84. USUFLU KƏNDİ
Usuflu kəndinin adı Usuf bəyin adıynan bağlıdı. O da Hajılı bəylərinnən oluf. Deyirdilər ki, o vaxtı Usuf bəy atasınnan ayrılanda Qubatdıda Qızıl Qaya deyilən bir yer vardı, orda köhnə damlar deyilən yerdə binə salıf. Deyilənə görə, qaçaxlarnan aralarında ədavət düşüf, onnan sora oranı yandırıflar.
Sora Usuf bəy bir əz sağ tərəfə gəlif orda binələşif. Sora orda da xəstəlih yayılır. Özü də vəba xəstəliyi olur, camahat qırılır. Orda bir dağ oluf, sal daşıydı. Onun üstündə ərəb əlifbasıynan yazısı varıydı. Ərəb dilini bilənnər həmən yazını oxumuşdular. Orda bu sözlər yazılmışdı: “Mən neçə illər burda yaşadım. Bir belə ilxı saxladım, sürü saxladım, naxırım oldu. Bu yer xeyirsizdi. Burda yaşamax mümkünsüzdü. Burda yaşamıyın”.
Yanı, bala, Usuflu kəndi belə yaranıf. Sora da xəstəliyə görə dağılıf. Həmin kəndin qalıxları qalmışdı.
Dostları ilə paylaş: |
