Təqdimat Maliyyələşmə problemi və maliyyələşmə ilə bağlı qərarların verilməsi maliyyə menecmentinin qarşısında əsas məsələlərdən biridir. İslam Maliyyə İnstitutlarının inkişafı qiymətli kağızlar vasitəsilə maliyyələşmənin zəruriliyini üzə çıxardı. Səhm vasitəsilə maliyyələşmək mülkiyyətçiliyin bölüşdürülməsidir ki, bu da mülkiyyətçilik paylarının azalmasını istəməyən səhmdarların şirkətləri üçün cəlbedici olmaya bilər. Belə halda istiqraz vərəqələri köməyə çatır və mülkiyyətçiliyin itirilməsi əvəzinə borc kağızları olan istiqrazlar vasitəsilə maliyyələşmək imkanı yaranır. Lakin, əsas maliyyələşmə üsullarından biri olan istiqraz vərəqələri (korporativ bondlar) vasitəsilə maliyyələşmək şəriətə zidd olduğu üçün maliyyələşmənin İslami alternativini tapmaq lazım idi. Mövzumuz olan sukuk da bu problemi həll etməyə yönəlib.
Paraqrafın 1 – ci hissəsində sukukla bağlı ümumi məlumat veriləcək. Sonra sukukun müxtəlif növləri ayrı – ayrı başlıqlar altında nəzərdən keçiriləcək. Daha sonra sukukla bağlı müəyyən qaydalar haqqında qısa məlumat veriləcək. Sonda isə statistik göstəricilər və sukuk emisiyası üzrə ayrı – ayrı ölkələrin payı haqqında hesabat təqdim olunacaq.
