Həsən Hacı Abbasqulu oğlunun xatirələri
Mən 1911-ci ildə Hacı Zeynalabdin Tağıyevin fabrikində işləmişəm. O, həmişə bizimlə yaxşı rəftar edir, qeydimizə qalır, fəhlələr üçün əlindən gələni əsirgəmirdi. Həmişə belə deyirdi: “Ay camaat, mən bu fabriki sizin üçün tikdirmişəm, gəlin, işləyin, özünüzə çörək pulu qazanın”. Fabrikdə teatr və kino təşkil olunmuşdu.
Dadaş Bünyadzadə Hacı Zeynalabdin Tağıyev haqqında öz çıxışında belə demişdir: “Hacı Zeynalabdin Tağıyev başqa varlılar kimi deyil, dövlətini özünə sərf etməyib, fəhlə və kəndlilərin xeyri üçün bir fabrik tikdirib ki, o da bizim üçün bir çeşmədir - hər gələn camını doldurub içir”.
Onun həmişə qolçomaqlardan acığı gəlirdi, onları görməyə gözü yox idi. O, həmişə fəhlələri elmə, savada çağırırdı: “Oxuyun, elmli olun, elmin insana çox xeyri var”.
M.Əzizbəyovu (1) da oxudan Hacı Zeynalabdin Tağıyev olmuşdur. M.Əzizbəyovun anası Səlminaz oğlunun əlindən tutub, Hacının yanına gətirib belə demişdir: “Hacı, bunun təhsilini davam etdirə bilmirəm, çünki imkanım yoxdur”. Hacı isə cavab vermişdir: “Heç fikir etmə, mən özüm onun xərcini çəkərəm, təhslini davam etdirər”.
8 iyul 1956-cı il.
MATM NF, №20075
Dostları ilə paylaş: |
