ONOR. EVARIST BARTOLO: Il-Fiera tal-karrieri li qed jirreferi għaliha l-Onor. Interpellant tittella' kull sena, sena f'Malta u sena f'Għawdex. Hekk fl-1995 inżammet f'Għawdex u fl-1996 inżammet fit-Trade Fair Grounds, in-Naxxar iżda peress li f'Settembru 1996 kienet ittellgħet ukoll attivita' li kellha wkoll element vokazzjonali u edukattiv; qed nirreferi għal Eduka 96, il-Ministeru qed jikkonsidra jekk din is-sena għandhiex tinżamm Careers Convention.
SIGURTA' SOĊJALI - "SOCIAL CLAUSE"
2525. L-ONOR. JOE CASSAR staqsa lill-Ministru tal-Ħarsien Soċjali: Billi fi tweġiba għall-mistoqsija parlamentari numru 2291 dwar l-ILO u s-"social clause" li l-Ministru fost ħwejjeġ oħra qal:
"Wieħed jara sewwa l-implikazzjonijiet tas-"social clause" li l-effetti tagħha jmorru lil hinn mill-qasam fejn topera l-ILO;"
jista' l-Ministru jfisser aħjar il-kliem fuq imsemmi?
ONOR. EDWIN GRECH: Bħal ma jaf l-Onor. Membru, il-kwistjoni tas-`social clause` hija kemmxejn kontroversjali u Malta qegħda ssegwi mill-qrib id-diskussjonijiet dwarha kemm fl-ILO kif ukoll f`organizzazzjonijiet oħrajn internazzjonali.
