21:10 Nikho phabeppi chukoma ka-um laiyu hin Judea gama konin amin Agabus kiti Themgao khat ahungsuh-in,
Act 21:11 ka hengu ahinjonin Paul konggah chu alan akhut te ni le akeng te ni aki-kanin, “Lhagao Thengin hitia hi, Jerusalem’a Juda mihon hiche konggeh neipa akan’uva chidang namdang ho khut’a apehdoh diu ahi, tin aseiye,” ati.
Act 21:12 Hichu kajah phat’un keiho le chukoma um mihon Paul chu Jerusalema chetou lou din kajoltauve.
Act 21:13 Ahinla Paul’in adonbut’in, “Ibol nahiuva kap’a kalung nasuhdoiyu ham ? Ajeh chu kanchal ding keo hilouva Jerusalema Pakai Jesu min’a thi dinga kigosadem’a um kahi,” ati.
Act 21:14 Kathu nun joulou phat’un kahaiyun, “Pakai lunggot got himai hen,” katitauve.
Act 21:15 Nikho phabep jouvin kaki-gouvin Jerusalema kachetouvun,
Act 21:16 Caesarea konin seijui phabep’in eilhonpiuvin, amaho hin kalhunna dingpau, Cyprus twikol’a mi Mnason kitipa in’a chun eipuilut’uve.
Act 21:17 Jerusalem kalhun’u le sopiten kipah tah-in eina sangui.
Act 21:18 Ajing nikhon keiho toh lhonin Paul chu Jacob kimupin achen, upaho chengse jong akimkeiyui.
Act 21:19 Amaho asalam soh phat’in Paul’in alhacha natohna’a kona chidang namdangte lah a Pathen thilbol chengse chu abanchan aseitai.
Act 21:20 Amahon hichu ajah phat’un Pathen avahchoiyuvin ajah a, “Sopi, atahsante lah a Juda mi sang ijat pang tam ti namui, abonchauva Danthua tom ngaitah ahiuvin,
Act 21:21 nang hin chidang namdang lah a cheng Juda mihon Moses Danthu apaiyuva, achateu chep tanda’a chule puchon pachon adon-da diuvin ahil’in asei lei tin min aseipeh-uve.
Act 21:22 Ipi iti ding hitam? Nahunghi la ajah tei diu ahitan;
Act 21:23 Hichea hin i-khat seipeh unge hichu bol’in ; kitepna neisa mi li kaneiyun,
Act 21:24 amaho hi puiyin lang acholamu topeh-in, nangma jeng jong amaho hitoh kisuthengin, chutile sam akivo thei diu ahin, chuteng nangma nasa tah-a chondan nit mi nahi, nachung changa thu kithang jou ahidol mitinin ahetsoh diu ahi.
Act 21:25 Atahsan chidang namdang ho thudol vang hi lim-semthu houna doithil neh lou ding, thisan neh lou ding, alol kimeh a kithatsa neh lou ding le jonthanhoi bol lou ding thua lekha ithotsau ahitai,” atiuve.
Act 21:26 Chuphat’in Paul’in miho chu apuiyin, ajing nikhoa amatoh kisuh thengna kin abolsoh phat’uvin itih tah le kisuh thengna nikho kichaiya chule amaho mi khat khat dia chu kilhaina gantha itih a kibol ding ham, ti hetsah din Houin agalut’e.
Act 21:27 Nisagi alhin ding konchan Asia gama hungkon Juda mihon Houin sunga Paul amudoh-un, japi atilseuvin achunga khut alhauvin aman’un,
Act 21:28 “Israel mite, neipanhu’uvin, muntin’a mipi le Danthu chule hiche mun douna thu hil lepa ama hi ahi ; hiche keo chu hilouvin Houin sunga Greek miho ahinpuilut’in hiche Muntheng phung hi asubohtai,” tin asamtauve.
Act 21:29 Miho chun Paul le Ephesus gam mi Trouphimus khopi sunga akiloile amujeh-uva Houin sunga jong apuilut tei dia agin mou ahi.
Act 21:30 Chutah chun khopumpi aki-thingun, mipi alhaikhom loiyun Paul chu aman’uvin Houin’a konin akaidoh-un, kotpi chengse akhah paitauve.
Act 21:31 Mihon Paul tha dia agot lai tah-un Jerusalem kho pumpi boi thu hi sepai vaipipo kom ahung Ihungin,
Act 21:32 aman jong apettah chun sepai jalamkaiho le sepaihon apuiyin adelsuh jengu leh, mihon sepai vaipipo le sepaiho amu phat’un Paul avohda tauve.
Act 21:33 Hichun sepai vaipi-pon anailut’in Paul amanin, thih khao nia kan din aseiyin, chuin koi hiya ipi asuhset ham ti akholtoh-e.
Act 21:34 Ahin mipi lah a abangin thuchom asamun, phabep khat man thuchom beh asamui; hitia chu aboi behseh jeh-u chun ipi mong iti ham ti ahetdoh thei lou phat’in Paul chu kulpi sunga kailut din aseijotai.
Act 21:35 Japi aphut deng dung phat’un kalbileiya alempet’in jong Paul chu sepaihon adop thobouvui;
Act 21:36 ajeh chu mipin ahinjuipeh-un, “Sumangun!” tin asam jengui.
Act 21:37 Paul kulpi sunga akailut kon’un aman sepai vaipipopa jah a, “Nahenga thu them khat sei theiying em ?” atileh; aman, “Greek pao nahet’em?
Act 21:38 Nang hi Egypt mi, tu masang jep’a mihem sang li jen gamthip laiya loidoh a jalen gal bolsah chu nahiiou ham ?” ati.
Act 21:39 Hichun Paul’in, “Keima Cilicia gam Tarsus khoa cheng Juda mi kahin, khopi mai maiya mi kahipoi; nahenga kataove mipi jah a thu neiseisah-in,” ati.
Act 21:40 Sepai vaipipon aphalpeh phat’in Paul kalbileiya adingin mipi akhutjap leh, athip chet phat’uvin Paul’in Hebrew paovin thu aseiyin:
Act 22:1 “Sopite le pate ho tua na-angsunguva kakihonna thu kasei ding hi nei ngaipeh-uvin,” ati.
Act 22:2 Paul’in ajah-uva Hebrew paova thu asei ajah phat’un ahathip cheh-uvin, hichun aman :
Act 22:3 “Kei hi Cilicia gam Tarsus khopia cheng Juda mi kahin, hiche khopia Gamaliel khonung juiya, ipu ipateu Dan dungjuiya kikheltah a them, tunia nang ho banga hi Pathen dinga tom ngaitah kahi ;
Act 22:4 hiche Lampi juiho chu thina geiyin kabolsen, numei pasal’in kakanin songkul’a din kapedoh doh jin,
Act 22:5 athu hi Thempu chungnung le upa chengse ahetoh ahiuve; amahoa kona hi Damascus khoa um sopite gamat’a kanchal jenga Jerusalema hinpuiya talen matsahna ding lekha kipoh-in kachei.
Act 22:6 “Damascus khokom kageiyin, sunkim don hin phulou helouvin van’a konin vah nasatah ahung vah-in kakimvel asalvah soh jenge,
Act 22:7 keila tola kalhutan, kajah a, “Saul, Saul, ibol’a neibolset set ham?” ti ogin khat kajai.
Act 22:8 Kenjong kadon-but’in, ‘Koi nahim Pakai?’ katile, aman kajah a, ‘Nabolset set Nazareth Jesu chu kahi,’ ati.
Act 22:9 Kalhonpi hon vah chu amu’vin kahenga thuseipa ogin vang chu ajapouve.
Act 22:10 Hichun keiman, ‘Ipi kabol ding hitam Pakai ?’ katile, Pakai chun kajah a, ‘Kipatdoh-in lang Damascus khopi sunga lut’in, hikoma chu natoh dia kigo chengse aboncha nakiseipeh ding ahi,’ eiti.
Act 22:11 Vah loupi behseh jeh in kho kamutapon, kalhonpi hon khut’in eikaiyun Damascus khosung kaluttai.
Act 22:12 “Damascus khoa chun Juda mihon aseiphat cheh-u, Danthu dungjuiya Pathen ngaisah tah, Ananias kiti mi khat aumin,
Act 22:13 ama hi kahenga ahungin kakoma adingin kajah a, ‘Sopi Saul, kho mutan,’ eitileh, hichepettah chun kamit akikeovin ama kamutai.
Act 22:14 Chuin aman, ‘Ipu ipateu Pathen chun alunggot he ding le Adihpa mua akamsoh ogin ja dinga nalhendoh ahitai;
Act 22:15 ijeh-inem itile nangman nahin mu le najahsa chu Ama dinga mitin henga nahettohsah ding ahi.
Act 22:16 Hijeh chun tua ibol’a kho ngai ngai nahim ? Kipatdoh-in baptize changin lang, nachonset soplhahna din Ama minin taovin,’ eiti.
Act 22:17 “Jerusalema kakile kit phat’in Houin’a katao le Themgao thilmun mu kaneiyin,
Act 22:18 hichea chun Pakaiyin kajah a, ‘Kinloi tah-in Jerusalema konin potdoh loiyin, ajeh chu mihon Kei chung chang thudol nahettohsah hi asan lou diu ahi,’ ati.
Act 22:19 Kenjong, ‘Pakai, amaho tah-in nangma tahsan ho Houthua kikhopna intin’a kalut’a kamatjia chule kavohji chu aheuve ;
Act 22:20 chule nathu hettohsah Stephen thisan kiso jong chun akoma kadingin pha kasan, athat ho ponsil jouse kachoi-peh ahi,’ kati.
Act 22:21 Hichun Aman kajah a, ‘Chen, ijeh-inem itile gamla tah a chidang namdang ho henga kasol ding nahi,’ eititai,” ati.
Act 22:22 Thu hicheng asei geihin athip nauvin, chutah in a-o khopset’in lhang asam’un, “hitobang mi chu leiset’a konin sumang jengin, ama chu ahing dia kilom ahipoi!” atiuve.
Act 22:23 Chutah chun kho asam’un aponsil’u aleh-un , van lama leivui akitun sah jengun ahile,
Act 22:24 sepai vaipipon Paul chu kulpi sunga kailut’a, ama douna chutobang tah a kho asap jengu chu phot chetna dinga jep din asol’e.
Act 22:25 Sepaihon savun khaova akan phat’un Paul’in akoma ding sepai jalamkaipa jah a, “Themmosahna bon um loulaiya Rome mi jep ding chu nang dia dan ngai hinam ?” ati.
Act 22:26 Sepai jalamkaipan hichu ajah phat’in sepai vaipipo henga achen ajah’a, “Ipi bol kigo nahim ? Ajeh chu hichepa khu Rome mi hibouva khu men !” agati.’
Act 22:27 Hijeh chun sepai vaipipo chu ahungin ajah a, “Rome mi nahi mong-em neiseipeh-in ?” atileh ; aman, “Kahinai,” ati.
Act 22:28 Hichun sepai vaipipon adonbut’in, “Ken Rome mi hina hi sum tamtah a kichoa,” atileh ; Paul’in, Keivang pen’a hisa kahitai,” ati.
Act 22:29 Apettah chun achung thu kholchil kigo ho chu ahaiyun alhamkangun, sepai vaipipopa jong Paul Rome mi khat ahi ahetdoh a chule ama anakan jeng chu akicha-tai.
Act 22:30 Ajing nikhon sepai vaipipon ipijeh pen’a Juda hon Paul aheh-u chu hetdohna din Paul akanna alhamin, Thempu pipu ho le Houvaipoloi chengse kikhomsoh din aseiyin, chuin Paul chu ahinpuidoh’in a-angsunguva adinsah-e.
Act 23:1 Paul’in Houvaipoloi chu avechangmel’in, “Tuni geiya hi Pathen angsunga lung sa-ihna beihel’a hing jing kahi,” ati.
Act 23:2 Chutah chun Thempu pipu Ananias chun Paul koma ding ho chu akam behpeh din asol’e.
Act 23:3 Chuphat’in Paul’in jong ajah a, “Vo bang kiloi-bang, Pathenin nang nadenjoh ding ahi! Dan dungjuiya kei thutan dinga tou nangin Dan toh kikal’a keima deng dia mi nasol ham ?” ati.
Act 23:4 Akoma ding hon, “Nangin Pathen Thempu chungnung chutia nahouset jeng ong ?” atiuleh ;
Act 23:5 Paul’in, “Ama Thempu chungnung ahilam kahetlou ahi sopite, ajeh chu, ‘Namite chunga vaipo chunga thuse nasei lou ding ahi,’ tin akisun nai,” ati.
Act 23:6 Paul’in miho chu akeh khat Sadducee ahiuva akeh khat Pharisee ahiu ahetdoh phat’in, Houvaipoloi kikhopnaa chun ahinsamin, “Sopite, keima Pharisee chapa Pharisee kahin, mi thi thokit kinepna thu-dol’a kathu kibol’a ahi ati.
Act 23:7 Paul’in chutia aseiphat’in Pharisee ho le Sadducee ho kah a kinel nohna asodoh tan, khoppi akikeh khen lotauve.
Act 23:8 Ijeh-inem itile Sadducee loiyin mi thi thokit hihen Vantil hileh chule lhagao geiya aumsah louvu ahin, Pharisee loiyin vang aboncha aumsah-u ahinai.
Act 23:9 Hiti tah chun apoh veng vung jengun, Pharisee loi lah a Danthem ho phabep adingdoh-uvin mipi anellun, “Keihon hichepa chunga thildih lou ima kamupouve, lhagao ahim Vantil ahim khattouvin ajah a thu asei hi hih ding ham ?” atiuve. ,
Act 23:10 Akihanelten phat’un sepai vaipi-pon Paul chu abotel diu ham ti akichan, sepaiho chu chesuh a alah-uva kona pumhat’a Paul chu gakaidoh a kulpi sunga Ihoh lut jeng din aseipeh-e.
Act 23:11 Ajing nilhah’in Paul koma Pakai adingin, “Lung ngamin, Jerusalema kathu nahettohsah banga Rome khopia jong nahettohsah tei ding ahi,” tin aseiye.
Act 23:12 Khovah lhah-in Judaten thilgon aneiyun Paul atha masang-seuva anneh twidon abol louhel diuvin akihahsel’un akihan lho cheh tauve.
Act 23:13 Hitia mi philna thil-gong ho chu mi som li val ahiuve.
Act 23:14 Amaho hi Thempu pipuho le upaho henga acheuvin, “Keihon Paul katha masangseuva neh le chah bol louhel dia khoh tah a kihahsel’a kihan lho kahitauve,
Act 23:15 Hijeh chun tun nang hon Houvaipoloi toh kithoa Paul thudol kholchil’a bol dingveh kisauvin, sepai vaipipon nahenguva ahin-puina din gahetsah-un; hikom ahinphah kah a that dia kigosadem’a um kahitauve,” agatiuvin ahi.
Act 23:16 Ahinla anachan Ihih-u thilgon hi Paul sopinu chapan ajadoh’in; hijeh chun achen kulpi sunga alut’in Paul jah a agaseitai.
Act 23:17 Chuphat’in Paul chun sepai jalamkaiho khat akouvin, “Hiche gollhangpa hi sepai vaipipo henga puiyin ajah a seipeh ding khat aneiye,” ati.
Act 23:18 Hijeh chun aman gollhangpa chu apuiyin sepai vaipipo heng alhut’in, ‘Sohchang Paul khun eikouvin hiche gollhangpa hin nakoma sei ding khat aneijeh a nahenga eihin puisah ahi,” ati.
Act 23:19 Sepai vaipipon ama chu akhut’in atuh’in munchoma apuidoh’in guh thim chan adongin, “Kakoma sei ding ipi naneiyem ?” atile,
Act 23:20 aman, “Jing teng Houvaipoloi kikhopnaa achung chang thudol kichen cheh a kholtoh ding banga Paul hi napuisuhna dinga nahenga ngeh ding tin Juda ho akiloltauve.
Act 23:21 Hijeh chun athu’u Jahpeh hih-in, ajeh chu mi som li valjen Paul atha masangseuva anneh twidon bol lou dinga kihah-sel’a chang pang ahiuve, chule tua hi kigosadema um’uva nangma thupeh ngah maiya um ahitauve,” ati.
Act 23:22 Chuphat’in sepai vaipipon gollhangpa chu alhadoh-in, “Hiche neihung seipeh hi koimacha nasei-peh louhel ding ahi,” tin agah chah tai.
Act 23:23 Sepai vaipipon sepai jalam-kai ni akouvin, “Tujan nidan koa Caesarea che din sepai ja ni le sakol sepai som sagi toh, teng choi sepai ja ni toh gonsan koi lhonin;
Act 23:24 chule gamvaipo Felix henga bitkeiya pui Ihungna din Paul touna ding sakol ho jong ngaito peh lhonin,atin;
Act 23:25 hiti chun athudol hi lekha ajih-in :
Act 23:26 “Lal chungnungpen gamvaipo Felix, C!audius-in salam kahinboh-e.
Act 23:27 Hichepa hi Juda hon aman’un, atha ding kon’uvin sepai ho toh kakon’un, Rome mi ahi kahetjeh-in kagahuhdohtai.
Act 23:28 Ahehnau ajeh kahet nompeh-in ama hi Houvai-poloi kikhopnaa kapuisuh leh,
Act 23:29 thina thei le kanchalna thei ima abolset jeh a aheh nau kamupon, amaho Danthu dol’a aheh-u ahitoh-e’.
Act 23:30 Ama hi tha dia agot’uva achan Ihih-u eikiseipeh phat’a kho ngai louhel’a nahenga kahinsol pai jenga, aheh ho jong nangma maiya aheh nau asei diuva kahil ahitai,” ati.
Act 23:31 Sepaihon akiseipeh bangun ajan janin Paul chu apuiyun Anti-patris alhut tauve.
Act 23:32 Ajing nikhon sakol sepai chengse chutoh kilhon pai din adalhah thauvin, sepai dangse vang kulpi lama ahung kilekit tauve.
Act 23:33 Caesarea ahung Ihun phat’un lekha thot chu gamvaipo apeuvin, Paul jong akoma adinsah- ui.
Act 23:34 Gamvaipon lekha thot chu asim jou phat’in hoigam poh mi ham ti adoh a Cilicia gam mi ahi ahetdoh phat chun
Act 23:35 “Naheh ho ahung Ihun teng nathu ngai nange,” atin, Herod inpi thutanna in’a kaiya hentup din aseipeh tai.
Act 24:1 Ni nga jouvin thempu chungnung Ananias le upa phabep chule thusuitoh them Tertullus kitipa toh ahungsuh-un, Paul aheh nau thudol chu gamvaipo henga aseiyuve ;
Act 24:2 chuin agah kouphat’un Tertullus chun aheh nau thu aseipanin : “Lal chungnungpen, nangma jeh’in cham le lung ol’in ka-um’un, chule navaihom them jal’in jong hiche nam mi ding hin phatna tampi akisemdoh-e;
Act 24:3 Ima lam jouse le muntin’a thilbol ho hi keihon kipah tah-in kasangui-pu Felix!
Act 24:4 HijongIeh tampi seiya nangma phat suhmang din kadeipon, kathu-u paltan’a kaseiyu hi lungset’a nei ngaipeh diuva kataotho ahi.
Act 24:5 Ijeh-inem itile hichepa hi mi sunoh phah tah, vannoi gamtin’a Juda ho chohsea pang, Nazareth chon’a chonho lamkai pipu ahi ti keihon kamandoh-un,
Act 24:6 Houin geiya suh boh ding agotjeh a kahin mat’u ahi; keiho Dan dungjuiya athu katan nomu ahin,
Act 24:7 ahinla sepai lamkai Lysias hunga thahat san’a kakhut’uva kona ahung lhoh mang ahi;
Act 24:8 aheh ho ma a anga ding din thu apen, nangman dongtoh le chun kahehnau hi adih adih lou abonchan hesoh keinan nate,” ati.
Act 24:9 juda ho jong chun ahunan asei chengse chu adih cheh-in aseiyui.
Act 24:10 Gamvaipon thusei dinga akhasuh phat’in Paul’in adonbut’in: “Kum sotpi hiche nam mite chunga thutan vaihom nahi kahen, kipah tah-in keima kihonna thu seiyinge;
Act 24:11 nangman nakhol chet thei ahi, keima Jerusalema Pathen hou dinga kache na hi nisom le ni aval hih laiye ;
Act 24:12 Houin sung hihen Houthua kikhopna in hijongle, kholai dung jeng cha jong mi khattou kakinahpi ham ahiloule japi katilset ham hijongle hiche ho hin einamandoh pouve;
Act 24:13 tua eihehna jengu jong hi aphot chetna kichentah-in seithei pouvinte.
Act 24:14 Ahin nahenga kaphondoh nom chu hiche ahi, amahon houdan loitum asah-u Lampi dungjuiya kapu kapateu Pathen houva, Dan-thu le Themgao lekhabua kisun jouse katahsan’a,
Act 24:15 amahon jong dih asah cheh, midih hihen midih lou hileh mi thi thokitna aum’e, ti katahsan ahi;
Act 24:16 hitia chu Pathen lam hihen mihem thudol hijongleh lung theng lung navah a um jing dinga kihabol kahi.
Act 24:17 Kum phabeppi nungin kanam mite din thilpeh le thilto kahinpon kahung leh,
Act 24:18 hiche kinbol’a Houin a kakisuh theng pet’a eihung mudoh-u ahin, hichea chu mipi kikhom jong aumpon, japi noh phahna jong aumpoi.
Act 24:19 Asia gama hung kon Juda mi phabep vang aum’un, amaho chun hehna ding eineiyu leh hikoma nangma angsunga hung ding dol ahiuve.
Act 24:20 Ahilouva Hou-vaipoloi kikhopna kadinpet’a chu ipi suh khel toh khel kachunga amudoh-um hiche ho hin seileu hiding ahi;
Act 24:21 a-angsunguva kadinpet’a othong leuva kasei thil khatseh, ‘Tunia hi na-angsunguva mi thi thokit thudol’a kachung thu kikhol’ah ahi,’ kati chubou ahiye,” ati.
Act 24:22 Ahin Felix chun hiche Lampi thudol chu ahetchetsa ahijeh-in thutan ding avochonin, “Sepai vaipipo Lysias ahung tengleh nathuu ngaito chen nange,” atitai.
Act 24:23 Felix-in sepai jalamkaipa chu Paul songkul’a ahen din aseipeh-in, amavang achamlhatdom theiya, agol apaiho jong ajenle nom chan alutsah din ahil’e.
Act 24:24 Nikho ijat ham nungin Felix chu ajini, Juda numei Drusilla toh ahungin Paul agakousah-in Christa Jesua tahsan thudol aseisah-in angaiye.
Act 24:25 Paul’in thutandih le kitim them chule khonunga thupi tanna thudol asei phat’in Felix atija jah tan, “Tun chetan, phat kanei kom khat leh hinkousah kit nange,” ati.
Act 24:26 Chujongle Paul chun sumguh apeh din agel’in phiveng vungin akousah-in akihoupi piji’e.
Act 24:27 Ahinla kum ni jen alhin chun Porcius Festus chun Felix ahinkhel’in, Felix chun Juda ho dei abolnom jeh’in Paul songkul’a kihen nalaiyin adalhai.
Act 25:1 Hiche gamkaiya ahung lhun kal nithum jouvin Festus chu Caesarea konin Jerusalema ache-touve.
Act 25:2 Jerusalema chun Thempu pipu ho le Juda lamkaihon ahenga Paul hehsetna thu anaseiyui;. Festus chu a-ngeh’un,
Act 25:3 ahinpui jeng khat leh lampia chanlhih a Paul chu thadohna din, Jerusalema ahinpui ding’in athum’uve.
Act 25:4 Festus’in adonbut’in, “Paul Caesarea aki-koiyin chule keimatah jong chukoma che ding kahi;
Act 25:5 hijeh chun keito lhonin nalah-uva athu neidom chengse cheu hitin, hichepa hin suh khel toh khel anei leh amahon aheh nom nomin heh-u hen” ati.
Act 25:6 Festus chu alah-uva niget ham nisom ham anichongin Caesarea achesuh-in; ajing nikhon thutannna mun’a atouvin Paul gapui din aseiye.
Act 25:7 Paul ahung lhun phat’in, Jerusalema kona hungsuh Juda ho akimvel’a adingun, phot chetna apeh thei louhel hel’u thuse tamtah’in ahehseuvin ahi.
Act 25:8 Hichun Paul’in akihonna thu aseiyin, “Juda Danthu douna hihen Houin douna hileh, chule Caesar douna hijongleh keiman imacha suhset tohset kaneipoi,” ati.
Act 25:9 Hichea hin Festus-in Juda ho lung lhaina abolnom jeh-in Paul adonbut’in ajah a, “Jeruaslema chetouva keima angsunga hiche thudol ho hi nachung kikhol ding nadeiyem ?” atileh ;
Act 25:10 Paul’in, “Keima kathu kitan-na ding dol Caesar thutanna mun’a ding kahi; Juda ho chunga bol khel kaneipoi, nangin phatah a nahet ahi.
Act 25:11 Keima bol khel nei kahiya, thina thei lom suh khel toh khel kanei leh thi ding kadapoi ; amavang eihehna chengseu hi ima ahilouleh koiman amaho khut’a eipedoh theiponte, Caesar henga kathu kalhuttai,” ati.
Act 25:12 Festus chu avaibolpi chengse toh akihoutoh phat’in adonbut’in, “Nangin Caesar henga nathu nalhutsa ahitan, Caesar henga nache ding ahi,” ati.
Act 25:13 Nikho phabep jouvin lengpa Agrippa le Bernice chu Festus vailhun din Caesarea ahung lhontai.
Act 25:14 Caesarea sotpi anichon lai Ihonin Festus chun lengpa koma Paul thu chu apodoh-in, “Felix dalhah sohchang kihen khat aumin,
Act 25:15 Jerusalema ka-umpet chun Thempu pipu ho le Juda ho upaten achung thu eihetsah-un, chule ama mochan-sah a athu tan din a-ngeh-ui.
Act 25:16 Ahivangin akihehpa le aheh ho kimaitoa akinel’uva aheh pauvin akihonna thu asei masanga koi hileh moh pehdoh jeng chu Rome mite chondan ngai ahilou kaseipeh-in kanadonbut’e.
Act 25:17 Hijeh chun abonchauva ahung kikhopsoh phat’un geisang louhel’in ajing nikhoma man thutanna mun’a katou mun kakijot’in mipa chu hinpuidoh din kaseitai.
Act 25:18 Ahinla aheh a pang ho adindoh-uva athudol aseiyu chun ahehpauvin kagel bangin ima thilse abolpoi ;
Act 25:19 akinel nau chu amaho houthudol le Paul’in ahinga asei mithisa Jesu kiti khat thudol mai mai ahibouve.
Act 25:20 Atanna je kahetvah loujeh-in ahehnau thuho jeh a hi Jerusalema chea kholchil ding adeiyem adei hih-em ti Paul ka-donge.
Act 25:21 Hichea chun Paul’in Kum-pipa henga thu chaina a-nga dingin kihenna in’a koi din a-ngeh-in, hijeh chun Caesar henga kasol thei kah a koi dingin kaseitai,” ati.
Act 25:22 Hichun Agrippan Festus jah a, “Hichepa thu chu keima tah-in jong ngai leng kadeiye,” atile, aman, “Jing teng jana veh ta chun,” atipeh-e.
Act 25:23 Ajing nikhon Agrippa le Bernice loupi tah a sepai vaipo ho le khopi sunga japi lamkai ho toh thu ngaina inpia ahung lut phat’uvin Festus thusah-in Paul ahinpui lut-tauve.