Kommersiya krediti - müəyyən məbləğin, yaxud haqqın ödənilməsi müddəti təxirə salınmaqla, bir sahibkar (biznesmen) tərəfindən başqasına əmtəələr formasında verilən kreditdir (borcdur). Kommersiya kreditinin obyekti əmtəə kapitalıdır. Bu kredit forması müxtəlif əmtəələrin dövriyyəsinə, məhsulların istehsal dairəsindən (müəssisələrdən, şirkətlərdən) istehlak dairəsinə (bazara, alıcılara) doğru hərəkətini sürətləndirərək, məhz bu işə xidmət edir.
Kommersiya xidməti krediti hər iki tərəfə sərfəli olduğu üçün, tələb edilən faiz dərəcəsi adətən bank (dövlət) kreditindən aşağı olur.
Kommersiya kreditinin əsas aləti vekceldir. Vekcel təchizatçılar (istehsalçılar) tərəfindən alıcılara (istehlakçılara) verilən kredit növüdür. Başqa sözlə veksel qanunauyğun formada tərtib olunaraq, sahibinə müəyyən müddət keçdikdən sonra üzərində göstərilən məbləği ödəməyi öhdəsinə götürən şəxsdən tələb etmək hüququ verən xüsusi yazılı borc öhdəliyidir. İlk veksellər hələ XII-XIV əsrlərdə İtaliyada tətbiq edilmiş və istifadə olunmuşdur.
Bank (dövlət) krediti.Kreditin bu formasında dövlət özü kreditor, yəni borc verən tərəf rolunu oynayır. Bank (dövlət) krediti dövlət istiqrazları, qısamüddətli xəzinə öhdəlikləri, əhalinin əmanət kassaları və banklar vasitəsiylə dövlətin qiymətli kağızlarını almaq üçün xərclənən vəsaitlərindən ibarətdir.
İstehlak krediti.Bu kredit əhaliyə uzunmüddətli istehlak mallarının (mebel, soyuducu, televizor) nisyə alınması üçün verilir. İstehlak kreditinin müddəti 1-3 il olur. Lakin mənzil almaq, ev tikmək, torpaq sahəsi əldə etmək üçün xüsusi şəxslərə (fiziki şəxslərə) uzunmüddətli istehlak krediti verilə bilər.
Kənd təsərrüfatı krediti.Bilavasitə kənd təsərrüfatının inkişafı üçün nəzərdə tutulan kredit növüdür.
İpoteka krediti.Əmlakın, mülkün, torpağın, varıdatın girov qoyulması əsasında verilən kreditdir.
