1. Şeir 1902-ci ilin fevralında yazılıb və yanvarın 31-də Şamaxıda baş vermiş dəhşətli zəlzələ ilə bağlı H.Z.Tağıyevin təşkil etdiyi geniş xeyriyyəçilik fəaliyyətinə həsr olunub. Şamaxını viranəyə çevirmiş zəlzələ barədə xəbər alan kimi H.Z.Tağıyev ianə yığmaq üçün komitə yaratmış və birinci olaraq özü 1000 rubl vermişdir. Daha sonra o, əlavə 4000 rubl da verərək, zərərçəkənlərə yardım işinə şəxsən özü rəhbərlik etmişdir Komitə üzvlərindən beş nəfər – Həsən bəy Ağayev, Həsənağa Həsənov, Əsədulla Əhmədov, Məmmədrza Vəkilov və Əbdüləli bəy Əmircanov Şamaxıya ezam olunmuş və əhaliyə yardım üçün Bakı Xeyriyyə Cəmiyyəti tərəfindən şəhərə göndərilmiş Həsən bəy Zərdabi ilə birlikdə toplanan ianələrin zərərçəkənlər arasında paylanmasına rəhbərlik edirdilər.
2. Şeirin müəllifi bədii formada H.Z.Tağıyevin sədri olduğu yardım komitəsi üzvlərinin hər birinin Şamaxıda fəaliyyətini təsvir edir. Həsən bəy Ağayev (1875-1920) – görkəmli ictimai-siyasi və dövlət xadimi, Azərbaycan Xalq Cümhuriyyətinin banilərindən və rəhbərlərindən biri. H.Z.Tağıyevin maddi köməkliyi ilə Moskva Universitetinin tibb fakültəsinə daxil olmuş və 1901-ci ildə oranı müvəffəqiyyətlə bitirmişdir. H.Ağayev Gəncədə həkimlik fəaliyyəti ilə yanaşı, qəzet və jurnallarda məqalələr də dərc etdirmişdi. Gəncədə ilk səhiyyə cəmiyyətinin yaradıcılarındandır.
