AXROMATİK RƏNGLƏR (achromatic colors) – Ağ, qara və bütün boz rənglər. A.r. bir-birindən rəngin açıqlıq dərəcəsi ilə fərqlənir.
AXTARMA QURĞUSU (edit search) – Videokamerada yazıların axtarılmasını təmin edən qurğu. Videokamerada A.q. düyməsinin minus (-) işarəsi olan tərəfini basdıqda son yazılan təsvirin bir neçə saniyəsi monitorda görünür, daha sonra videokamera yenə "yazma" rejiminə keçir. Əvvəlcədən yazılmış lentin üzərinə yeni təsvir yazılırsa, əvvəlki təsvirlərdən hansının pozulacağını görmək üçün A.q. düyməsinin müsbətlə (+) işarə edilmiş tərəfini basmaq lazımdır. Beləliklə, lentdə olan təsvirlərin bir neçə saniyəsi ekranda görünəcək. Bu düymədən istifadə etməklə verilişi istənilən nöqtədən yazmağa başlamaq mümkündür.
