ONOR. EVARIST BARTOLO: Il-membri li jiffurmaw il-Kumitat ġdid tat-Tmexxija tal-Festival Internazzjonali tal-Arti għadhom qed jiġu kkunsidrati u dan il-proċess dalwaqt ikun finalizzat u jkunu mħabbra pubblikament il-membri ta' dan il-Kumitat. Kif jista' jifhem l-Onorevoli Nterpellant żgur huwa t'interess Nazzjonali li tkun għażla għaqlija.
KUNSILL NAZZJONALI TAŻ-ŻGĦAŻAGĦ - RAPPREŻENTANTI
2491. L-ONOR. RICHARD MUSCAT staqsa lill-Ministru ta' l-Edukazzjoni u Kultura Nazzjonali: Peress li issa ilhom li taw ir-riżenji tagħhom it-tlett rappreżentanti tal-Ministeru fuq il-Kunsill Nazzjonali taż-Żgħażagħ minn Ottubru 1996, jista' l-Ministru jara li jiġu maħtura rappreżentanti oħra mill-aktar fis b'mod li dan ikun kostitwit regolarment skond l-istatut? Jista' jgħid ukoll min huma dawn il-persuni?
