Dekorativ heykəltəraşlıq memarlıq və təbiətlə əlaqədardır. Dekorativ heykəllər memarlıq tikintilərinin bəzədilməsində, parkların və fəvvarələrin bədii tərtibatında öz tətbiqlərini tapan heykəltəraşlıq əsərlərinə deyilir. Belə heykəllər öz məzmunu və əhəmiyyəti ilə seçilir. Bu cür əsərlərdə alleqorik dastan süjetləri əsas yer tutur. Dekorativ heykəllər həm dəyirmi, həm də qabartma formalarında yaradılır.
Dəzgah heykəltəraşlığı XV-XVI əsrlərdən inkişaf etməyə başlayıb. O, kamera xarakteri daşıyaraq interyer üçün nəzərdə tutulur. Portret, animalistika, məişət onun əsas janrıdır. Dəzgah heykəltəraşlığı memarlıqla heç bir əlaqəsi olmayıb, müstəqil əhəmiyyət daşıyır. Dəzgah heykəltəraşlığı əsərləri adətən, muzey və sərgi salonlarında qoyulan abidələrdir. Bu əsərlər qisminə büst və portretlər, ayaq üstündə durmuş və oturaq vəziyyətdə verilmiş heykəllər daxildir. Dəzgah heykəltəraşlığı əsərləri qranit, bazalt, mərmər, müxtəlif metal, ağac və sement kimi materiallardan hazırlanır.
