Tədqiqatın elmi yeniliyi. Dissertasiyada ilk dəfə olaraq Orxon abidələrindəki söz yaradıcılığı prosesləri digər qədim türk abidələrindən, o cümlədən eyni əlifba ilə yazılmış Yenisey abidələrindən ayrılıqda və sistemli olaraq tədqiqata cəlb olunmuşdur. Burada qədim türk dilinə (göytürklərə) məxsus Ongin, Kül tigin, Bilgə kağan, Tonyukuk, Küli çor, İhe-Ashete, Hoytu-Temir abidələrinin dilindəki morfoloji və sintaktik üsullarla yanaşı, tədqiqatlarda daha az diqqət yetirilən leksik-semantik və morfoloji-sintaktik üsullar da araşdırılmışdır. Burada hər bir söz yaradıcılığı üsulunun mexanizmi müəyyənləşdirilmiş, bu üsullar nəticəsində əmələ gəlmiş leksik vahidlər və onların əsasında duran sözlər təhlil olunmuş, abidələrdəki söz yaradıcılığı sisteminin ümumi xüsusiyyətləri aşkara çıxarılmağa çalışılmışdır.
