Karter yağının səviyyəsinin yoxlanılması və lazım gələrsə əlavə edilməsi;
İşlənmiş, yəni artıq istismara yararsız olan yağın dəyişdirilməsi;
Yağ süzgəclərinin yuyulması və ya əvəz edilməsi;
Birləşmələrdə kipliklərin bərpa edilməsi;
Su nasosu və ventilyator yastıqlarının plastik yağla yağlanması;
Hava təmizləyici süzgəcdə yağın dəyişdirilməsi.
Karter yağının dəyişdirilməsi mühərrikin qızmış vəziyyətində yerinə yetirirlir. Bu onunla izah edilir ki, qızmış mühərrikdə yağın özlülüyü aşağı olduğu üçün asanlıqla süzülür. İşlənmiş yağı karterdən boşaltdıqdan sonra yağlama sistemində çətin süzülən çöküntülər və qətranlı birləşmələr qalır. Onları təmizləmək üçün mühərrikin yağlama sistemi xüsusi yuma qurğusu ilə yuyulur. Yuyucu vasitə kimi sənaye yağları, dizel yanacağı ilə mühərrik yağlarının qarışığı və yaxud xüsusi yuma məhlulları işlədilir. Yağlama sistemini yumaq üçün karterə 2,5...3,0 litr yuma məhlulu tökülür, dirsəkli valın kiçik dövrlərində mühərrik 4...5 dəqiqə işlədilir. Sonra məhlul boşaldılır, karterə təzə yağ tökülür.
Transmissiyada yağlama işləri. Transmissiyanın aqreqatlarını yağlamaq üçün yaxşı yağlama qabiliyyətinə malik olan və yüksək xüsusi təzyyiqlərdə işləyən yağlardan istifadə edilir. Baş ötürücüdə dişli çarxların işçi səthlərində yüksək xüsusi təzyiqlərin yaranması transmissiya yağlarına verilən tələblərin tam ödənilməsinə gətirib çıxarır. Sükan mexanizminin hidrogücləndiricisi və hidromexaniki ötürmələr üçün işlədilən yağların özlülük-temperatur xarakteristikaları qənaətbəxş olmalıdır.
Mühərrik yağlarında olduğu kimi transmissiya yağları da avtomobilin işləmə müddətinə uyğun olaraq öz istismar xüsusiyyətlərini dəyişirlər. Çünki yağlarda yeyilmə məhsullarının miqdarı artır, oksidləşmə prosesi gedir, yağın özlülüyü dəyişir və s. detalların ömür uzunluğunu təmin etmək üçün yağlar müəyyən yürüşlərdən sonra dəyişilməlidirlər.
Transmissiya aqreqatlarında yağı dəyişərkən təzə yağı tökməzdən əvvəl karter yuyulmalıdır. Bunun üçün karterə 1,5...2,0 l yuma məhlulu tökülür, yuma aqreqatı işə salınıb 2...3 dəq işlədilir. Sonra məhlul boşaldılır, onun yerinə təzə yağ tökülür.
Avtomobil aqreqatlarında işlədilmək üçün neft sənayesi böyük miqdarda müxtəlif fiziki-kimyəvi xüsusiyyətlərə malik olan transmissiya yağları istehsal edir. Bu yağlar işlədiləcəyi aqreqatın konstruktiv xüsusiyyətləri və iqlim zonası nəzərdə tutulmaqla hazırlanır.
Transmissiyanın hər bir aqreqatında işlədilən yağın və onun əvəzedicisinin markası yağlama xəritəsində verilir. Avtomobillərdə yeni aqreqat və mexanizmlərin istifadə edilməsinə müvafiq olaraq yeni yağ növləri də hazırlanır. Buna misal olaraq avtomatik sürətlər qutusunda və sükan mexanizminin hidrogücləndiricilərində işlədilən, yüksək istismar göstəricilərinə malik olan “A” və “P” markalı yağları göstərmək olar. Bu yağlar (xüsusən də “P”) demək olar ki, avtomobilin əsaslı təmirinə qədər dəyişdirilmir.
Tarnsmissiya aqreqatlarını yağla doldurmaq üçün ANM-də ən çox porşenli nasosu olan yağ paylayıcı baklardan istifadə edilir. İxtisaslaşdırılmış axın xətlərində isə dişli çarxlı nasosu olan və elektrik mühərriki ilə hərəkət gətirilən, həmçinin yüksək məhsuldarlığa malik qurğular tətbiq edilir.
Dostları ilə paylaş: |
