Azərbaycan Milli Elmlər Akademiyası Milli Azərbaycan Tarixi Muzeyi

BAKI SAKİNLƏRİNİN XATİRƏLƏRİ
Müslüm Maqomayev küçəsi, 10 ünvanında

yaşamış Ağaəmi Şıxəliyevin xatirələri (1)
1910-cu ildə mənim dəlləkxanam var idi. Stalin prospekti (2), 83 (keçmiş Tağıyevin evi) ünvanında bir ev boşalanda, istədim oranı kirayə götürüb dəlləkxana açım. Getdim Tağıyevin kontoruna. Dedilər, ayda 30 rubla. Mən gördüm ki, ayda 30 rubl verə bilməyəcəm, gücüm çatmır. Fikir­ləşdim ki, gedim Hacının özünün yanına. Bir gün get­dim Hacının yanına, məsələni ona danışdım. Hacı əvvəl­cə məni tənbeh elədi ki, nə üçün oxumamışam. Dedim: “Ha­cı, mən oxuya bilmədiyim üçün bu sənəti öyrənmişəm”. Ha­cı soruşdu: “Mənim başımı qırxarsan?” Dedim: “Bəli”.

Başladım Hacının başını qırxmağa, məsələni Hacı üçün danışdım. Hacı məndən soruşdu: “Sənin o dükanı aç­maq üçün pulun varmı?”. Ərz eylədim ki, bir az var, yenə də düzəldərəm. Hacı soruşdu: “Neçə vaxta düzəldərsən?”. Ərz eylədim ki, bir ilə. Hacının başını qırxıb qurtardım. Yanın­da zəng vardı, onu basdı. Aşağıdan – kontordan mü­hasib Mir Məm­mədəli (Miriyev – F.C.) gəldi. Hacı ona dedi:

- Apar bunu, müqaviləni yaz bunun üçün. Üç il pul ver­məyəcək, üç ildən sonra gəlib yazdırar, nə qədər gücü çatsa, o qədər yazarsan.

Sonra mənə tapşırdı ki, yaxşı dükan düzəldim, özü gə­lib baxacaq. 3 manat mənə zəhmət haqqı verdi, əlavə bir ab­bası da verdi ki, faytona minib gedim, piyada getməyim. Mə­nə tapşırdı ki, hər həftə gəl evə, mənim başımı qırx.

Üç il həmin dükanda yaşadım, pul vermədim. Üç ildən sonra özüm getdim kontora, təzədən müqavilə yazdırdım, ayda 15 rubla. On dörd il o dükanda yaşadım: 3 il pulsuz, 11 il isə pulla. Hacıdan mən bu yaxşılığı gördüm...
22 avqust 1956-cı il.

MATM NF, №№ 20046-20047