46. ALLAH QOYSA, ƏRİNDİ
Bir kişi olur. Bir gün səhər-səhər evdən çıxanda ayın-oyun alır ki, arvad, yemək bişir, günorta gələjəm evə. Arvadı deyir:
– Əşi, bir Allah qoysa denən da.
Deyir:
– Allah qoysa da, qoymasa da, gedirəm işə, günorta gələjəm.
Arvad yeməh-işməyini hazırrıyır, kişi günorta gəlir. Kişi deyir:
– Arvad, yeməh noldu?
Deyir:
– A kişi, bir Allah qoysa de da, gətirirəm beş dəyqəyə.
Deyir:
– Allah qoysa da, qoymasa da, gətir, yeyirəm.
Gətirir, stola qoyanda qapı döyülür, polislər gəlir, kişini tutuf aparıllar.
Aradan beş il keçir, qapı döyülür. Arvad deyir:
– Kimdi?
Deyir:
– Allah qoysa, ərindi.
Dostları ilə paylaş: |