ONOR. KARMENU VELLA (Ministru tat-Turiżmu u s-Self-Employed): Filwaqt li kien hemm kiri ta' ajruplani minn u lejn l-Air Malta, il-kumpanija la biegħet u lanqas xtrat ajruplani matul il-perijodu msemmi mill-Onor. interpellant.
SAĦĦA - TOBBA
13344. L-ONOR. CENSU GALEA staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jagħti tagħrif dwar kemm hu l-complement tat-tobba meħtieġa fis-servizz tas-saħħa fid-diversi partijiet li għandu l-gvern?
F'liema postijiet hemm nuqqas ta' staff ta' tobba fis-servizz tas-saħħa? Kemm hu n-numru ta' tobba nieqsa f'dan is-servizz?
ONOR. MICHAEL FARRUGIA (Ministru tas-Saħħa, Kura ta' l-Anzjani u Affarijiet tal-Familja): Id-diviżjoni tas-saħħa qed tħejji manpower plan biex jiġi stabilit kemm hu n-numru ta' tobba meħtieġa fis-servizz tas-saħħa. Billi dan l-eżerċizzju għadu mhux lest m'iniex f'qagħda li nagħti tweġiba.
