Öz evimdir, xalqa nə var, qatıq yeyirəm, ya eyran içirəm
Bir kişi arvadından çox qorxarmış. Arvad buna göz verib, işıq verməzdi. Evdə hər nə meyvə, yemək olsa idi, kişinin payı fəqət eyran idi.
Bir gün kişi küçədə gələ-gələ deyirmiş:
─ Bu gün nahara mən qatıq yeyəcəyəm. Gəlib yetişir evə. Uca səslə deyir:
─ Arvad, qatıq gətir.
Arvad hirsli-hirsli soruşur:
─ Nə istədin?
Kişi görür ki, arvad bərk hirslənib, buna görə də deyir:
─ Əyər olsa bir az eyran gətir içim.
Arvad gedir eyran gətirməyə, kişi təkbaşına deyir:
─ Öz evimdir, xalqa nə var, qatıq yeyərəm, ya eyran içərəm.
Dostları ilə paylaş: |
