2470. L-ONOR. TONIO BORG staqsa lill-Vici Prim Ministru, Ministru għall-Affarijiet Barranin u ta' l-Ambjent.: Jista' l-Viċi Prim Ministru jgħid x'applikazzjonijiet hemm quddiem l-Awtorita' ta' l-Ippjanar dwar il-post magħruf bħala "Australia Hall"? Min applika dwar dan il-post?
ONOR. GEORGE VELLA: Mill-informazzjoni ta' l-Awtorita' ta' l-Ippjanar ma' jidher li hemm l-ebda applikazzjoni fuq il-post magħruf bħala "Australia Hall".
IMPJIEGI - INĊIDENTI FUQ IL-POST TAX-XOGĦOL
2471. L-ONOR. JOE CASSAR staqsa lill-Ministru tal-Ħarsien Soċjali: B'riferenza għall-mistoqsija parlamentari numru 257 u t-tweġiba mogħtija dwar korrimenti/imwiet fuq il-post tax-xogħol, jista' l-Ministru jgħid f'liema industrija ġraw dawn il-korrimenti/imwiet?
ONOR. EDWIN GRECH: Iċ-ċifri mitluba dwar inċidenti fuq il-post tax-xogħol bejn l-1990 u l-1995 huma kif indikat hawn taħt. Mhux possibli li jiġu provduti ċ-ċifri għall-1996 għaliex għad hemm każijiet li weġġgħu fis-sena 1996 u għadhom ma daħlux lura għax-xogħol.
Wieħed irid jikkonsidra li ċ-ċifri mogħtija f`din ir-risposta huma dawk li kienu seħħew f`dik is-sena waqt li dawk mogħtija fir-risposta numru 257 jirriflettu n-numru ta` persuni li tħallsu f`dik is-sena partikulari.
2473. L-ONOR. JOSEF BONNICI staqsa lill-Ministru ta' l-Ekonomija u l-Finanzi: B'riferenza għar-risposta ta' mistoqsija parlamentari numru 2188, jista' l-Ministru jagħti "breakdown" ta' kemm it-tnaqqis mill-ġbir ta' l-"income tax" huwa dovut għat-tlett sorsi msemmija, jiġifieri għax:- (a) għolew is-"ceilings" tad-dħul mhux taxxabbli; (b) pagamenti tal-"Provisional Tax" minn Korporazzjonijiet Parastatali li ma kienux miġbura għax profitti ma kienx hemm; (c) "Witholding Tax" ta' 7% fuq qliegħ kapitali kienet anqas minħabba li n-numru ta' kuntratti għas-sena 1996 kien anqas mis-sena ta' qabel? Jista' l-Ministru jagħti din l-informazzjoni mhux biss għal Diċembru ta' l-1996 iżda wkoll għal Novembru ta' l-istess sena kif ukoll kif titqabbel ma' l-istess xhur ta' l-1995? Ikun apprezzat ukoll jekk il-Ministru jelenka liema kienu l-korporazzjonijiet imsemmija f'paragrafu (b).
