Kişi və iki qızı
Günlərin bir günündə bir kişi qızının birini verir bir dövlətliyə, birini də verir bir yoxsul oğlana. Bir varlı-karlı oğlana gedən qız çox qıtmır və kobud adam olur. Amma o birisi yoxsula gedən qız isə çox əliaçıq və mehriban olur.
Günlərin bir günündə yoxsul bacı gedir o birisi bacısıgilə. Deyir gedim görüm ki, bacım neylir, nə eləmir. Gedib yetişir onların evinə. Görür ki, bacısı nazik7 bişirir.
Dövlətli bacının gözü yoxsul bacıya düşür. Təndirdən çıxmış isti-isti naziyi qoyur qıçının altına. Və başlayır bacısı ilə danışmağa. Yoxsul bacı bunu görüb dözə bilməyib belə deyir:
Baxçada güllər, bacı,
Oxur bülbüllər, bacı,
Yançağın köməş yandırar,
Keçər bu günlər, bacı.
Dövlətli bacı ta görür ki, bacısı bunu yaxşı tanıyıb, qızarar-bozarar. Yoxsul bacı işi belə görüb xudahafiz eləməmiş öz evlərinə qayıdar.
Dostları ilə paylaş: |
