Səkkizincisi, hazırda dünya bazarında orta-xırda ixrac və idxalla məşğul olan şirkətlərin fəaliyyətlərinin məhdudlaşdırılması prosesi müşahidə olunmaqdadır. Tədricən xarici ticarət əlaqələrinin iri və nəhəng inhisar birliklərinin əlində mərkəzləşməsi güclənməkdədir. Bu sahədə istər ölkə daxilində, istərsə də onun hüdudlarından kənarda, beynəlxalq bazarda geniş əlaqələrə malik transmilli korporasiyaların rolu durmadan artmaqdadır. Hələ ötən əsrin 80-ci illərindən başlayaraq, TMK-lar ABŞ-ın ümumi ixracının 84 faizini və idxalının isə 60 faizini öz nəzarətləri altına ala bilmişdilər. Sonralar güclənməkdə olan bu proses hazırda təkcə ABŞ-da deyil, dünyanın başqa ölkələrində də müşahidə olunmaqdadır.
Doqquzuncusu, indi beynəlxalq bazarda rəqabət mübarizəsinin ənənəvi metod və üsulları ilə yanaşı, dəyişmiş yeni şəraitə uyğun daha düşünülmüş, habelə səmərəli formalarından istifadə olunması meylləri geniş yayılmaqdadır. Əvvəllər rəqabət mübarizəsində həlledici rol oynamış qiymətlə rəqibi tədricən zəiflətmək və sonra tamamilə bazardan çıxarmaq taktikası, artıq ikinci dərəcəli amilə çevrilmişdir. Müasir elmi-texniki nailiyyətlərdən hərtərəfli istifadə, inteqrasiya və qloballaşma şəraitində rəqabət mübarizəsinin «ağırlıq mərkəzi», yüksək keyfiyyət, texniki yenilik, etibarlılıq, dizayn xüsusiyyətləri, məhsulun ekoloji cəhətdən saflığı kimi göstəricilərinin üzərinə keçirilir.
Onuncusu, beynəlxalq ticarətin yeni meyllərindən biri də ondan ibarətdir ki, hazırda dünya bazarına vaxtilə olduğu kimi ayrı-ayrı dövlətlərin öz daxili tələblərindən «artıq məhsul» çıxarması dövrü başa çatmışdır. İndi ölkələr arasındakı ticarət əlaqələrində qabaqcadan razılaşdırılmış sifarişlər sistemi, bağlanmış sazişlər və müqavilələr, habelə onların dəqiq yerinə yetirilməsi başlıca şərtdir.
Müasir mərhələdə beynəlxalq ticarət əlaqələri sistemindəki yeni meyllər sırasında xidmət (servis) ixracının sürətlə artmasını, bacarıqla təşkil olunmuş reklam işini, satışdan sonrakı xidmətin səviyyəsini, dövlət sifarişlərinin rolunu, iqtisadi əməkdaşlıqdan siyasi məqsədlər üçün istifadə etmək taktikasını da nəzərə almaq lazımdır.
