ONOR. ALFRED SANT: Qed inpoġġi fuq il-Mejda tal-Kamra żewġ skedi li juru ħafna mill-informazzjoni mitluba mill-Onor. Interpellant.
Ma kenitx tinżamm statistika separata dwar każi fejn il-Public Service Commission qablet mar-rakkmandazzjoni tal-Kummissjoni għall-Investigazzjoni ta' Inġustizzji iżda varjat minn din ir-rakkmandazzjoni u dawn fil-fatt huma nkorporati man-numru ta' dawk li ġew aċċettati mill-PSC.
PULIZIJA - BALLU
2141. L-ONOR. AUSTIN GATT staqsa lill-Prim Ministru: Peress illi b'risposta għall-mistoqsija parlamentari numru 653 ta' nhar it-Tnejn, 20 ta' Jannar, il-Prim Ministru poġġa fuq il-Mejda tal-Kamra kopja ta' video; u peress li l-għada għal ħabta tas-7.00 p.m. jien tlabt kopja tal-video mingħand l-Iskrivan tal-Kamra u dan informani li ma kellux kopji u għalhekk stedinni biex immur narah l-għada minflok ma jagħmilli kopja; u peress li jien informajtu li kont ninsisti għal kopja, aktar u aktar, meta fl-Aħbarijiet ta' Super 1 Radio tas-5.45 p.m. kien ġie mxandar li partijiet mill-video kienu se jiġu trasmessi minn Super 1 TV fl-Aħbarijiet tas-7.30 p.m.; u peress illi l-Iskrivan tal-Kamra nformani li ħadd ma kien talab kopji tal-video u li ħadd ma ngħata kopja tal-video, jista' l-Prim Ministru jgħid jekk jafx kif dokument tal-Gvern spiċċa f'idejn il-media tal-Partit Laburista u jekk ma jafx, allura hux lest jikkummissjona rapport biex jinvestiga l-każ?
