TOK-ŞOU (talk show) – Hərfi mənada: danışıq tamaşası. Studiyada ictimai-siyasi, elm, incəsənət və mədəniyyət xadimlərinin, habelə müxtəlif tərkibli auditoriyanın (və ekspertlərin) iştirakı ilə hazırlanan veriliş forması. Müsahibə və diskussiya janrlarının əlamətlərini özündə birləşdirən T.-ş., adətən, sərbəst şəraitdə aparılır. Daha çox aparıcının fərdi keyfiyyətlərinə və şəxsiyyətinə söykənən T.-ş.-da hər hansı problemin dərin və ciddi müzakirəsi istisna edilir. Əksər hallarda aktual problemlərin tədqiqinə həsr edilən T.-ş. əyləncəli, qalmaqallı mövzularla, kəskin diskussiya və situasiyalarla müşayiət olunur. İlk T.-ş. ABŞ TV-lərində yaranıb.
