Catalpa scop. NÖVLƏRİNİn toxumla çoxaldilmasi xüsusiYYƏTLƏRİ

Azərbaycan Milli Elmlər Akademiyası

Mərkəzi Nəbatat Bağının əsərləri, 2014, XII cild

 

UOT: 581.143 

 

ABŞERON ŞƏRAİTİNƏ İNTRODUKSİYA EDİLMİŞ BƏZİ KATALPA (CATALPA SCOP.) NÖVLƏRİNİN TOXUMLA ÇOXALDILMASI XÜSUSİYYƏTLƏRİ 

 

Qarayev  S.Q., Nəcəfova C.N. 

AMEA Mərkəzi Nəbatat Bağı, Bakı, Az-1004, Badamdar yolu,40.

e-mail: [e-mail]

 

Məqalədə Abşeron şəraitində introduksiya olunmuş Catalpa Ovata G.Don – yumurtaşəkilli katalpa və Catalpa bignonioides Walt – yasəmənyarpaq katalpanın toxumla çoxaldılması xüsusiyyətlərindən bəhs edilir. 

Açar sözlər : Katalpa, introduksiya, toxum, cücərmə faizi, rüşeym, ləpə yarpaqları. 
GİRİŞ
İntroduksiya edilmiş bitkilərin toxumla çoxaldılması xüsusiyyətlərinin öyrənilməsi, onların mövcud şəraitdə becərilmə perspektivliyinin proqnozlaşdırılması üçün qiymətli əsaslar verir. Eyni zamanda bu bitkilərin yeni torpaq, iqlim şəraitinə nə dərəcədə uyğunlaşdığı haqqında fikir söyləməyə zəmin yaradır [10]. 

Bir sıra tədqiqatçılar müxtəlif torpaq, iqlim şəraitində introduksiya edilmiş ağac və kol bitkilərinin toxumla çoxaldılma xüsusiyyətlərini öyrənmişlər [1, 3, 5, 7, 11,13]. 

Bizdə Abşeronun quru subtropik iqlim şəraitində çiçək və yarpaqlarının yüksək dekorativ görünüşü olan katalpa növlərinin toxumla çoxaldılması xüsusiyyətlərini öyrənmişik.