1. Xatirələr 123 №-li məktəbin müəllimi Əbülfəz Rəhimov tərəfindən yazıya alınıb.
Mərdəkan kənd sakini Rza Məmmədovun xatirələri (1) I internat məktəbi 1896-cı ildə açılmışdır. Bu yer iki qardaşın (Fərhad və Xanlar) idi. Hacı Zeynalabdin Tağıyev onlara çox böyük pul verib, bu yeri almış, o yerdə məktəb tikdirmişdir. Məktəbə lazım olan bütün ləvazimat Bakıdan gəlirdi. Məktəbin tikilməsində Mərdəkanlı Həmid və Hüseyn xarrat, suraxanılı Bəyverdi isə podratçı idilər. Başqa fəhlələr də günəmuzd işləyirdilər. Mən də məktəbə gələn bütün vəsaiti təhvil alırdım. Məktəbin tövləsi, at və arabası, aşpazxanası, mətbəxi və s. vardı. Yemək, paltar və s. Tağıyevin hesabına idi. O, kənd uşaqlarını hərtərəfli təmin etmişdi. Bu uşaqlar içərisində Şağan kəndindən və Qala kəndindən uşaqlar vardı. Bağban alman idi. Bu məktəb bir neçə il davam etdi. Sonra isə atalar övladlarının ruslaşmasından qorxaraq onları məktəbdən ayırdılar. Beləliklə, 1-ci internat məktəbi dağıldı.
1 may 1957-ci il.
