AZƏRBAYCAN MİLLİ ELMLƏR AKADEMİYASI
FOLKLOR İNSTİTUTU
______________________________________________
QARABAĞ:
FOLKLOR DA BİR TARİXDİR
III KİTAB
(Ağdam, Füzuli, Cəbrayıl, Tərtər, Qubadlı, Zəngilan, Kəlbəcər, Laçın və Şuşa rayonlarından toplanmış folklor örnəkləri)
BAKI – 2012
“Qarabağ folklorunun toplanması,
sistemləşdirilməsi və araşdırılması” adlı layihə
əsasında çap olunur.
LAYİHƏNİN RƏHBƏRİ: fil.ü.e.d. Muxtar KAZIMOĞLU
(İMANOV)
TƏRTİB EDƏN: fil.ü.f.d. İlkin RÜSTƏMZADƏ
REDAKTOR: fil.ü.f.d. Mətanət ABBASOVA
NƏŞRİNƏ MƏSUL: fil.ü.f.d. Əziz ƏLƏKBƏRLİ
Qarabağ: folklor da bir tarixdir, III kitab (Ağdam, Füzuli, Cəbrayıl, Tərtər, Qubadlı, Zəngilan, Kəlbəcər, Laçın və Şuşa rayonlarından toplanmış folklor örnəkləri). Bakı, “Elm və təhsil”, 2012.
İSBN – 9-789952-810875
А 4603000000 Qrifli няшр
Í-098-2012
© Folklor İnstitutu, 2012
TƏRTİBÇİDƏN
Bu kitab AMEA Folklor İnstitutunun “Qarabağ folklorunun toplanması, sistemləşdirilməsi və araşdırılması” adlı layihə çərçivəsində oxuculara təqdim etdiyi üçüncü kitabdır. İlk kitabda olduğu kimi, bu cildə də, əsasən, işğal olunmuş ərazilərdən (Ağdam, Cəbrayıl, Zəngilan, Laçın, Şuşa, Füzuli və Kəlbəcər rayonlarından) toplanmış folklor nümunələri daxil edilmişdir.
Qeydə alınmış folklor örnəkləri bir daha göstərir ki, doğma torpaqlardan didərgin düşmək yalnız insanların məişətində deyil, həm də bu bölgənin folklorunda, şivəsində müəyyən dəyişmələrə səbəb olmuşdur. Məsələn, Şəkidə məskunlaşmış Cəbrayıl rayon sakini Alı İbadovun söylədiyi mətnlərdə Şəki üçün xarakterik o-u əvəzlənməsinə, söz sonlarında şəkilçilərin qalınlaşmasına (məsələn, görüşax, getmağ, neyliyax), Saatlı rayonunda məskunlaşmış Laçın rayon sakinindən qeydə alınmış mətnlərdə Saatlı şivəsinə aid səs dəyişmələrinə, söz və ifadələrə (məsələn, nəşə (niyə), mıyi (bunu) və s.) rast gəlmək olur. Doğrudur, Qarabağ sakinlərinin kompakt yaşadığı ərazilərdə (məsələn, qaçqın şəhərciklərində) bu hal o qədər də müşahidə olunmur, amma onların pərakəndə, dağınıq halda yaşadığı bölgələrdə yerli sakinlərin təsiri özünü açıq-aşkar göstərir. Məskunlaşdıqları mühitin təsiri ilə nəinki bu insanların şivəsi, eyni zamanda onların repertuarı da dəyişməyə məruz qalmışdır. Məsələn, Cəbrayıl rayon sakinindən Nadir şahın Şəkiyə hücumu ilə bağlı rəvayət qeydə alınmışdır. Təbii ki, Cəbrayıl üçün xarakterik olmayan bu rəvayəti həmin söyləyici Şəkidə məskunlaşdıqdan sonra eşitmişdir.
Bu kimi faktlardan çıxış edərək deyə bilərik ki, bir neçə ildən sonra mühitin təsiri ilə köçkünlərin repertuarı, dialekt və şivəsində daha ciddi dəyişikliklərin olacağı qaçılmazdır. Nə qədər ki bu insanların repertuarı, dialekt və şivəsi ciddi dəyişikliyə uğramayıb, onlardan Qarabağ folklorunu toplayıb sistemləşdirmək lazımdır.
Topluya daxil edilmiş materialların böyük əksəriyyəti 2012-ci ildə Ağdam, Füzuli, Tərtər, Cəlilabad rayonlarına, eləcə də Bakı şəhərində, İmişli, Saatlı rayonlarında məcburi köçkünlərin yaşadıqları qaçqın düşərgələrinə folklor ezamiyyələri zamanı toplanmışdır. Əvvəlki toplularda olduğu kimi, bu topluda da mətnləri söyləyicinin dil və üslubuna toxunmadan, şifahi nitqin sintaksisini gözləməklə oxuculara təqdim edirik. Onu da qeyd edək ki, çap olunmuş mətnlər, əslində, qeydə alınmış nümunələrin bir hissəsini təşkil edir. Biz qeydə alınmış nümunələr arasından seçib daha keyfiyyətli və sanballı olanları toplulara daxil etmişik, çap olunmayan nümunələr isə Folklor İnstitutunun arxivinə təhvil verilmişdir.
Layihə əsasında işıq üzü görən bu toplularda 125 mifoloji mətn, 346 əfsanə və rəvayət, 180-dən artıq nağıl, 170 lətifə, 400-dən artıq atalar sözü, 1000-ə yaxın bayatı, həmçinin laylalar, oxşamalar, düzgülər və uşaq folkloruna aid digər nümunələr çap olunub oxuculara təqdim edilmişdir. Toplama işi nəticəsində indiyə qədər Azərbaycanda qeydə alınmamış 20-yə yaxın nağıl süjeti aşkar edilmişdir. Hacı Qaraman, Hacı Qasım Çələbi, Alı Çələbi, Seyid Nigari, Seyid Həsən ağa, Seyid Füqəra, Seyid Məhəmməd ağa və b. şəxsiyyətlər haqqında, eləcə də Qarabağdakı müxtəlif yer adları barədə onlarla rəvayət və əfsanə də ilk dəfə işıq üzü görən nümunələrdir. Toplama işi nəticəsində Molla Lətif, Soltan bəy, Hacı Şirin, Bic Qənbər kimi yeni-yeni personajlar aşkar edilmişdir. Bu layihə çərçivəsində Bəhlul Danəndə haqqında 24, Abdal Qasım haqqında 18, Kəlniyyət haqqında 1 mətn tədqiqatçılara təqdim olunur ki, bir çox digər nümunələr kimi bu mətnlərin də bir qismi yeni süjetlərdir. Yeni mətnlər Bəhlul Danəndə, Kəlniyyət, Abdal Qasım haqqında təsəvvürümüzü dolğunlaşdırmaqla yanaşı, həmin personajların daha ətraflı öyrənilməsinə yaxından kömək edir.
Qarabağ kimi geniş bir ərazinin folklorunu qısa müddətdə toplamaq və bölgəyə daxil olan bütün rayonları bu baxımdan əhatə etmək qeyri-mümkündür. Toplulara diqqət yetirsək, aydın olar ki, Ağdam, Cəbrayıl, Ağcabədi, Bərdə, Qubadlı, Zəngilan rayonları bu kitablarda daha geniş materialla, digər rayonlar isə ya az sayda materialla təmsil olunmuş, ya da ümumiyyətlə, həmin rayonlara ezamiyyələr təşkil edib toplama işi aparmaq hələ ki mümkün olmamışdır. Bu, bir daha göstərir ki, Qarabağ folklorunun toplanması bir ilin işi deyildir. Heç şübhəsiz, bu iş davamlı olmalı, Qarabağın bütün rayonlarına və məcburi köçkünlərin məskunlaşdığı bütün məntəqələrə ardıcıl ezamiyyələr təşkil etməklə bütövlükdə bölgəni əhatə edə biləsi yeni-yeni toplular ortaya qoyulmalıdır.
I
MİFOLOJİ MДTNLДR, ДFSANД
VД RДVAYДTLДR
1. İNSANIN YARANMASI
Allah bəndəni yaratmağ isdiyirmiş. Onun özünün neçə dənə mələyi varmış. O mələklərdən hangisini göndərifsə yerdən torpağ gətir, torpağ qışqırıf. Heş biri gətirə bilmiyif. Yenəndə torpağ elə vahimə çıxardıf ki, məni götürmə. Axırda bu mələklərin heş biri yarıtmır, Allah Azreyili çağırır. Deyir ki, get torpaxdan bir az götür gəl.
Deyir:
– Qurban olum, axı bir belə mələklər gedib torpaxdan götürə bilmiyif. Torpax vahimə çıxardır ki, mənnən götürməyin, yaralamayın məni.
Torpax da özü bir cannıdı. Axırı Allah-tala əmr eliyir ki, mən saa deyirəm, get götür gəl. Azreyil yenir torpağın üsdünə. Torpax vahiməsini qaldırır, çığırır, bağırır:
– Yox, maa toxunma, məni yaralama.
Deyir:
– Ə, sənnən aparıramsa, saa qayıdacağ.
Onçun görürsən, deyir, insan torpaxdan yaranıf, torpağa da qismət olacağ. Get indi yüz illik, min illik qəbri aç, gör orda bir şey qalıb? Torpağ oluf, çıxıf gedif. Onnan sora torpax rahatçılıx tapıf. Deyif ki, əgər maa qayıdacaxsa, olar.
2. QARAÇUXA
I mətn
Bir tanış var idi. Bir günnəri gəldi maa dedi ki, ay Musa, səə bir söz deyim. Dedim ki, deginən. Dedi:
– Filankəsin qoyununa oğurruğa gedirəm. Ayə, bu kopoğlu yatmır. Nə vaxt gedirəmsə, qoyunun qırağında palto çiynində dik duruf.
Dedim:
– Ə, lap beş gejə dursun. Nə qədər oyax qalajax ki, kəlləsini qoyuf yatajax da.
Çox getdi gəldi. Dedi ki, qoyunun hansı kəlləsinə fırranıram, orda duruf. Bax, beləjə söykənif ağaja, duruf orda, palto da çiynində. Dedim ki, bilirsən nə var? – Dağ yerində qoyun duz yeyəndi. Qoyuna duz verməsən dağ yerində qoyun qalmaz. Belə daş duz olur. Onu deşirdih, ipi bağlıyıf dağdan yumbalıyırdıx, gedif düşürdü qoyunun içinə. O baş-bu baş çəkirdih, qoyun onun dalınca gəlirdi, götürüf gedirdih. – Dedim:
– Duzu apar, qoyunu allat çıxart.
Üş-dörd günnən sora soruşdum ki, noldu? Dedi ki, qoyun duza gələn kimi gəlif qoyunu qaytarır geri, imkan vermir. Bir ay heylə çalışdı. Dedi:
– Ə, bu yatmır.
Bunu bir ay izdədim. Bu yazıx səhər tezdən ağacı götürüf gedir qoyuna, axşam gəlir, səhəri dik açır. Belə şey olmaz. Bunu evdə anama sual verdim. Dedim ki, ana, insan neçə gün yatmaz?
Dedi:
– Uzağı bir gün, iki gün. Saa noluf ki, kim nə deyir?
Dedim ki, filankəs yatmır ey. Gündüz qoyunu otarır, gejə dik durur qoyunun qırağında.
Dedi:
– Bala, o özü döyül, onun qaraçuxası qoyunun qırağında durur, varını gözdüyür. O vara yaxın getmək günahdı. O kişinin halal malıdı.
Dedim:
– Nətər halal malıdı?
Dedi:
– Oğurrux olsa, o kişinin malının içində bir dənə haram olsa, qaraçuxası dik durmaz. O kişinin halal malı olduğuna görə qaraçuxası dik duruf böyründə. Ona əl uzatmax özü günahdı.
II mətn
Hər evin bir qaraçuxası olar. Ya atada olur, ya anada olur, ya nənədə olur, ya qardaşda, ya bacıda. Onun kimdə olduğunu heş vaxt müəyyənnəşdirmək olmur. Əgər o evdə qaraçuxa məhv olsa, demək oranı kin-küdurət basar, azar-bezar olar, urzu gödələr. Bax, onda deyəllər filankəsin qaraçuxası yatdı. Hamıda ola bilməz, birinin üsdündə gəzir o qaraçuxa. Aylədə yeddi-səkgiz adam olsun, onun birinin üsdündədi o qaraçuxa. O idarə eliyir. Görürsən, deyillər filankəs yaman tezdənnən durur, saat beşdə-altıda durur. Onu qaraçuxa durğuzur ey.
3. FATMA ANANIN HANASI
Fatma ana hana qurub, hana toxuyurmuş. Hana toxuyan vaxtı yağış yağıfdı. Yağış yağanda, axı hana qalıb orda – yağışın qabağında. Elə deyiblər ki, aya, Fatma ananın hanası qaldı yağışın qabağında, Fatma ananın hanası qaldı yağışın qabağında. O da üç rəngmiş: yaşılmış, qırmızıymış, bir də ağ imiş. – Elə bizim bayrağımızın da bir suyumu ona oxşuyur e. – Elə o vaxdan göy qurşağına Fatma ananın hanası deyillər.
4. QURD DONUNA GİRƏN QADIN
I mətn
Bir arvadın üç balası və bir əri varıymış. Bı durur günüzdən xəmir qatır. Bunun xəmiri çoxlu gəlir. Hə... Axşam düşür, bının vaxdı olmur xəmiri bişirməyə. Xəmir qalır. Gecə bı arvad durur, aydınnığa* suya girir. Suya girəndə Allah tərəfinnən bının boğazına canavar xəltəsi keçir. Bı gedir qoşulur canavarrara. Əri ha gözdüyür, ha gözdüyür, bı gəlib çıxmır. Bının adı da Zəhra olur. Çıxır deyir:
– Ay Zəhra, xəmir pırt-pırt.
Əri deyir ki, ay Allah, görəsən bı haana getdi? Birdən bı görür ki, uzaxda bir xeyləğ canavar ulaşır. Görür ki, arvadı da gedib qoşulub canavarrara, gedir meşiyə. Deyir:
– Ay Allah, sənə qurban olum, belə möcüzəmi olar? Bının nə günahı var idi ki, bı günə qaldı.
Bı minvalla Zəhra iki il qoşulur bu canavarrara. Allahdan rüxsət gələndə bıllar gedir ilxıdan bir heyvanı seçir, ya qoyun olsun, ya at olsun, ya mal olsun, onu yeyillər. Nəysə, Allah bulara icazə verəndə yeyillər, icazə vermiyəndə ağız-ağıza verib yatışıllar. Bu qadın o qədər tük gətirir ki, canavarrardan betər olur. Dişdəri də yekə-yekə uzanır.
Bir gün olur, bunun meylinə düşür ki, gedim balalarımı görüm, gəlim. Gəlir balasını görməh əvəzinə balasının birini götürür aparır, yeyir. O qədər bının avcının içi şirin imiş ki, bu daddıxca ağzının suyu tökülürmüş, dişdəri şakqıldayırmış. Gözünün yaşını tökə-tökə bı, balasını yeyir. Allahın əmridi, neynəsin? Hə... Bir ay keçənnən sora bı, genə gəlir balasının birini də götürür, yeyir. Duyux düşüllər, görüllər ki, bı, uşaxların elə öz anasıdı, gəlib balalarını aparıb yeyir.
İki ildən sora bı genə adam cildində gəlir, qayıdır insannarın içinə. Allaha qurban olum, Allah bının günahınnan keçir, bını adam cildinə salır, gətirir həyata. Bı gələnnən sora özü öz diliynən nağıl eliyir ki, bizə Allah-tala bax, belə buyurur ki, bı işdəri görün, biz də gedib eliyirdih. Filankəs deyəndə ki, malımı, qoyunumu qurt-quş yedi ha, bını qurt-quş yemirdi. Biz qalırdıx ac, Allaha üz tuturdux, Allah onu bizə bəxş edirdi, biz onu yeyirdih. Ona görə də, qurban olum Allaha, Allahın işinə heş kim qarışa bilməz.
II mətn
Bizim kəntdə arvad vardı, adı Qızyetər idi. Deyirdilər ki, qurt donuna girən Qızyetər. Deməli, guya qurt gəlir, donunu atır bunun çiyninə, bu olur canavar şəklində. Anam deyirdi, şəxsən mən gözümnən görmüşəm ki, canavar kimi uluyur. İsdədilər ki, onu tilsimdən çıxardallar. Çıxardammadılar, gülləynən vurdular, öldürdülər.
Qurdun kürsə gedən vaxdı idi. Bu gəlif, qurd bunu çəkif, donunu atıf arvadın üsdünə. Arvad olufdu canavar. Bularnan barabar gedif gəzif gəlirdi.
5. OVUN İNSANA DÖNMƏSİ
Bizim kəndimizin bir ağır seyidi varmış. Bir gün olur bının av meylinə düşür. Deyir bir çıxım ava. Bir dənə də oğlan düşür bının dalınca. Deyir:
– Seyid, mən də sənnən gedim.
Deyir:
– Yox, ola bilməz, sən gəlməginən.
Gedir çıxır bir təpənin başına. Nə çarə eliyir, bı oğlan qayıtmır. Deyir ki, sən məni qaytarırsan, mən qayıtmıyacam. Mən də sənnən gedəcəm. Deyir ki, yox, mən tək getməliyəm. Bu belə deyəndə, bı oğlan bir az daldalanır, yolunu dəyişir, başqa yolnan gedir.
Qurban olum, bı seyid çıxır bir təpədə durur. Bı təpədə durannan sora görür ki, bir dənə qəşəh, yekə bir əlih gəldi durdu bunun qabağında. Tüfəyi sazdıyıb bına tuşduyanda bı əlih çevrilib olur bir gəlin. Möcüzədi də bı, qurban olum Allaha. Bir də isdiyir tüfəyi çəksin düzəltsin, bı olur əlih. Üş dəfə bı tüfəyi nişan alanda bı əlih gah olur bir gəlin, gah olur əlih. Bı oğlan da – bunun dalınca gələn oğlan keçir bunnan irəli. Qurban olum Allaha, qismətdən artıx yemək olmaz. Görür ki, tüfəh səsi gəldi. Bı seyid bı əlihnən o qədər əlləşir ki, bı gah gəlin olur, gah əlih, tay bezir. Tüfəh səsi eşidəndə gedir səs gələn tərəfə. Deyir:
– Gedim görüm bı nə səs idi.
Gedir görür haman bının dalınca gələn oğlandı. Bir dənə qəşəh əlih vırıb, soyur. Deyir:
– Bəs sən hardan gəldin?
Deyir:
– Bəs sən məni qovdun, buyankı yolnan getdim.
Deyir:
– Səhərdənnən mən qalmışam o təpədə. Bir əlih görmüşəm, olub gəlin, olub əlih. Qalmışam əlində. Demə, elə qismət səninki imiş. Mən niyə belə elədim? Mən səyf elədim sənə dedim ki, gəlmə. Elə qismət sənin imiş. Sən ki şikarı vurdun, gedək bını bölək.
6. İTƏ DÖNMÜŞ İNSANLAR
Kəntdən bir nəfər sürgün olunmuşmuş, Aybasannıdan idi. Axı o vaxdı sürgün eliyirdilər. Ordan indi qayıdıf gəlirmişdər. Gəliflər, gəliflər, görüflər bir dev qoyun otarır. Deyif:
– Gəlin, gəlin.
Bırasınnan bir təhnə çıxardıf, qolunun altınnan çörəh çıxardıf doğruyuf. Qoyunu sağıf, bıllara verif, yedizdirif. Qayıdır bılları aparır əvə. Aparır əvə, ojağı qalıyır. Yerin altında böyüh əvi varmış, onun qapısına dəyirman daşı qoyurmuş. Bını devdən başqa heş kəs qaldıra bilmirmiş. Ojağı qalıyır, bınnarın bir babatın çəkir şişə. Qoyur ojağa, yeyir, yatır. Bı ikisi qalır. Deyillər:
– Biz nətər eliyəh ki, dəyirman daşını götürəh.
Şişi qoyıllar ojağa. Bircə də gözü olur e, alnında. Qoyıllar ojağa, duruf adama bir qoyın soyullar ki, bürünəh. Bı, qıçının arasınnan qoyunu bir-bir çıxardanda qaçarıx. Hə, o şişi götürüllər, basıllar bının gözünə. Yatmışımış, çığırır, çığırır, durur. Dəyirman daşını götürür, qıçının birini o qapının arasına qoyur, birini bı qapının arasına qoyur, bırdan bir-bir qoyunu çıxardır çölə. Bıllar dərinin içində çıxıf qaçıllar. Nağıl yox, elə düzü oymış e… Dedihlərini deyirəm. Gəlillər, gəlillər bir mahala çıxıllar. Deyillər ki, bizi qonax saxlıyarsız?
Deyillər:
– Hə.
Bir talvarrarı varmış. Deyillər:
– Gejələr biz it oluf darışırıx bir-birimizin canına. Çıxın oturun o talvarda, hamma nərdivanı da çəkin qoyun yanıza.
Deyir, heylə çıxıf oturuflar talvarda, nərdivanı da çəkif qoyuflar yannarına. Səhərəcən bıllar it oluf darışıf bir-birinin canına, səhər olanda oluflar adam. Qayıdıf ordan düşüf gəliflər Arazın qırağına. Görüflər ki, iki dooz – çöl doozu Arazın bılar olan tərəfində otduyullar. Gözdüyüllər, gözdüyüllər, elə bılar suya girəndə hərəsi birinin üsdünə atılır, o dooz da öldürərdi e, olları. Doozdar oları çaydan keçirdir. Suyun qırağına çatan kimi düşüllər. Bı doozdar qaçır. Biri Aybasannıdanımış. Gəlif o nağıl eliyirmiş. Bax, belə başımıza işdər gəldi o vaxdı. Gəlif heylə çıxmışımış əvlərinə.
7. ŞEYTAN
I mətn
Deyillər ki, Allah-tala özü vahimədən, nə bilim filan-bəsmənnən uzağ olmaxçün çəkilif qəlbiyə çıxanda şeytan əl atıf tutuf ətəyinnən. Deyif:
– Mən yaranannan saa qulluğ eliyirəm. Neyçün maa bir şey tapşırmırsan?
Deyif ki, axı sənə nə tapşırım, nə verim? Deyif ki, mən sənnən bir şey xayiş eliyirəm. Deyif:
– Nədi?
Deyir:
– İnsannarın qəlbini.
Deyif:
– İnsannarın qəlbini də saa verirəm, Allahın nəhlətini də.
Şeytanı da Allah yaradıf ey, amma Allah ona axırda heylə bir cəza verif. Şeytan insanın qəlbinə girəndə nə istəsə eliyə bilər. Deyif ki, insanın qəlbini də verirəm saa, Allahın nəhlətini də saa verirəm. Şeytan insanın qəlbinə girəndə desə ki, Allah saa nəhlət eləsin, o saatı hər şey soyuyar, çıxar gedər. O adamın əlinnən xəta çıxmaz.
II mətn
Bir gün bir kişi yola düşüb səfərə gedirmiş. Görür ki, bir dənə qaratikanın başında bir şeytan elə ağlıyır, elə çığırır ki, qalıb göydən asılı, qaratikanın başında. Deyir:
– A şeytan, niyə ağlıyırsan?
Deyir:
– Atam-anam məni gəzir, hər kəs məni burdan yendirsə, atam-anam onu dünya malıynan qani edəcək.
Dünya malı şirin olur. Bu kişi gedir bu şeytanı qaratikanın başınnan bir zulumnan yendirir. Yendirəndə şeytan buna deyir ki, mən səə dünya malı dedim, amma sən dünya malına axınmaginən*. Mən səə nə desəm ona qulax verginən, gör nə deyirəm. Mənim atam-anam məni görəndə çox sevinəcək. Sənə dünyanı, xəzinəni baxşış verəcək. Sən onu götürməginən.
Kişi deyir:
– Vaxtaş ki heylədi, bəs mən onda neyniyim?
Şeytan deyir:
– Atama deginən ki, dünyanın malı, o xəzinə mənə lazım deyil, sən mənim özümkünə dəyməginən.
Deyir:
– Yaxşı.
Bular gedir, evə yaxınnaşanda bu şeytanın ata-anası durullar ayağa, deyillər:
– Ay Allah, sənə min şükür, balamız sağdı.
Bunun ata-anası deyir:
– Ay kişi, gəl sənə xəzinə, baxşış verək.
Kişi deyir:
– Sənin dünya malın mənə lazım deyil. Oları qoy dursun, mənim öz xəzinəmə dəyməginən.
Şeytan deyir:
– A kişi, sən nə gözü-könlü tox adamsan. Bəs axı sən mənim balamı qaratikanın başınnan xilas etmisən. Bəs mən sənin qulluğunda neyniyim?
Kişi deyir ki, bu dünyanın hamısı sənindi. Alan da sənsən, verən də sənsən, tikən də sənsən, sökən də sənsən, paydan çıxan da sənsən. Vaxtaş ki belədi, məə sənin heş nəyin lazım deyil. Təki sən mənim balama dəyməginən. Mənim balam mənə, sənin balan sənə qismət olsun.
Ona görə belə bir misal var atalar arasında: Şeytan bala paylıyır. Atalar deyir: “Balası lazım deyil, bizim balamıza dəyməsin”.
8. HAL HAQQINDA
I mətn
Kənt yerrərində belə bir adət var ki, öz şəxsi mal-qaralarını aparıllar, yaylım deyillər, yaylıma. O kişi də götürüp aparmışmış yaylıma. Malları ötürür, özü daxil olur zəmiyə ki, sünbüllərdən bir az dərsin. Sütül vaxdı yeməli olur. Sütülü yesinnər, ya uşaxları yesin, ya özü yesin. Daddı olur sütül. Bu vaxt görür kü, bir çılpax qadın üzü o tərəfə oturup, döşdərini, necə deyəllər, sığallıyır. Bunnan irəli keşmiş babaların böyründə sancağı olarmış. Çıxardır onun yaxasına taxan kimi bu tərpənə bilmir. Deyir:
– Allah saa insaf versin, məni sən niyə yolumnan elədin, indi uşaxlarım ağlıyacax.
Artıx çevrilir olur adi bizim kimi bir insan. Demiyəsən, bu mələyimiş. Gedir görür bu mələhdi, haldı. Sora heyvannarını da götürür, onu da götürür gəlir. Camahat eşidir belə-filan…
– Ə, bu nə hak-hesabdı?
Deyir:
– Ay camahat, gəlin. Bəs Allah tərəfinnən qayıb olan bir dənə halı tutmuşam.
Bu hala nə deyillər onu tərs eliyir. Get odunu gəti, suyu gətirir, suyu gəti, odunu gətirir. Tərsinə iş görən bir halıdı. Ancağ iş görən idi. Deyim iş görmürdü, yox, iş görən idi. Bunu işdədillər bir ay, iki ay. Camahat axırda xayiş eliyir ki, Allaha acıx gedər, bunu burax getsin.
Deyir:
– Yox, elə hazır mənim üçün işçi qüvvəsidi.
Bunu buraxmır. Sora günnərin bir günü bunnar çəkilip, tay görür bu örgəşip bura, harasa gedillər, bağa, ya haramı, evdə böyühlərdən qalmıyıp. Uşağa deyir ki, bala, bala, bunu aç, gətir bu tərəfdən bağla. Uşağı alladır. Bilir ki, uşağı allatmağ olar da. Uşax da tez deyir:
– Hə, hal xala, olar, yaxşı.
Yaxınnaşır, elə bu zadı çıxardan kimi hal yox olur. Kişi gəlir, arvat gəlir, deyir:
– Ə, bunu kim belə elədi?
Uşax dedi:
– Bəs bunu mən elədim, bilmədim, belə elədim.
Beləliknən, hal aradan çıxır. Deyilənə görə, gedir qarğış eliyir. O adamın, onu tutup gətirən kişinin var ha, onun evində yeddi il ağır yoxsulluğ olur, pis hadisələr baş verir, arvadı irəhmətə gedir, oğlu vaxtsız irəhmətə gedir. Varı-zadı hamısı əlinnən çıxır onun qarğışına görə. O mələyimiş, onnarın qarğışı yaman bərk olur. Onnan sora hamıya yayılır ki, həqiqətən də, belə varlıxlar var həyatda.
II mətn
Bir qadın olur, uşax dünyaya gətirir. Qapıdan çıxanda bu gəlinin, elə bil, hal ciyərini çəkip götürüp gedir. Hay düşüp kü, gəlin öldü. Uşax qutarannan sora gəlin öldü. Mənim babam tüfəyi götürür, gedir suyun üsdünə. Deyir, indi hal harda olsa, gələcəh suyun üsdünə. Gözdüyür, görür hal budu, gəlir, bu gəlinin içini-içalatını çıxardıp, alıp qucağına aparır ki, suya çəhsin, yesin. Suya çəhməmiş tüfəyi tutur. Deyir ki, çəhmə suya, hardan gətirmisən apar qoy ora. – Bu gəlini götürüllər ölü yerinə, bunu kəfənnəsinnər da, ölüpdü. – Deyir:
– Apar, daxil elə yerinə.
Daxil eliyir yerinə. Bir sahatdan sora bu gəlin ayılır. Gəlip deyir ki, baba, sən neylədin?
Deyir:
– Mən bildim bunu hal çəkib, aparır suya çəhməyə. Bu suya çəhsə, gəlin dirilmiyəcəh, öləceydi. Onun qabağını kəsdim mən, qəytərdi gətdi daxil elədi yerinə, o gəlin durdu, ayıldı.
Məclis dağıldı. Dedilər ki, sən sınanmış bir ocaxsan, saa heş kəs toxuna bilməz. Sənə inandıx. Bu gəlini qaytardın dünyaya.
III mətn
Babam keçənin üsdünü qırlıyıf, sarıyıf atın belinə. Hal atı minəndə onu tutuf. Özü də qadınmış. Dağdan gəlif arana, aranda qalıf. Bir də dübarə dağa gedəndə Qannı göl deyirih biz – rəhmətdih dədəm söhbət eliyirdi, mən də onda bozbala* gədəyəm, – orda nənəm xəmir yoğururmuş, su çatmır. Gəldi nənəmə dedi ki, gedif göldən su gətirim. Su gətirməyə gedəndə, dədəmin Şirin addı əmisi oluf, buna deyif ki, bu iynəni burdan çıxart, barmağıma tikan batıf onu çıxardım. İynə çıxannan sora özünü atıf suya. Nəkqədər o xəmiri yoğurdular, xəmir qutarmadı. Axırı, deyir, nənəm getdi gölün qırağına. Adını da Firəngiz qoymuşdular. Dedi:
– Firəngiz, biz nağayrax xəmir qutarsın, xəmir qutarmır axı.
Sudan səs gəlir ki, get onnan bir kündə gətir, at bu suya. Bir kündə gətirif atıflar, onnan sora xəmirin dalı kəsilif. Gülgəz nənəmə deyif ki, mən sizə başqa qarğış eləmirəm. Yeddi nəsil evizdən zibil kəm olmasın. Biz hələ dördüncüyük. Onnandı ki, zibilimiz əysik olmur. Lap evdə heş kim olmasın, gedif görürdüh ki, genə ev zibillidi.
IV mətn
Şofer Valehnən rayonnan gəlirdih. Daş Veysəllidə kəhrizdər vardı. O kəhrizin üsdündə ikisi oturmuşdu. Valehə dedim ki, əyə, saxla, gedif onnarı tutax. Maşın saxlamaxnan özdərini buraxdılar suya. Getdih ki, su ləpələnirdi.
Hal nənəsi iri şeydi, canlı arvad kimi. Dodax qəlin, alt dodağı sallanır. Barmaxdan yoğundu dodağı. Tükü-başı hamısı pırpız. Sol döşünü sağ çiyninə atmışdı, sağ döşünü sol çiyninə. Hardasa döşünün uzunnuğu bu boyda idi (qurşağa qədər – top.). Mən onu gördüm. Çılpax idilər.
V mətn
Rəhmətdih qardaşım mənnən böyük idi, onnan gedirdik çayın qırağıynan. Gedəndə gördüm kanalda bir qadındı. Mənim gözümə göründü. Qardaşıma dedim. Dedi ki, orda heş-zad yoxdu. Gördüm belə ağ qadındı, döşdəri bax bura düşüf (qurşağa qədər – top.). Suyun içində oturufdu. Döşdərini suya salıf atır çiyninə. Bu mənim gözümə görüküf. Qardaşıma dedim, dedi orda heş-zad yoxdu. Nə danışırsan?
Dostları ilə paylaş: |