Tədqiqat və dəstək gəmilərinin göyərtəsində tədqiqat müddəti ərzində təmizlik və texniki xidmət məqsədilə az həcmdə kimyəvi maddələrdən (məsələn təmizləyici mayelər, boyalar və s.) istifadə olunacaq. Bütün kimyəvi maddələr hermetik konteynerlərdə və ikinci dərəcəli tutuma malik sahələrdə saxlanılacaq. Seysmik tədqiqat işləri ərzində formalaşan hər hansı tullantı növləri də gəminin göyərtəsində təyinatına uyğun konteynerlərdə saxlanılacaq və qabaqcıl sənaye təcrübələrindən və ehtiyatlı rəftar prosedurlarından istifadə etməklə dəstək gəmiləri tərəfindən sahilə daşınacaq. Aşağıdakı 7.4.3-cü bölmədə müəyyənləşdirilmiş nəzarət və təsirazaltma tədbirlərinin yerinə yetirilməsi nəzərə alınaraq kimyəvi maddələrin yaxud tullantıların qəza ilə/təsadüflə dəniz mühitinə dağılması ehtimalının çox aşağı olduğu hesab edilir. Ehtimal edilməsə də belə, hermetikliyin pozulması və təhlükəli maddələrin dənizə axması halında, təsirin əhəmiyyətinin aşağı olacağı gözlənilir, çünki axıdılmış hər hansı maddələr məhdud həcmdə olacaq və onlar lokal təsirə malik olacaq. Yüksək riskli təhlükəli kimyəvi maddələrin və tullantıların dağılması baş verdiyi təqdirdə, dəniz biotasına potensial toksik təsirləri minimuma endirmək üçün dərhal (qeydə alınmış qəzadan sonra 24 saatdan gec olmayaraq) dağılmış materialın toplanılması əməliyyatları təşkil ediləcək.
