Hüquq tərbiyəsinin vəzifələri Hüquq tərbiyəsinin qarşısında duran bir sıra zəruri vəzifələr vardır. Onların bir neçəsini nəzərdən keçirək:
Hüquq tərbiyəsinin qarşısında duran ən başlıca vəzifələrdən biri adamlara, xüsusilə məktəblilərə hüquqi biliklərin verilməsi və bu sahədə onlara bir sıra bacarıq və vərdişlərin aşılanmasıdır. Bunun üçün həmin adamların, məktəblilərin hiss və duyğularına təsir etmək lazımdır. Professor Nurəddin Kazımov göstərir ki, hüquq tərbiyəsinin ilk mərhələsində hüquqa aid, hüquq normalarına aid uşaqlarda hissiyyat yaradılmalıdır. Uşaqlar duymalıdırlar ki, cinayətdə, o cümlədən adamlar arasında davranış, əxlaq normaları ilə yanaşı hüquq normalarına uyğun tənzimlənir. Hər bir uşaq hiss etməlidir ki, cəmiyyətdə hüquq normaları mövcuddur. (Bax. N.Kazımov. Məktəb pedaqogikası, Bakı, Çaşıoğlu, 2005, səh 427)
Hüquq tərbiyəsinin qarşısında duran ikinci vəzifə birinci vəzifənin məntiqi davamı olaraq hüquq psixologiyası sahəsində görülən işlərin əhatə dairəsinin genişləndirilməsidir. Hüquq psixologiyası hüquq sisteminin reallaşması ilə bağlı olan psixoloji məsələləri aydınlaşdırır. O cinayət prosesi iştirakçılarının davranışının psixi xüsusiyyətlərini (şahid ifadələrinin psixologiyası, təqsirkarın davranışının xüsusiyyətləri, dindirməyə verilən psixoloji tələblər və i.a) öyrənən məhkəmə psixologiyasına, caninin davranışının və şəxsiyyətinin formalaşmasının psixoloji problemləri, cinayət motivləri və i.a. ilə məşğul olan kriminal psixologiya, islah-əmək koloniyasında məhkumun psixologiyasını, inandırma və məcburetmə metodları ilə tərbiyənin psixoloji problemlərini öyrənən plenitensiyalar və ya əmək-islah psixologiyasına bölünür. (Bax. Ümumi psixologiya. Bakı, Maarif, 1983, səh 54) Psixologiyanın göstərilən bütün sahələrində çalışanlar tərbiyə profilaktikası ilə məşğul olanlarla birgə işlədikləri halda məktəbliləri, cinayət işlərindən, cinayət hadisələrindən, cinayət qruplarının əhatəsindən, cinayət törətməkdən və ya digər bu kimi hallardan uzaqlaşdırmaq mümkündür.
