16.02.2006
QURBANIN OLUM
Oğlum Babəkə
Qaya mətinliyin, dağlar vüqarın,
Zirvələr amanın qoy olsun sənin!
Dillərdə söylənsin qeyrətin, adın,
Odun ürəklərdə qalansın sənin.
Babəkin adını daşıyan oğlum!
Babək tək igid ol, qurbanın olum!
Gecələr ulduz ol, gündüzlər günəş,
Buludla bulud ol, şimşəklə birləş.
Yaşa hünərinlə bəşər ömrünü,
Yuva qur, tarixin qoynunda yerləş,
Babəkin adını daşıyan oğlum!
Babək tək igid ol, qurbanın olum!
Palıdın kökü tək dərinə işlə,
Yol aç ucalığa mətin yerişlə,
Haqqın-ədalətin əlindən yapış,
Bir an sarsılmazsan sən bu gedişlə,
Babəkin adını daşıyan oğlum!
Babək tək igid ol, qurbanın olum!
Çinar çox ucadı, barı ha yoxdu,
Arsızın adı var, arı ha yoxdu.
Elə bir ömür sür, elə dolan ki,
Desinlər, həyatda gözləri toxdu,
Babəkin adını daşıyan oğlum!
Babək tək igid ol, qurbanın olum!
Namuslu oğul ol atan Əşrəfə,
Haqqın ətəyindən tutan Əşrəfə,
Son beşik övlad tək səni böyüdüb,
Arzu-murazına çatan Əşrəfə,
Babəkin adını daşıyan oğlum!
Babək tək igid ol, qurbanın olum!
Dostları ilə paylaş: | 
