Azərbaycan Respublikasının İnzibati Xətalar Məcəlləsi

Maddə 60. Tətillərdə iştirak etməyə və ya iştirakdan imtina etməyə məcbur etmə

Zor tətbiq etməklə və ya zor tətbiq etmək hədəsi ilə qorxutmaqla və ya şəxsin maddi cəhətdən asılı olmasından istifadə etməklə onu tətillərdə iştirak etməyə, yaxud iştirakdan imtina etməyə məcbur etməyə görə—

• 
  on manatdan otuz beş manatadək miqdarda cərimə edilir. (1, 119)
  

Maddə 60-1. Seksual qısnamaya məruz qalmış işçilərə qarşı təzyiqin göstərilməsi

Seksual qısnamaya görə işəgötürəndən və ya rəhbərindən şikayət etmiş işçiyə qarşı təzyiqin göstərilməsinə və ya işçinin təqib olunmasına görə—

• 
  vəzifəli şəxslər yetmiş manatdan doxsan manatadək miqdarda cərimə edilirlər. (103, 119)
  

Yeddinci fəsil. Əhalinin sağlamlığı, sanitariya-gigiyena və sanitariya-epidemioloji salamatlığı qaydaları əleyhinə olan inzibati xətalar

Maddə 61. Zöhrəvi xəstəliklərlə və ya HİV-lə yoluxmuş şəxslərin müalicədən boyun qaçırması

Zöhrəvi xəstəliklərlə və ya HİV-lə yoluxması barəsində kifayət qədər məlumat olan şəxslərin səhiyyə orqanları tərəfindən xəbərdarlıq edildikdən sonra da müalicədən boyun qaçırmasına görə—

• 
  yüz manatdan yüz əlli manatadək miqdarda cərimə edilir. (1, 114, 119)
  

Maddə 62. Zöhrəvi xəstəliklərlə və ya HİV-lə yoluxmuş şəxslə əlaqədə olmuş şəxslərin müayinədən boyun qaçırması

Zöhrəvi xəstəliklərlə və ya HİV-lə yoluxmuş şəxslə əlaqədə olmuş və profilaktik müayinəyə ehtiyacı olan şəxslərin müayinədən səhiyyə orqanları tərəfindən xəbərdarlıq edildikdən sonra da boyun qaçırmasına görə—

• 
  səksən manatdan yüz iyirmi manatadək miqdarda cərimə edilir. (1, 114, 119)