14430. L-ONOR. LOUIS DEGUARA staqsa lill-Prim Ministru: Jista' l-Prim Ministru jgħid kemm hemm każi fil-preżent quddiem l-Ombudsman li jikkonċernaw impjegati taċ-Ċivil? Minn liema dipartimenti huma dawn l-impjegati? Jista' l-Prim Ministru jagħti breakdown ta' dawn it-talbiet?
ONOR. ALFRED SANT: Nitlob lill-Onor. Membru biex jistaqsi għal din l-informazzjoni direttament lill-Ombudsman.
MINISTRI/SEGRETARJI PARLAMENTARI - KODIĊI TA' ETIKA
14431. L-ONOR. LOUIS DEGUARA staqsa lill-Prim Ministru: Jista' l-Prim Ministru jgħid f'liema stadju waslu t-tibdiliet li kien semma fil-bidu ta' din il-leġislatura mmirati biex isaħħu u jtejbu l-Kodiċi ta' Etika tal-Ministri u s-Segretarji Parlamentari?
ONOR. ALFRED SANT: M'għandi xejn x'inżid mat-tweġiba li tajt għall-mistoqsija parlamentari numru 230 ħlief li nirrimarka li min-naħa tal-Membri ta' l-Oppożizzjoni ma sar l-ebda suġġeriment għal titjib mixtieq biex dawn jiġu miflijin mill-Gvern bl-akbar interess u attenzjoni.
