Canzone sarda composta per la grande sventura di Falconi Bachisio fu Giovanni da Fonni
Yüklə 136,2 Kb.
|
Canzone sardacomposta per la grande sventura di Falconi Bachisio fu Giovanni da Fonni.1. Oe cherzo mandare una cantone si mil’azzettan'in s'istamperia, m'had'animadu Peppinu Melia chi m'est amigu de perfezione, ma su racontu est de sa vida mia, de comente so ruttu in sa presone; e Peppinu Melia nd'est cuntentu pro intender de me un'argumentu.
Lettores chi leggides sa cantone cando tenides oras e momentos leades dae me isperimentos chi happ'istabilidu sa presone, gai podides dare attenzione a custos versos che cumandamentos ca bos servin de bonu e non de penas si osservades in palas anzenas.
Si osservades de sa mia sorte comente m'est toccada in generale lu potto narrer abbastante forte chi mai bene si non sempre male: unu dibattimentu in Tribunale mind'hana fattu, e duos in sa Corte senza contare su prim'in Pretura pro pasculu abusivu de pastura.
Deo su prim'imputu de sa fura l'happo tentu pro roba pecorina, su segundu in sa menzus zoventura m'han'imputadu pro una rapina, però sa terza piùs fort'e dura pro un'attera morte tiesina; ecco comente deo so andadu dogn'imputu creschiad'unu gradu.
Su mille noighentos trintasese, minde pott'ammentare appena appena chi so torradu a ruere in cadena giustu su noe d'austu su mese; cando m'ammento tota sa carena tremend'ancora dae testa a pese su m'ider gai perseguitadu, sena fagher niente e imputadu!
Deo sena perunu coidadu fattendemi su miu mestieri, sena l'ischire mi bido imputadu pro sa morte de carabinieri, su mandatt'e cattura m'hana dadu cando fia otto dies presoneri; si osservades e leggides tantu sa cantone ispiegat tottu cantu. [...]
Su noe de austu a s'impuddile, l'happo circa sas duas calculadu, mi so versu su riu incaminadu allegramente dae su quile ma tott'ind'una che omine vile m'hana de bottu su firm'intimadu: eo creia chi fin bardaneris e fin devisas de carabineris! 9. Tando subitamente pro dirittu happ'ubbididu a s'insoro rispettu narzende: «Firmu so, isto chiettu tantu non porto perunu delittu». E issos: «Firmu ancora e bista zittu», chi parian fattendelu a dispettu su m'intimare gai sos muschettes prontos pro iscattare sos grilletes!
Deo firmu chiettu so istadu sena movere in manos ne in pese! Tando s'est unu solu avvicinadu nendemi: «Itte ti naras, chie sese? Dami nomene giustu e sambenadu, s'annu chi ses naschidu, die e mese»; e in su mentres in cuss'abolottu ch'est bennidu Ferrandu e m'àt connottu:
«Itte ora bona» mi nesi, «Falcone, a inu'andasa a logu e impostu?» L'happo rispostu: «Pro abbare un'ortu chi li bisonzat s'irrigazione». Issos a puntu de riunione fin andende su notte e l'hana mortu! Chie lu dia crere poverittu ca lu occhian in cussu conflittu!
Cando m'àna firmadu in su cunfruntu cun sas armas in manos intimadas pustis d'unu quartu in d'un'improntu happ'intesu sett'otto fusiladas, de cussas numerosas dettonadas ma non nd'happo cherfìdu fagher contu pensende chi tra me custos clamores dian esser isparos tra pastores.
Deo sena l'ischire a manzanile mi la fio cantende in tanta brama mind'enid'un'avvisu a su quile chi arrestadu c'haian'a mama; un'istillu de ferru e non de lama mind'est'intradu in su mattess'istile pensende senz'ischire ite pensare: proitt'est chi la diana arrestare?
«Accidente» nappo nadu, «itte pretestu» cand'est bennidu s'amigu Puseddu narzendemi: «Itte pensas Bachiseddu a mama tua hana postu in'arrestu». Intantu allontanadu mi so prestu a una rocca de Antoni Cuveddu e da inie hapo idu falende sos signorinos a caddu trottende.
Derettos a sa domo sun andados trottend'a caddu ca non fin'istraccos inie agattan tottu sos teraccos e dae caddu sinde sun falados; subitamente los hana ligados che unu gruppu de omines maccos e leados los han a cuddu logu pro intender de issos s'interrogu.
Cando los hana fattos presoneris los han'incaminados in s'istrada; s'atteru die de carabineris bido tottu sa zona circundada, de appuntados e brigadieris chi pariat sa terra semenada b'andend'a controllare sos pastores tottu pro culpas de sos malfattores.
Sos malfattores viles assassinos bellu regalu noc'hana lassadu! Bidian su pastore e domandadu carta d'identidad'e bollettinos; intro sas tancas e de sos caminos non 'de lassein sena controlladu, tottu pienu de isquadriglias girende a pè, a caddu cun sas briglias
Deo dae lontanu abbaidende bidia tottu sos giros insoro; palpitende sa mente cun su coro sa mente cun su coro palpitende ca intendia chi mi fin chirchende pro mi partire traduttu a Nuoro, creian chi fi' eo s'assassinu de Giuseppe Ferrandu tiesinu. [...]
Su sero, prima de iscurigare, mi leo su bagagliu in farrancas, grazi'a Deus haia sas ancas sanas, fortes de poder caminare; ca non cheria a nemos incontrare passei a truncadura tancas tancas, ma andende cun grande attenzione pro no mi bider peruna persone... 22. Insumma tottu cantu a truncadura che so passadu fìnas a Sa Serra, girende a d'ogni parte e d'ogni perra mi faghiad'andare sa paura! Comente unu puzone a boladura chi non cheria ponner pè in terra e bintradu che so che su puzone a una domo sutta s'istradone.
Una giovana sola happ'agattadu ninendesi su fìzu in su balzolu, iscur'ancora piena 'e dolu pro su maridu sou isfortunadu! Cando m'hat bidu subitu m'hat nadu; «Bachis faghe coraggiu non ses solu, ca non ses solu chi ti sun chirchende totta sa idda sunis arrestende».
Tando m'had'unu pagu incoraggidu su intendere a issa nende gai, sende chi issa puru fìd'assai pensende pro s'amabile maridu; poi sa notte e tottu m'hat battidu una persona chi non creio mai e faeddada l'happ'in domo sua in presenzia a issa e no a cua.
Custa persone fid'un'avvocadu, niente mancu che Cualbeddu su chi vived in Nuoru Antoneddu cun Badone Manella su connadu; appena sun intrados m'hana nadu: «Coment'est custu fattu Bachiseddu?»; lis racconto su contu risoluttu, «Accidente» hana nadu, «est troppu bruttu!»
Tando m'had'ordinadu: «Ponimente caru Bachis Falconi, e ti presentas; si a ti presentare ti b'istentas pensan chi tue ses su malvivente; proitte b'istas foras innocente? Senza b'esser motivu t'ispaventas!». E tando happo pensadu a dicidire su die seighi a mi costituire.
Deo pro che ogare a mamma mia so partidu a preione fort'e sanu ma l'ischit sol'unu parent'ebbia chi m'hat bidu partinde su manzanu pienu de dolore e d'angustia, appena l'happo toccadu sa manu appena l'happo sa manu toccadu ca fì'andende a istare inserradu! [...]
Infine, pro sighire s'argumentu comente so arrivadu a Nuoro, appenas arrivadu in su momentu m'han'inserradu peus d'unu moro, vinti tres dies fissu m'hana tentu in sicurezza e suspiros de coro: né aria né lughe né respiru in segregazione e in ritiru. [...]
In penas che a Cristos in Calvariu cando l'han'in sa rughe crocifissu gaettotu a mie che a issu, pro sa rughe m'hant postu su rosariu: un'illustre severu Comissariu m'interrogheidi a dogn'ora fissu fattendemi unu mare de minettas chi m'intrein'in coro che saettas.
Su Capitanu cun su Questore fin sezidos inie abbaidende e cuddu contr'a mie interroghende cheriat d'isfogare su furore, a li fagher'ischire su mortore chi no ischia mancu itte fìt nende, cosa de nd'accusare maccamente calc'unu poveritu e innocente!
Sind'haera acusadu poverittu ite bellesa no mi fìd'istadu? Tando su chi hat fattu su delittu niente pagu sinde fìt brulladu, però su coro de su sottoscrittu sa veridade giusta ha raccontadu, solu chi happo fattu s'importunu a nasconder su nomen de unu.
De unu mai bidu e nen connottu si fit de gente mala o gente ona, eppuru su matessi gai e tottu l'happ'occultadu de brava persona pro culpa sua su barbaru ignotu no s'hana rovinadu intro sa zona, ca est passad'inie in su quile armadu de pistola e de fusile. [...]
Pro sa morte 'e Ferrandu tiesinu fia cant'eo e partire in Volterra ca fìd'andende caminu caminu senza pensare a sa gent'erra erra incontrain'in su barbaru assassinu l'hat isparadu e che l'hat postu in terra; cussu li paret c'hat tentu vantaggiu su causare unu simile oltraggiu! 41. Però no est a fagher valentia sos chi l'incontrana a lis dare fogu! Pro culp'insoro sa persona mia si l'hana posta in Questura a giogu... ma meno male sa pregadoria Deus m'had'assistidu in cussu logu ca mi tenian peus d'un ischivu chi mi cherian'ispeddare vivu.
M'hana mantesu circa unu mesetto poi m'hana a su carceri ispedidu, tando vicinu mind'hana attidu a Costantinu Zunnui Caghetto, s'iscuru! L'intendia addoloridu de tantu pattimentu poveretto! E fit reione de s'addolorire ca fìt troppu s'orribile suffrire. [...]
Unu sero preghende a Sant'Antoni tristu su veru coro addoloridu, senza mind'abbizzare ch'est bennidu su sottu capu Severu Picconi nendeini: «Como t'invocas Falconi pustis chi has a Ferrandu bocchidu», ma mi l'hat nadu comente ischerzende ca m'hat bidu in su seriu preghende. 45. Deo l'happu rispostu e isclamadu cun d'unu forte suspiru invocante: «Su chi hat a Ferrandu istramazzadu Deus lu paghed'in su breve istante: comente m'hana a mie incadenadu innocent'in sa zona dimorante gai incadenen a chie l'hat fattu pro totta vida, su grave reatu». [...]
Cando m'hana partidu dae cella pro minde trasportare a camerone happ'agattadu una riunione de gente sana e gioventude bella, tottu cantos de una parentela presentavan'unidos in cumone proitte in camerone est un'usanza de riunire che in fratellanza, 52. Deo puru fidele so intradu a cunversare cun sa carovana però su primu chi happ'incontradu leale francu a Peppinu Muzzana: naschidu est gadduresu e battizzadu in Santu Teodoro chi li nana, ca dae cando so intradu inie no hat abandonadu pius a mie.
Mai più no m'had'abbandonadu pro cantus fimus paris in presone anzis pius continu hamus trattadu in su vittu che frades a cumone; poi a Peppe l'hana giudicadu e l'hana postu in liberazione, e tando deo mi so riunidu cun dun'atteru amabile partidu.
Custu partidu fìt orotellesu Nicola Fadda cun Felice Bosu, su trattu caru chi hamus istesu fìt'unu trattamentu istrepitosu: fina sos carcerados l'han cumpresu su modu nostru, bellu e generosu ca su trattare meu e de Felice fid'unu trattu caru e ragnatrice.
Deo cun Felis e ziu Nicola trattaimis de ver'affezione tottostres ritirados a sa sola sena fagher cun nemos chistione, non che a certos che canes de mola ch'istaian brighende in camerone, nois tres cun amore e paghe tantu che Babbu, Fizu, s'Ispiritu Santu.
Infìnes tando su dibattimentu m'ha assignadu de un'improvvisu, su vintisette aprile s'avvisu m'hana notifìcadu a nomen tentu; pro su trintunu de maju precisu l'happ'a tenner in vida pro ammentu, pro totta vida mind'happ'ammentare ca mi l'hana torradu a rinviare.
Rinviadu mi l'hana novamente pro lu torrare a noa istruttoria, pro cantu so in su mundu vivente l'hap'a tenner'in coro e in memoria. Si est a raccontare totalmente non bastad'a descrier'un'istoria, ca dae cando l'hana rinviadu atteros duos hannos ch'est passadu.
Cust'est s'annu trintotto e noighentos chi mi l'hana torrare a rinviare ma si est tottu cantu a raccontare non bastad'a intender sos lamentos: trinta meses in d'unu cellulare pienu de dolores e patimentos. Sos patimentos mios e oltraggios mi los han causados sos malvaggios. [...]
Ite bos pared'a deliquenzia comente tiran gai a tradimentu! Ma meno male dopo s'udienzia chi han suspesu su dibattimentu pro chiarire sa mia innocenzia hant fattu un'attu de isperimentu, si cussu no m'haerad'assistidu oe che fia mortu e seppellidu. 66. Su bindighi 'e lampadas precisu m'est arrivada a mie sa notizia, sena mi dare in precedenzia avvisu m'hana leadu a fagher sa perizia, su manzaneddu de un'improvvisu cun tota ganta s'intera giustizia, e b'andados che semus a inie bonu manzanu appenas fattu die.
Deo cun sa giustizia presente so andadu ligadu presoneri, su Magistradu cun su Presidente, a ue est mortu su Carabineri, inie hana medidu attentamente palmu pro palmu cun s'ingenieri; cando c'hana medidu e fattu tottu in parte s'innocenzia hant connottu.
Tando semus torrados a partire novamente a s'antiga cittadella! Deo ligadu, si podet ischire, cada costaggiu in d'una sentinella; cando che so torradu a require m'han'afferradu e m'hana postu in cella, ecco su piaghere chi m'hant fattu pro no mancare a s'insoro cuntrattu. [...]
Ma oramai pro sa solitudine non de tenia meda coidadu, tantu c'haia postu s'abitudine in cellulare a bistare isoladu, su pius peus fit sa seccatudine ca mi faghian bistare amudadu senza mi poder pesare una oghe comente calchi orta fatto inoghe. 71. Deo solu dolente poverittu! vivende amaramente detenutu sena l'ischire de tale delittu m'han'adossadu tottu cuss'imputu; grande sorveglianza m'han'iscrittu pro mi sorvegliare ogni minutu, una sorveglianza che a mie mai a nemos l'hana fatta inie.
Mai a nemos in su cellulare in beranu, in istiu e in ierru coment'a mie a mi sorvegliare, trinta meses precisos de inserru mi l'hat fattu su coro ammoddigare chi haia su coro che su ferru, ma como ammoddigadu sa presone mi l'had'a mie che lana e cotone,
Sa cella nominada numer'otto l'app'abitada gratis in galera! che cuddos girovagos de su lotto chi non pagan alloggiu né ostera, inie haia tottu su fagotto, su vasu, iscova e sputtachiera senza contare de sa robba netta posta a disparte cun sa bilancetta.
Sa bilancetta chi bad'in sa cella est una lastra attacada a su muru senza contare un'attera tabella chi bad'inie su matessi puru. Cussa li servid'a sa sentinella pro zoccare su ferru fort'e duru: su ferru duru lu zoccan'inie a manzanu e a sero d'ogni die.
Deo cando m'amento e cunsidero mi dad'ancora disperazione! Inie su manzanu e i su sero sa gente la visitan in presone, su notte b'intran ch'in su lantione paren b'intrende a unu cimitero, cun d'unu lantione carcerariu simile a su lugore mortuariu!
Unu lugore in fiagu che chera cand'est postu su mortu in sa letera, comente su lugore in Campusantu inghiriadu in su nieddu mantu, ga' e tottu eco un'omine in galera che unu mortu, continu piantu, su mortu lu pianghene una ia ma in presone est sempre in agonia.
Beru chi sa presone est pro sos bios e i su campusantu est pro sos mortos, certu hazis a narrer caros mios, dae galera medas sunt risortos ma sos ch'in campusantu sun sepportos pro un'eternu hant dadu sos adios, però sos chi che sunu sepoltados istana menzus de sos carcerados.
Deo bell'e sett'annos so istadu in cussa pena trista e dolorosa, di'e notte sufrinde isventuradu senza cunfortu de peruna cosa coment'unu defuntu sepoltadu chi est continu esclamende in sa losa, ga'e tottu fi'eo in cussu logu privu de allegria e disaogu. [...]
A sa fine iscultade su sucessu de sos mios dolores e affannos: su baranta m'han fattu su processu, m'han cundennad'e m’han dadu trint'annos, s'innocenzia mia su revessu hana cumpresu sos illustres pannos ca non devian cundannare a mie né a trint'annos né manc'una die. [...]
Simile tale m'hana cundennadu a tres deghinas de reclusione, tand'Oraziu Sechi s'avvocadu l'ad'appellad'a sa Cassazione pro li dar'unu bonu risultadu de sa mia ammirabile reione, e ispettende dae cras'in poi no s'ischit galu né gai né goi.
Berlinguer fìt su primm 'e tottu ch'est istadu a deponner sos motivos, coment'hat bidu cumpresu e connottu chi sos dirittos mi los hana privos issu s'est impegnadu e post'in mottu cun coro fìrmu e sentimentos vivos chi resessire deviad'a prou de lu torrare a giudiziu nou.
Ite si resessiad'in s'onore Berlinguer a ottenner s'intentu? Cun Oraziu Sechi professore vittoriosos in s'annullamentu de sa prima sentenza s'errore chi hana fattu a su dibattimentu pritte ch'han fattu un'errore evidente a mi dare trint'annos innocente! [...]
Sa preghiera quotidiana mai no m'est mancada manc'un'ora massimu a Deus e Nostra Signora, cun sa legge cattolica romana si m'assistiat de ch'essire fora dae s'orrenda terribile tana; e a forza e pregare addoloridu est bennida s'ora e fora so bessidu. 95. Beru chi so bessidu a contrabandu dae su bagnu penale d'Alghero, dae sa losa Giuseppe Ferrandu chi hapid'isclamadu cunsidero cun ordine divinu su cumandu su vintitres de frearzu su sero; a m'iscappare dae Tramariglio so resessidu e minde meraviglio.
S'annu barantatres e noighentos potto narrer a ora de sa una in estremos minutos e momentos cun su coro nieddu e mente bruna mi sun bennidos custos pensamentos: in mesu de sa mia disfortuna de improvvisu a mi dare a sos pese su vintitres de frearzu su mese.
Su vintitres de frearzu distintu, lu potto precisare attentamente, send'intornadu da unu recintu suffrinde milli penas innocente su Signore 'e chelu m'had'ispintu pro m'iscappare in cuss'attu presente, e iscappadu so facci'a su mare che puzone cun alas a bolare.
Deo su sero chi so iscappadu cun milli pensamentos in sa testa, pagos passos appena allontanadu che grabolu currende in sa foresta baranta fusiladas han bettadu tottu sos secundinos in sa gesta, fattende vinta a mi cherrer colpire isparende a su entu senza ischire!
Dae lontanu d'ogni isparatoriu s'intendiat pariat in su fronte e su capu gridende aiutoriu a intonare sutta unu monte; deo cun su disign'e cumprendoriu che so passadu fin'a Porto Conte e da inie hapo idu una turra cunfìnante cun terras de sa Nurra.
In s'ora tales terras m'han de certu ristorad'unu pagu sa persone, comente mi so idu a camp'apertu sutta su campu 'e s'aviazione, ca su puntu precisu app'iscopertu de su livellu in sa direzione, che so bessidu dae su perigulu girendemi a dogn'ala e dogn'ispigulu
Deo appenas chi nd'è bessidu isculzu, istrazzulau e derelittu, arrivadu nde so a unu sittu che puzone iscapadu da su nidu, inie m'hana calzadu e bestidu e sollevadu in tottu poverittu! Comente sullevadu m'han'a mie Deus los ricumpenset nott’e die.
Ecco chi da inie nd'e fora mancari duramente cundennadu suffrinde penas e ois ancora vivende in sa campagna isventuradu! Sena b'intrare a sa mia dimora de sa domo paterna chi so nadu ca sa sorte indurida s'est gasie airad'aspramente contr'a mie! [...]
Carabineris chi sezis a pittu pro catturare sa persone mia, mirade chi no happo su meritu mancari chi bos benzat carch'ispia, ca senz'ischire m'agato traittu innocente che Deus e Maria, e si non so innocente de custu cherzo chi prove doppiu disgustu. [...]
Isco cumbintos chi los hana tantu su capitanu cun su Maresciallu ma si colpides custu coro affrantu errades e faghides mannu fallu! Ca senza culpa so che unu santu, pulidu nettu chei su cristallu, comente so pulidu mi cheria sanu salvu torrare in'allegria.
Si m'essere torrada s'allegria dae s'isventurosa latitanza mi diat parrer in vida mia tott'amorosidad'e fratellanza, finas a cuddos chi faghen s'ispia senza mutivu e senza circustanza los dia perdonare ugualmente senza lis tenner odiu niente.
Duncas ziu Ferrandu Salvadore cun signora Fiori Rosalia, su fruttu pius caru de s'amore si l'hana mortu no est culpa mia, l’isco ch'est troppu mannu su dolore chi non si podet suportare bia, però sa culpa est de su malvivente ca l'had'istrammazzadu prontamente
Caru Ferrandu ti lu prego tantu, in sa tumba chi tue ses seportu, isclama nessi da' su Campusantu pro su malefattore chi t'hat mortu, chi su risu li girede in piantu pro cantu durad'issu in discunfortu, chi non torret'a bier die ona su chi hat mortu a tie in cussa zona. [...]
Caru Giuseppe, sa notte fatale chi deo t'bapp'in sa zona incontradu tue già l'ischis Ferrandu istimadu chi dai mene non d'has tentu male, su chi t'hat dadu su colpu mortale deved'esser calcunu iscelleradu chi no giughet né anima e né coro solu che a Cainu vile moro. 114. Ite dolore Giuseppe Ferrandu chi hat proadu babu e mama tua cando lis est andadu su cumandu senz'ischire niente a domo sua; de cuddu fruttu insoro venerandu comente fisti tue a galampua lu pott'ischire su chi han proadu intendente su fizu istramazzadu! [...]
Finis t'offerzo Giuseppe Ferrandu sa mia fervorosa preghiera innalzende su tou memorandu che Garibaldi chi est in Caprera sentinelladu suta su cumandu su pernu de s'italica bandera, custu sempre t'offerzo notte e die che Garibaldi veneren'a tie... Yüklə 136,2 Kb. Dostları ilə paylaş:
|