ONOR. GEORGE PULLICINO: Jista' l-Prim Ministru jgħid għal kemm-il siegħa l-Onor. George Abela huwa mitlub jaħdem? Dan minħabba li f'mistoqsija parlamentari għal domanda oħra li kien hemm, it-tlieta min-nies l-oħrajn elenkati kellhom, 20, 40 u 20 siegħa rispettivament, iżda għal Dr George Abela ma ssemmewx ħinijiet stabbiliti.
MADAM SPEAKER:Il-Prim Ministru.
ONOR. ALFRED SANT: Bir-rispett kollu lejn l-Onor. Interpellant, Dr George Abela jaħdem ħafna iktar milli kien jaħdem l-Onor. Interpellant meta kien chairman tal-Kunsill Malti tax-Xjenza u Teknoloġija. (Onor. Membri: Hear, hear) Lil Dr George Abela ġieli ċempiltlu, kellimtu u ltqajna f'ħinijet differenti tal-ġurnata - fit-8.00 a.m., f'nofs il-lejl, f'nofs in-nhar - u anke seba' darbiet fil-ġimgħa. Nista' ngħidlu illi x-xogħol li jagħti m'huwiex assolutament kontrollabbli bil-ħin għax jaħdem ħafna iktar milli suppost jaħdem konsulent.
