2. Xatirələr X.Ağayevanın dilindən M.F.Axundov adına APİ-nin (indiki Bakı Slavyan Universitetinin) tələbəsi Şövkət Qədirova tərəfindən yazıya alınmışdır.
3. Hənifə Məlikova (Abayeva) (1856-1929) – pedaqoq, Azərbaycanın ilk maarifçi qadınlarından biri, ictimai xadim. Həsən bəy Zərdabinin həyat yoldaşı. 1901-1909-cu illərdə Aleksandrinski rus-müsəlman qız məktəbinin müdiri olub. 1909-cu ildə Bakıda açılan birinci rus-tatar (Azərbaycan) şəhər qız məktəbinin müdiri təyin edilmişdi. Ömrünün sonunadək pedaqoji fəaliyyətini davam etdirmiş, Azərbaycan qadınlarının savadlanması üçün iş aparmışdır.
4. Şəfiqə Əfəndizadə (1883–1959) – pedaqoq, maarifçi, publisist, yazıçı. Məhəmməd Hafiz Əfəndizadənin qızıdır. H.Z.Tağıyevin qız məktəbində, şəhər rus-Azərbaycan qız məktəbində müəllimə işləmişdir. Sonrakı illərdə mədəni quruculuq işlərinə cəlb olunmuş, qadın müəllim kadrları hazırlayan pedaqoji məktəbdə dərs demişdir.
5. Rəhilə Terequlova (Hacıbababəyova) (1881-1954) – pedaqoq, maarif xadimi. Tiflisdə Müqəddəs Nina qız məktəbini bitirmiş, pedaqoji fəaliyyətə Aleksandrinski qız məktəbində başlamışdır. 1910-cu ildə Bakıda açılan III şəhər rus-Azərbaycan qız məktəbinin müdiri təyin olunmuşdur. Sovet hakimiyyəti illərində bir sıra məktəblərdə, savad kurslarında dərs demişdir.
6. Səkinə xanım Axundova (Axundzadə) (1865-1927) – pedaqoq, yazıçı, ilk azərbaycanlı qadın-dramaturq. Tağıyevin qız məktəbində dram dərnəyinin yaradıcısı.
