250 №-li «Əsas vəsaitlərin fondu» subhesabında idarənin bilavasitə sərəncamında olan əsas vəsaitlərin fonduna (köhnəlmə çıxılmaqla) qoyuluşlar uçota alınır. Yeni tikinti obyektləri istifadəyə verilərkən 250 №-li subhesabın kreditində və 01 №-li «Əsas vəsaitlər» hesabının müvafiq subhesablarının debetində mühasibat yazılışı ilə əks etdirilir.
Əsas vəsaitlərin əldə edilməsi 250 №-li subhesabın kreditində və 20, 21 №-li hesabların müvafiq subhesablarının debetində əks etdirilir.
Əsas vəsaitlər əvəzsiz olaraq alındıqda ilk dəyəri ilə 01 №-li «Əsas vəsaitlər» hesabının müvafiq subhesablarının debetində, qalıq dəyəri ilə 250 №-li «Əsas vəsaitlərin fondu» subhesabının kreditində və köhnəlmə məbləği üzrə isə 020 №-li «Əsas vəsaitlərin köhnəlməsi (amortizasiyası)» subhesabının kreditində əks etdirilir.
Əsas vəsaitlər təsərrüfatdan çıxarıldıqda (satıldıqda, silindikdə və ya əvəzsiz olaraq verildikdə) ilk dəyəri üzrə 01 №-li «Əsas vəsaitlər» hesabının müvafiq subhesablarının kreditində, qalıq dəyəri üzrə 250 №-li «Əsas vəsaitlərin fondu» subhesabının debetində və köhnəlmə məbləği üzrə isə 020 №-li «Əsas vəsaitlərin köhnəlməsi (amortizasiyası)» subhesabının debetində mühasibat yazılışı ilə əks etdirilir.
250 və 020 №-li subhesabların analitik uçotu Əmlakın (qiymətlilərin) uçot kartı forma № 1Q-də aparılır.
26 №-li «Azqiymətli və tezköhnələn əşyaların fondu» hesabı
260 №-li «Azqiymətli və tezköhnələn əşyalar fondu» subhesabında idarənin bilavasitə sərəncamında olan azqiymətli və tezköhnələn əşyalar uçota alınır.
Əldə edilmiş azqiymətli və tezköhnələn əşyaların, ağların, yataq ləvazimatlarının, geyim və ayaqqabıların dəyəri 260 №-li subhesabın kreditində və 20, 21 №-li hesabların müvafiq subhesablarının debetində əks etdirilir. İstismardan çıxmış azqiymətli və tezköhnələn əşyaların, ağların, yataq ləvazimatlarının, geyim və ayaqqabıların dəyəri 260 №-li subhesabın debetində, 071 və 073 №-li subhesablarının kreditində əks etdirilir.
260 №-li subhesab üzrə qalıq məbləğləri 070, 071, 072, 073 №-li subhesablar üzrə qalıq məbləğlərinə bərabər olmalıdır.
260 №-li subhesabın analitik uçotu Əmlakın (qiymətlilərin) uçot kartı forma № 1Q-də aparılır.
