ONOR. EVARIST BARTOLO: It-tindif inkulż il-'common areas' qed isir regolarment. Kien hemm xi diffikultajiet fi żmien il-festi tal-Milied minħabba l-'Vacation Leave'. Dwar il-ħġieġ hemm xi diffikultajiet minħabba l-periklu. Id-Diviżjoni qed tara x'jista' jsir.
Ma hemmx problema dwar in-numru ta' 'cleaners'.
Dwar dan il-perjodu partikolari, ma nħassx il-bżonn li jittieħdu passi dixxiplinari.
TAL-QROQQ - XOGĦOL FUQ TOROQ ĠODDA
2485. L-ONOR. BERTU PACE staqsa lill-Ministru għax-Xogħlijiet Pubbliċi u Kostruzzjoni: Jista' l-Ministru jgħid kemm tħallas il-konsorzju ta' kuntratturi li qegħdin jaħdmu fuq il-proġett ta' toroq ġodda f'Tal-Qroqq mill-1 ta' Ġunju ta' l-1995 sa l-aħħar ta' Diċembru ta' l-1996, xahar b'xahar? Jista' l-Ministru jgħid x'kienet l-istima oriġinali tal-proġett u fil-fatt kemm hu antiċipat issa li parti mix-xogħlijiet huma lesti, li se jkun il-valur totali tal-proġett? Meta hu pproġettat li x-xogħlijiet kollha jitlestew u meta fil-fatt kellhom jitlestew skond il-"Letter of Acceptance" li kienu rċevew mid-Direttur tal-Kuntratti?
