Batbat 51 – Mga Buhat 13: 23-37 Sa Anay Ha Pagmisyun Ki Pablo -3 Antioquia Pisidia 2

Batbat 51 – Mga Buhat 13:23-37

Sa Anay Ha Pagmisyun Ki Pablo -3

Antioquia Pisidia - 2
Likuon

Na nakauma say Pablo ta Antioquia, Pisidia daw nag-agi sidan hu mga buntud ha nginaranan hu Tores ha ayuwà malogon ha tag-agihan.

1*Kagi hu duma ha mga naluwas ha din taan ha panahuna tagkadaluhan ganì si Pablo.

2*Hurà dan on badibadi ta inawaan sidan ki Juan Marcos.

3*Pag-uma hu Anlaw ha Tingdalopà ta Antioquia, Pisidia nagsolod say Pablo hu sinagoga.

4*Basin tagsuuton ki Pablo sa pinagsuy din hu pagkamagtutudlù aman tinahud daw hinonggat hu mga pangulu ta sinagoga hu pagpahayag.

5*Imbatbat ki Pablo sa kaagi hu mga apù dan daw siguru ha ayuwà tagkababayà sa mga Judio pagpaliman dan duun.
Impahayag Ki Pablo Sa Mga Tinagnà Mahitongod Ki Jesus

Impahayag ki Pablo ha ighiwal sa Manluluwas puun hu kaliwat ki Harì David, daw siguru ha sa mga utaw ta sinagoga, uyun gayod duun. Ba sa sunud ha inikagi ki Pablo nakapakudug gayod kandan alan.

Mga Buhat 13:23

6*Sa nakapakudug hu mga utaw iyan sa pag-ikagi ki Pablo ha si Jesus, iyan gayod sa Manluluwas.

7*Daw bi ta hurà dan hai dritsu tuuhi ta amin dan pa mga tig-insà.

P Imbà katun-i ki Pablo ha si Jesus sa insaad ha Manluluwas?

P Ku matuud ha iyan si Jesus sa insaad ha Manluluwas, na imbà himatayi hu mga pangulu hu mga Judio diyà ta Jerusalem?
Aman puun hu Mga Buhat 13:23-37 impamatuud gayod ki Pablo ta kandan ha si Jesus, iyan gayod sa Manluluwas.

8*Na hurà pa taan ipasulat hu Magbabayà sa Bag-u ha Tugun ha tagpaklaru gayod ha si Jesus sa Manluluwas. Iyan dà duun sa Daan ha Tugun.

9*Ba tigpahayagà ki Pablo sa mga tinagnà puun hu Daan ha Tugun mahitongod hu Manluluwas daw naklaru ha tinuman gayod ki Jesus sa kada sabuwa ha tinagnà aman klaru ha iyan gayod si Jesus sa Manluluwas.

10*Ha hurà pa si Jesus ta kalibutan, hininam hu alan ha mga Judio daw ayuwà madakol sa impatagnà hu Magbabayà hu mga propeta mahitongod hu Manluluwas para makilala ku makauma on.

Mga Buhat 13:24-25

11*Hinisgutan ki Pablo si Juan ha Bautista ta sa alan ha mga Judio nakabalità mahitongod kandin daw alan sidan namatud-an ha puun gayod si Juan ha Bautista hu Magbabayà.

12*Imbatbat ki Pablo ha nag-una si Juan ku Manluluwas daw inandam din sa gahinawa hu mga utaw daw iyan mismu si Juan nag-ikagi ha konà iyan sa Manluluwas ba iyan hinuun sa igsunud ta kandin.

13*Sa atù pa, ku nakauma sa nag-una hu Manluluwas klaru ha sa tagsunud, iyan on gayod sa Manluluwas.

Isaias 40:3, Malaquias 3:1 MB


Mga Buhat 13:26

14*Imbatbat ki Pablo duun hu mga utaw ta sinagoga ta Antioquia ha sa balità mahitongod hu kaluwasan, na impaawit hu Magbabayà ta kandan.

15*Sa atù pa, iyan dà kulang sa pagtuu dan duun para maluwas sidan.

16*Tuyù gayod hu Magbabayà ha maluwas sidan aman pinaawitan din sidan ku balità mahitongod hu kaluwasan.

Siguru ha tagpanginsà sa gahinawa hu mga utaw ha tagbatbatan ki Pablo ha, “Natuman labi sa tinagnà mahitongod ki Juan, ba ku iyan gayod si Jesus sa Manluluwas, imbà hurà kakilala hu mga pangulu diyà ta Jerusalem?”

Mga Buhat 13:27-28

17*Natun-an ki Pablo ha basin angay taan sa tigpanginsà hu gahinawa hu mga tagbatbatan din aman sinantà din pinaagi hu pag-iksplikar ha sa mga pangulu hu mga Judio ta Jerusalem, tagbasahà kada Anlaw ha Tingdalopà hu mga tinagnà hu mga propeta mahitongod hu Manluluwas ba hurà dan ganì kakilala si Jesus pag-uma Din ha iyan sa Manluluwas.

18*Impahayag pa ki Pablo ha ginamit hu Magbabayà sa madoson ha gahinawa hu mga pangulu ta Jerusalem para mapatay si Jesus.

19*Bisan hurà salà ki Jesus, pinahimatayan hu mga pangulu hu mga Judio daw pinaagi duun tinuman dan sa daan tinagnà ha mahitabù hu Manluluwas.

20*Daan tinagnà ha hadì igkilalahon sa Manluluwas.  (Isaias 1:3)
Isaias 53:3-6 MB

21*Daan labi tinagnà sa alan ha mahitabù ki Jesus daw tinuman hu mga pangulu hu mga Judio pinaagi hu hurà dan pagkilala ki Jesus.

Mga sulud, bisan imantu ha mga panahuna, madakol sa tag-awit hu mga Biblia ba hurà dan katun-i ku inu sa tagù duun. Tighinambug dan sa mga rilihiyon dan, daw iyan daan sa binuhat hu mga pangulu hu mga Judio.
Mga Buhat 13:29

22*Sa atù pa, ha matuman on sa ALAN ha tinagnà ha mahitabù ta ki Jesus human pa tinangtang puun hu krus.

23*Igbasahon taw anay sa duma ha mga tinagnà mahitongod hu paghimatayi ki Jesus ba hadì taw maamin mabasa imantu ta ayuwà madakol ba basta sa ALAN GAYOD ha mga tinagnà ha mahitabù hu Manluluwas natuman pinaagi ki Jesus.
Salmo 109:25 MB

Mateo 27:39
Salmo 22:16 AB

Juan 20:25
Salmo 22:18 MB

Juan 19:23-24
Salmo 69:21 AB

Mateo 27:34, 48
Salmo 22:1 MB

Mateo 27:46
Salmo 31:5 MB

Lucas 23:46
Salmo 34:20 MB

Juan 19:33
Madakol pa gayod sa mga tinagnà mahitongod ki Jesus ha natuman din taan ha anlawa ha kamulu tagbitay duun hu krus.

24*Tinuman hu mga pangulu hu mga Judio sa mga tinagnà mahitongod ki Jesus bisan hurà dan katun-i sa tagbuhaton dan.

Mga Buhat 13:29-30

25*Sa atù pa, ha matuman on sa alan ha tinagnà ha mahitabù ta ki Jesus, impatayhad duun hu linobongan duun.

P Hindu ganì inlobong si Jesus?

26*Duun hu kaugalingon ha lobonganà ki Jose ha tagaArimatea, ha sabuwa ha ayuwà sapian.  (Mateo 27:57-60)

Isaias 53:9 MB

27*Sa atù pa, daan tinagnà ha iglobong si Jesus duun hu lobonganà hu sapian.

28*Binanhaw hu Magbabayà si Jesus daw sa kamatayon ha insilut hu mga Judio ta ki Jesus binawì dà hu Magbabayà ta binanhaw Din man.
Mga Buhat 13:31

29*Ha mabanhaw on si Jesus hurà dritsu awita hu Magbabayà diyà ta langit ta tuyù Din ha madakol gayod sa makaahà ki Jesus para mamatud-an sa alan ha mga utaw ha bubuhay on gayod.

30*Labi on sa mga tinudluan din nagpaahaay gayod si Jesus ta kandan daw iyan sidan nahimu ha mga sistigus hu alan ha binuhat Din.

31*1 Corinto 15:5-8.

Mga Buhat 13:32-33

32*Sa atù pa, impaotong pandayà ki Pablo sa batbat din duun hu mga utaw ha tagaAntioquia ha tinuman on gayod hu Magbabayà sa insaad Din duun hu mga apù dan pinaagi hu pagbanhawa Din ki Jesus daw dayun amin on poman tatolu ha tinagnà ha hinisgutan ki Pablo.

Mga Buhat 13:33

P Sa atù pa, inu gaid hai ha insaad hu Magbabayà ta ki Harì David ha nadawat ki Jesus?

33*Insaad hu Magbabayà ta ki David duun hu Salmo dus ha igtimuon Din si Jesus puun hu kamatayon.

Mga Buhat 13:34-35

34*Impatagnà hu Magbabayà ta ki Harì David ha hadì malodak sa lawa ku Balaan ha puun hu Magbabayà. Daw tinuman gayod hai hu Magbabayà ta binanhaw Din man si Jesus ha hurà pa kalodak sa lawa Din.

Mga Buhat 13:36-37

35*Sa duma ha mga Judio, hurà dan hai kasabut ha tinagnà ta kagi dan ha iyan si David sa hadì malodak sa lawa din aman impaklaru ki Pablo ha nalodak gayod sa lawa ki David daw iyan dà gayod si Jesus sa hurà kalodak sa lawa Din.

Pinaagi hu katumanan tai alan ha mga tinagnà impamatuud ki Pablo duun hu mga utaw ta sinagoga ta Antioquia ha hurà gayod duwaduwa ha iyan gayod si Jesus sa Manluluwas.

Para Dà Hu Mga Palagbatbat

Tiini sa duma pa ha mga tinagnà mahitongod ki Jesus duun hu Daan ha Tugun. Sai ha mga tinagnà daan man tinagnà tagù hu ginatus ha mga tuig ha hurà pa igpakautaw si Jesus ta kalibutan. Daw madakol pa gayod sa mga tinagnà gawas tai ta kapin pa hu utsintay kwatru ha tinagnà sa hurà pa kahisguti din tai ha batbat.

36*Tinagnà ha virgin sa tagbatà ku Manluluwas. (Isaias 7:14)

37*Tinagnà ha Magbabayà sa Manluluwas. (Isaias 9:6, Zacarias 2:10-13)

38*Tinagnà ha mautaw sa Manluluwas ta Betlehem. (Miqueas 5:2)

39*Tinagnà ha ig-awaan si Jesus hu mga tinudluan din. (Zacarias 13:7)

40*Tinagnà ha ig-ila ta ki Jesus sa Magbabayà ha Ispiritu. (Isaias 11:2)

41*Tinagnà ha paulian ki Jesus sa mga amin din angul. (Isaias 35:5-6)

42*Tinagnà ha igbaligyà si Jesus hu suud ha higala Din. (Salmo 41:9)